Page ini, labaih 2,5 trieu anek saih di Ban raya Ho Chi Minh gam haong 30 trieu anek saih dalam negar hu mbaok tame harei peih pakak thun bac bahrau. Di Ban raya Ho Chi Minh, sa labik hu anek saih rilo abih dalam negar dahlau nan anak meta hu salah blaoh taong abih bruk yau pasiam ndap nda kaya, kuhria caga ka thun bac bahrau. Hu dom labik atah yau xa kaoh pulao Thạnh An, dac khu Côn Đảo jeng srap gap ka harei peih pakak thun bac bahrau. Abih di nyu nan lac dalam thun ini, gah Pato Megru Ban raya Ho Chi Minh pandar dom sang bac oh taduan bangu alin tadhau ayuh, pachreih dom labik, urang menuac salih bangu, pandap alin jeng dom paok jien daong, daong ka kadung jien pachreih bac di dom sang bac atau daong rahra daok gaok kan kandah.

Harei kabroi, UBND tinh Dong Thap peih bruk padang ngak Sang bac Tieu hoc Nguyễn Thị Tốt di xã Vĩnh Hựu, tỉnh Dong Thap. Di harei peih pakak hu ong Huỳnh Thành Đạt, Uy vien Trung ương Đảng, Pho Akok Ban Tuyen giao saong Dan van Trung ương. Sang bac Tieu hoc Nguyễn Thị Tốt padang ngak birau hu 3 khoi dalam nan hu 1 tal ala soang 2 tal angaok, brei ginup 630 anek saih tame bac, kuhria abih tih jien buh tame labaih 37 ty dong, meng kadung jien tinh, daong ka dom adei anek saih hu bac megru hu lagaih, ma-in bui sambai saong cakrok patagok taong abih gah.

Sang bac THCS - THPT Tân Bằng, xa Biển Bạch, tinh Ca Mau jeng bahrau peih pakak saong ngak tui sarak njauk pakat negar. Sang bac hu Kongti TNHH buh jien tame ngak mbang gah taneh riya Ban raya (CITYLAND GROUP) saong Kapul Thiện Nhân Ban raya Ho Chi Minh daong 20 ti dong padang. Tok hadei 5 bilan peih ngak, danak dak hu salah blaoh njauk tukvak, samu duh ka thun bac bahrau. Di harei peih pakak, ong Bùi Mạnh Hưng, Akaok CITYLAND GROUP, Akaok Kapul Thiện Nhân Ban raya Ho Chi Minh hu alin hidiah 20 paok jien pachreih bac taong abih gam haong jien pandar, taong abih yaom jien 2,4 ti dong ka 20 adei anek saih di sang bac.

Tinh Dak Lak daok tame bilan paik baoh durian, darak pasar thun ini rah tabiak hu tani tanat lagaih jang dom thun dahlau. Bruk meblah gauk pablei saong blei di bein trun mboh di meta, yaom kaom tani tanat jang. Urak ini tinh Dak Lak hu 40.000 hecta taneh pala durian, labaih 26.000 hecta brei paik baoh, sumu 392.000 tấn. Piah pablei tabiak negar langiu, UBND tinh caong khin karja dom bhum palei ngak bruk khik ma so labik pala, labaik papaok, tui iek tani tanat bruk brei baoh hacih sa-at, pacang bruk kateik yaom.

Caga duh ka hatai caong nao mai tagok glaong di bingun puac abih, Vietnam Airlines hu peih pablei samar harak ve Tet Nguyen dan 2026, meng harei 02/02 tal 03/03/2026. Taong abih labaih 3,5 trieu kik hu pablei tabiak dalam taong abih gah ahaok par dalam negar saong dunya, tagok jaik 20% dut haong tukvak ini thun dahlau. Dalam nan, daom kik daok hu pabak di dom ahaok par Ha Noi – Ban raya Ho Chi Minh tagok jaik 18%, jalan ahaok par Ban raya Ho Chi Minh – Da Nang tagok jaik 9%, dom jalan par karei tagok meng 9% tal 13% dut haong tukvak ini thun dahlau…

Tong thong Donald Trump khan lac tuk halei jeng ngak hu oh lac taong tame jien je glong bo daok cakak bru pablei tabiak dom kong nghe hu makna praong yau chip saong AI lac bruk ngak meda kan kandah trak tal bruk ngak mbang tapa taka si di chau Au. Meda lac brei padeih bruk taong phat mbang ini anak meta, min brei mboh kong nghe daok jeng labik meriak gauk birau di dunya.

Kurang bruk menek lac asal kadha dalam rahra di Japon dalam dom thun jaik ini. Makna di bruk ini lac kayua jien raong anek biak glaong, urang dam dara kan si ngak ka lagaih samu gauk ka bruk ngak saong baoh sang. Rajaei Japon hu tagok jien daong raong anek saong dui atah tukvak padeih ngak bruk piah raong anek naih ka urang ngak bruk. Min, dom urang ilamo kakei caga ka sarak di Japon urak ini tok pataom tame rilo di tukvak hadei khin gauk, dalam tuk kurang bruk daong dam dara hu bruk ngak saong labik daok tani tanat.

Bilan he thun ini di Trung Quoc brei mboh pandiak glong abih. Rilo bhum palei di gah Meraong negar yam tapa dom mbang pandiak catang abih. Tan Hoa xa jeng khan lac, labaih 4.000 urang di taneh ia ini nao iek ruak kayua dom ruak kayua langik pandiak dalam bilan he ini. Kuhria mbiah tal ini, hu 26 urang metai kayua dom ruak pambuak tal langik pandiak./.