Page ini, Nyaom roya Dang bo TPHCM mbang ka I peih pakak hu mbaok di 547 urang lambaok vakil. Tong Bi thu Tô Lâm hu mbaok saong brei panuac tacei pato Nyaom roya. Ini lac Nyaom roya mbang akaok meti hu peih ngak pataom tame 3 tinh, ban nan lac TP.HCM, tỉnh Bình Dương saong tỉnh Bà Rịa - Vũng Tàu, peih tabiak praong prang bruk cakrok patagok  oh ka bhian mboh di ban do thi Viet Nam. Nyaom roya ba tabiak bruk kham merat ngak brei GRDP tagok tal 11% sa thun, ba TPHCM jeng ban do thi dunya, dang dalam nyaom 100 ban raya siam gheih piah diukrai.

Harei ini, Tỉnh ủy Vĩnh Long peih bruk rik daong bhap bini dom tinh gah Barak pasiam hadei bala ribuk ia sua. Di var rik daong dom urang ngak praong di tinh saong dom urang jakar pakat tinh hu rik daong, klak rabha dom bruk khat lahik, metai di mika bhap bini gah Barak negar piah ramik pasiam hadei ribuk ia sua, samar tani tanat raidiuk. Ong Trương Thành Dãnh, Pho Akok Ủy ban MTTQ Việt Nam tỉnh Vĩnh Long khan lac, tinh daok kham ngak harak gar payua dahlau 10 ti dong ka bhap bini dom tinh gah Barak.

Nyaom “ Ging tahaneh mbang anit ranam Gò Công” di tinh Đồng Tháp birau peih bruk pajeng ndap nda mai daong ka dom tinh Nghệ An saong Thái Nguyên, alin 2.500 paok pandap ka urang gaok bala kayua ribuk ia sua. Yaok paok hu mitom, brah, ia tasau, ia meyum, ahar…kuhria tui jien 100.000 tal 300.000 dong. Yaom lac pajeng memg radaih oto min biak glaih glar, yau nan min kapol urang ini biak sambai hatai hu daong ka mikva bhum ia sua gaok kan kandah.

Bol lin Bien phong tinh An Giang kham merat pacang caga bruk taong chap kaya ikan suan hukum, oh khan brei thau saong oh tui hukum IUU; abih di nyu lac pambuak haong dom gah chuc nang saong karja bhum palei dalam bruk khik iek dom kapal gilai, tui iek bruk taong chap ikan saong langyah bruk ngak suan. Jabat tuk halei jeng ngak siam bruk pasang iek, khik iek, yaok akok manuac , gilai kapal, ndap nda mac jamraih tui hukum, gam pakhang bruk pathau khan, pato hukum di ar tathik, angaok tathik…Hu yau nan, bruk sahaneng ngak tui hukum di bhap bini hu paglong tagok, takik lih tame tathik negar langiu.

Urang ngak nong tinh Cà Mau chreih chrai  tuk yaom hadang tamo tagok glong tani tanat. Dut saong tukvak ini thun dahlau, yaom hadang su meng 5.000 dong tagok tal 20.000 dong sa kilo; yaom hadang the takai putih tagok meng 5.000 tal 27.000 dong sa kilo, tui hadang praong atau sit. Urak ini, urang blei hadang su yaom meng 155 rivau tal 220 ribau dong sa kilo; hadang thẻ yaom meng 89 ribau dong tal 220 ribau dong  sa kilo. Yaom jien nan, kuhria bayar abih jien buh tame ngak, urang raong hadang hu laba labaih biak glong.

Yai Nobel Kinh tế thun ini hu alin ka 3 urang roh duah gah kinh te hoc, dalam nan hu 2 urang ilamo negar Mỹ lac Joel Mokyr saong Peter Howitt gam urang ilamo negar Anh lac Philippe Aghion langyah hu bruk salih birau hadah krah pabak prein khang ka bruk patagok kinh te, tui nan tacei tabiak kong nghe patagok samar oh lac  ngak tabiak ndap nda saong  jalan ngak mbang  salih ka jalan ngak yau klak dahlau, ngak jeng vaktu tayak klak -salih birau oh padeih. 

Rajaei Singapore patabiak “ Tapuk Daong prein yawa jalan sahaneng ka urang ngak” piah daong ka dom urang ngak praong di dom kong ty, doanh nghiep meda daong veik ka urang ngak yam tapa kan kandah samar  pasiam veik dom ruak kik pandik akaok. Singapore urak ini hu taduan bruk iek glang prein yawa tapa jao brei, daong ka  urang ngak gaok kan kandah dalam bruk sahaneng meda diukrai kuhria ka drei hu saong daong ka urang karei.

Trung Quoc melam kabroi khan lac ia ribuk praong akaok meti dalam thun di kraong Hoàng Hà nan lac kraong atah ka dua di taneh ia ini, hadei dom mbang hajan gam gam. Kuhria tui tanut chuan ia ribuk di Trung Quoc , ia tagok yau nan, ribuk ka 1 thun 2025 rah tabiak di kraong ini. Ủy ban Thủy lợi Hoàng Hà urak ini daok tui iek tani tanat dom bruk salih karei  ka hajan, ia tagok saong ia ribuk sua, kham ngak siam bruk pacang caga ia ribuk di bhum taneh gah ala kraong ia.