Page ini 19/12, di dalam negar peih bruk padang ngak sumu gauk, peih pakak, brei peih radaih nduac iek ky thuat 234 danak dak salam uan Nyaom roya lambaok vakil dalam negar mbang ka XIV di Ndang. Tui Mbang peih ngak hu 79 labik brei ngak online saong ngak tapak dalam negar. Labik pasak caik di Harei peih ngak danak dak buh jien tame padang Labik ban medin pahat padhih Olympic hu peih ngak di xa Thượng Phúc kayua UB Bhap bini Ban Ha Noi lac jabat pasang khik. 12 labik brei padang di Lao Cai, Bac Ninh, Quang Ninh, Hue, Quang Ngai, Lam Dong, Ban raya Ho Chi Minh, An Giang, Can Tho, Dong Nai saong 2 labik di Ha Noi.

Hadei sa thun ba tame ngak bruk, jalan Metro ka 1 ( Ben Thanh - Suoi Tien) pajeng hu labaih 78.000 tuai ndik radaih, duh ka jaik 19 trieu tuai, sumu  114% dut saong bruk ba tabiak. Yaok bilan Metro ka 1 duh ka labaih 1,5 trieu tuai damuai, ralo abih hu tal 110.000 mbang sa harei di bingun Tet. Tuai damuai brei mboh bruk khin nao meng radaih dien Metro lac biak ralo, rilo bhap bini pandar metro lac jalan bhian nao mai di drei. Thun 2026, jalan Metro ka 1 brei pablei harak ve ka dom radaih buyt saong metro piah lagaih ka urang pandar.

Piah jhul samar tukvak padang sang daok ka rahra njauk khat lahik kayua ribuk ia sua praong abih, Kong an tinh Dak Lak patui veik tagok 140 urang jakar, bol lin trun mai labik, hu mbaok tame ngak “Danak dak Quang Trung” samar chip. Dom urang jakar, bol lin hu peih ngak di 14 xa, phuong njauk khat lahik trak dalam mbang hajan ia sua bahrau blaoh. Dahlau nan, ngak “Danak dak Quang Trung” samar chip kayua Thu tuong Rajaei peih ngak, Kong an tinh Dak Lak hu jak ba yaok rituh urang jakar, hu mbaok padang 200 baoh sang ka rahra dalam bhum.

UBND tinh Dong Thap birau ba tabiak Harak peih ngak Danak buh jien tame jaik 336 ti dong pacang caga glut jaleih ar tathik Gò Công, di 2 xã Tân Điền saong Gò Công Đông. Bruk pamong tal di danak dak lac pacang caga jaleih ar tathik, mblang taneh piah pasiam veik glai dauk dalam ia mbak, khik hu salamat ka anek manuac saong drap ar, takik khat lahik kayua bala meng langik. Danak ngak salah jhul pakhang bruk cak rok patagok kinh te ngak mbang di tathik gam haong sirah rivang ma-in, khik an ninh - quoc phong.

Tinh Vinh Long daok jhul khang pandar bruk raong hadang ia meteh mbak meteh taba ilamo kong nghe glaong, paglaong bruk ngak, asar siam saong pamaong tal patagok kaya ikan hadang karo kajap. Hadei labaih 3 bilan, urang raong meda mek hu laba glaong meng 700 tal 800 trieu dong yaok ha. Vinh Long urak ini hu labaih 7.800 ha raong hadang ia meteh mbak meteh taba ilamo kong nghe glaong, tagok 1.680 ha dut haong tukvak ini thun dahlau. Gah ngak nong tinh hu pabak jaik 6.000 harak bi-ar brei ngak dom labik raong hadang ia meteh mbak meteh taba, hu taong abih jaik 5.000 ha.

Ban raya Sydney di Australia ngak mekre sang danaok ngan haong rilo gom menyek rilo ban sambo saong dom siam gheih di harei Giang sinh. Rilo baoh sang caik tukvak, prein yawa saong jien padai tame ngak brei mekre sang danaok piah duah bui sambai oh lac ka baoh sang di drei bo daok ka dom urang karei dalam sang. Jeng yau nan bo yaok thun tal Giang sinh, bhap bini Sydney bhian jak gauk daok jaik taphia mai ma-in bui sambai haong gauk.

Ong taha Noel bhian pagam saong tuk langik laik tuyet, min urak ini dom urang roh duah ka sinh vat tasik di Bein athur Guadalajara, Mexico, daok ngak jeng Ong taha Noel saong nyuk trun thuy cung piah salam uan bilan raya saong paglaong ilamo ka bruk hu makna di tasik. Biak rilo adei sit chreih chrai mai Bein athur piah maong ong taha Noel tamia trun ia. Bruk ramik caga ini lac sa bruk bhian ngak di Bein athur Guadalajara dalam labaih 10 thun tapa, ba mai bruk rivang me-in biak pachreih ka tuai damuai, abih di nyu nan lac dom adei sit.

Tal tuk padeih padei akaok thun birau mai jaik, min rilo urang Mỹ biak caik hatai kuhria bruk blei pandar kayua rilo ndap nda yaom chiat, ba tal urang kuhria brei cai pandar patak pataom. Labaih 50% urang Mỹ khan lac bruk blei pandar Giang sinh kan jang bhoan harei. Dom sarak jien je kayua Tong thong Donald Trump ba tabiak ngak yaom kaom ndap nda tagok yaom saong ngak haduh hatai ka bruk tani tanat di gah kinh te My. 68% urang Mỹ  umo dam dara sahaneng lac bruk ngak kinh te taneh ia “ oh lagaih” dut haong tuk dahlau ong Donald Trump tagok ngak Tong thong./.