Dalam var ngak biar harei kabroi 12/10, Nyaom roya Dang bo rajaei peih 15 mbang ginum biai dom sarak Dai hoi saong hukum sarak potagok Nyaom roya mbang XIV di Dang. Brei panuac ka dom sarsak Nyaom roya Dang bo Rajaei, Pho Tong Yam ndoc Rayo sap ndem Viet Nam Phạm Mạnh Hùng khan lac: Dalam 5 thun tapa, yaom lac gaok rilo kan kandah kayau jit ruak COVID-19, sraw kadau bruk jien je di dunya saong bruk mesruh gah chinh tri, Viet Nam  kham merat ngak hu 22 dalam taong abih 26  kadha ba tabiak Sarak Nyaom  roya mbang dahlau, brei mboh bruk kham merat biak ralo saong bruk ngak hu jak jeng siam mekre hadah mbaok meta ala tacei ba di Dang, Rajaei.

Harei ini (13/10), Nyaom roya Dang bo Ban raya HCM mbang I, vaktu meng thun 2025 -2030 rah tabiak var ginum biai dahlau. Anak Nyaom roya Dang bo TPHCM mbang ka I, vaktu meng thun 2025 -2030, kapol urang jakar nao rivang dom bruk padang ngak, bruk ngak mbang kinh te, ilamo – xa hoi, quoc phong, an ninh naih gheih di ban raya. Hadei hu ndik tagok radai dien Metro ka 1 blaoh, Kapol urang hu mai kakuk, cuh gilau, pok bingu pahadar dhar phol dom patao Po Hùng di Labik kalan pahadar dom Po Hùng saong di Kalan kakuh ong Nguyễn Hữu Cảnh di Bein bingu Sajarah – Ilamo Bangsa di phuong Long Bình…Ini lac bruk ngak siam mekre daong ka dom urang duah thau  ka sajarah dakrai,ilamo, patagok kinh te- xa hoi di TPHCM birau.

Nyaom roya Dang bo tinh Lam Dong mbang I ba tabiak bruk kham ngak brei cak rok patagok  pandap ngak tabiak dalam negar kuhria rah tapa labaih meng 10 tal 10,5 sa thun, GRDP kuhria rah tui yaok rahra tal thun 2030 mek hu meng  6.700 – 7.500 USD. Pamong tal dom bruk praong nan, hadei tuk Nyaom roya tamat blaoh, Tinh uy Lam Dong brei peih ngak 6 bruk praong hu ba tabiak di  nyaom roya nan lac salih birau khang catang ngan haong ilamo – kong nghe, salih birau hadah krah lac prein yawa  khang piah ngak brei cakrok patagok khang kajap…Ong Y Thanh Hà Niê Kđăm, Ủy viên Trung ương Đảng, Bí thư Tỉnh ủy Lâm Đồng khan lac, dang bo  daok pataom tame, ba abih hatai jai ngak dom jalan ba tabiak blaoh.

Kuhria tal 17h00 harei 11/10/2025, dom urang, don vi, peih bruk tut angan rik daong  bhap bini gaok kan kandah kayua ribuk ia sua tapa Mban Jak ba rik jien daong Trung uong – UB Trung ung MT Negar Viet Nam lac labaih 907 ti dong. UBTU MT Negar Viet Nam  parabha 1 mbang ka 17 tinh, ban meng kadung jien  daong Trung uong piah daong ka dom tinh, ban ramik pasiam hadei ribruk ia sua ka 10 kuhria abih tih jien daong lac 265 ti dong. Mban Jak ba rik daong Pakat negar  daok taduan veik saong khan brei thau cambaic laic dom kapol, urang rik daong angaok rayo, thaik binguk ka bhap bini thau.

Dom harei jaik ini, ia ndik gam hajan praong ia sua ngak glut jaleih ar kraong ribaong, jalan mbak nao mai, ia sre di rilo labik dalam tinh Dong Thap. Rajaei saong bhap bini samar ramik caga, pasiam hadei ribuk rah tabiak. Langiu di taneh danao raong ikan di dom baoh sang bhap bini gaok kan kadah, taneh khat lahik labaih 500 met vuong, kuhria khat lahik labaih 3,7 ti dong. Hadei tuk talah ar kraong, ia sua, karja bhum palei, dom gah, kapol xa Hiệp Đức jak ba urang, rik daong ndap nda samar ngak brei pasiam veik, pakajap ar kraong, pacang cakak  ia tagok.

Hang thong tan karja Trieu Tien KCNA ba khaw tin, Trung Quốc khan lac tuk halei jeng khin pambuak siam haong Trieu Tien piah pakhang bruk suai lavik di dom gah dunya saong bhum taneh. Ini lac asar kadha vak dalam harak thu di Akok negar Trung Quoc Tập Cận Bình payua tal urang ngak praong di Triều Tiên Kim Châng Ưn. Ini yau panuac khan brei ong  Kim Châng Ưn thau njauk tame harei padang Dang Lao động Triều Tiên. Dalam harak thu Akok negar Trung Quốc Tập Cận Bình khan lac, Trung Quốc saong Triều Tiên lac “ puk paga gheih, ayut sahabat siam hatai” saong talei rohim dak harei dak khang kajap jang.

Sa kapol ngak pahala di bang Arizona, Mỹ kham merat daong ka rilo baoh sang gaok kan kandah dalam ruk rajaei Mỹ kareik pabah mbang, rilo urang jakar brei padeih bruk saong suai hu jien bilan. Dom bruk ngak di karja njauk klaik klaoh saong yaok ribau urang rajaei brei padeih bruk. Dom urang jakar lien bang padeih bruk saong gam dom urang daok ngak bruk oh hu jien bilan tal tuk Quoc hoi ginum biai blaoh, rajaei ngak bruk veik.

Yaom lac hu ngak blaoh saong daok ngak tui rilo jalan pacheih lakhah, ndih tapui anek, min bruk sraw kadau rahra di Han Quoc daok rah tabiak biak jhak. Tui Kuhria iek veik abih bhap bini saong sang daok di Han Quoc birau khan brei thau hare kabroi 12/10, dalam thun 2024, urang umo thun 20 di taneh ia ini trun 193.000 urang, trun 6,3 trieu urang. Ini lac thun ka 4 patui dom urang dam dara di Han Quoc trun khang./.