Tapa pasang iek di Hoi dong Bangsa dalam thun 2024, ong Y Thanh Hà Niê Kđăm – Akaok Kapul Bangsa di Quoc hoi mboh lac, rilo gru tagok bhum ceik glaong pato 10 thun oh hu mai sang, mai bhum palei. Kayua urang ngak bruk tui sarak karja daok dalam tanut ba tabiak nan bruk panduan ba gru pato di bhum glaong saong bhum gah ala ceik di dom tinh bhum ceik daok gaok kan kandah. Du thao Hukum Gru pato hu ba tabiak, bruk panduan gru pato di dom labik pato pakat karja, meyah sarrak di labik bruk ngak klak glaong jang dut haong labik bruk ngak bahrau ye brei khik piah sarak di labik bruk ngak klak dalam tukvak rilo abih lac 36 bilan. Hadei tukvak khik piah ye ngak tui sarak di labik bruk ngak bahrau.

Tui So LĐ, TB saong XH TPHCM, dalam thun ini, bruk kham merat peih ngak veik dom jalan lang talaih ka urang ngak, bruk ngak, piah duah bruk ngak ka 300.000 mbang urang ngak, dalam nan hu 140.000 labik ngak birau. Piah peih ngak bruk nan, So LĐ-TB saong XH brei ramik caga pambuak haong dom jabat, ndon vi pambuak tral peih ngak dom bruk pambuak tal urang caong duah bruk ngak - urang khin pandar urang ngak. Tui nan peih ngak danak dak Daong prein ka urang ngak; peih ngak dom danak dak taduan urang Viet Nam nao ngak bruk negar langiu tui sarak pambuak bruk di Viet Nam saong dom taneh ia piah daong urang ngak hu rilo palih ruah tui hatai drei.

Urak ini, dalam tinh Ben Tre hu labaih 1.500 baoh sang taik tahak brei padang bahrau saong pasiam veik. Urang pan akaok tinh Ben Tre brei ka baoh sang halei hu ginup kein lagaih hu brei ngak dahlau dalam akaok bilan 3 ini. Ben Tre kham merat tal abih thun 2025, ngak salah blaoh danak dak brei oh daok baoh sang taik tahak. Tal harei 21/1, Ben Tre hu 4.044 baoh sang hu hatai caong daong padang bahrau saong pasiam veik sang daok dalam thun 2025. Kuhria bih tih jien buh tame ngak labaih 213 ribau ty ndong.

Meng harei ini, Kong an Cà Mau kuhria psang iek taong abih labik, langyah dom bruk ngak suan  hukum jalan mbak di dom labik hu ralo bhap bini daok, labik hu rilo urang menyum alak mbia, ma tuy, mblang radaih, gilang khik piah saong labik pataom pandap pandar, piah takik bala rah tabiak angaok dom jalan mbak. Bruk pasang iek, langyah  hu bhian peih ngak gam gam, catang saong brei eik praong hukum karja, oh lac labik halei, oh thei daok gah langiu hukum.

Di bhum taneran kraong Cuu Long, ia mbak tame dalam abih di bilan thu thun ini rah tabiak ralo mbang, meng harei 20-2 tal harei 6-3 saong meng harei 21 tal 28-3. Dalam bilan thu ini, gah ngak nong tinh Tien Giang ruah jalan caga, pacang pandiak bhang, njom ia mbak tui jalan ngak di thun 2023 – 2024 piah pacang khik bruk ngak mbang hu salamat saong ia pandar ka rahra. Dalam tukvak anak tal, dom bhum palei roh duah kuhria dahlau piah ramik jalan pacang caga pandiak bhang, njom ia mbak dalam labik ka lagaih. Gah ngak nong brei pasang iek tani tanat bruk njom ia mbak piah pandar kraong ribaong.

Triều Tiên yak klak Pasak Pataom mbaok urang baoh sang atah di gauk pak di ceik Kumgang. Ini lac danak dak puac abih di rajaei Han Quoc daok veik di labik ini, hu padang ngak tui bruk pambuak gauk di duah gah. Urang brei panuac di Mentri Yasa Han Quoc  iew da-a Trieu Tien  brei samar padeih bruk yak klak nan. Han Quoc  jeng daok pasang iek dom jalan ngak tui hukum cagar veik Triều Tiên kayua ngak suan adat ngak po drap ar  di Seoul.

Rajaei Japon brei pablei tabiak tal 210.000 tan brah khik piah di drei piah khik kajap gah pabak brah dalam tukvak yaom kaom tagok glaong. Mentri Ngak nong, Ngak glai saong Athur ia, huac kanda dom urang pablei ikak kaiy saong urang ngak nong daok khik piah brah piah cang yaom tagok. Bilan dahlau, hu peih cadu sarak brei pablei abih brah khik piah piah cakak bruk tagok yaom, taphia bruk daong hadei dom mbang yuak hu takik.

Jabat Khik iek Alam moi truong My daok duah jalan padeih klaoh dom srak pambuak bruk kayua karja dahlau diah ngak bruk, dalam nan hu parabha pabak 20 ty USD daong ka dom danak dak ngak nang luong hacih sa-at saong jalan mbak di dom labik bhap bini gaok kan kandah, rambah rambeip. Tui karja Tổng thống Donald Trump, Jabat Khik iek Alam moi truong My kham merat kareik veik phun jien daong pambuak tal bruk langik salih karei saong adat moi truong blaoh gaok rilo kan kandah kayua hukum karja. Dom bruk ngak nan di rajaei Trump cakak trun yaok pluh ti USD piah ngak dom danak dak nang luong hacih, khik ramik saong jalan mbak.