Harei ini, peih pakak Mbang nyaom ka 1, Quoc hoi mbang XVI. Mbang nyaom dui atah  11 harei, parabha jeng dua mbang. Mbang ka sa, meng harei 6 bilan 4 tal harei 12 bilan 4; mbang ka 2: Meng harei 20 bilan 4 tal harei 23 bilan 4. Tui kuhria mboh dahlau, Quoc hoi brei caik tabiak 2,5 harei pataom tame langyah pasang iek, brei thau ka urang jakar ngak bruk, kapol nyaom, palih ruah saong mbaoh harak labaih 39 angan je bruk ngak di rajakar pakat glong, dalam nan hu Po akaok Quoc hoi,  Po Negar, Thu tuong Rajaei, gam haong dom urang di Rajaei. Ini oh lac dak ramik bruk ngak dalam karja bo daok lac bruk peih akaok camereip ba dom sarak tame bruk cakrok patagok, paglong bruk khik taneh ia saong caong khin salih birau di bhap bini.

Pachreih harei Harei Prein yawa taong abih bhap bini (7/4), page 5/4, TPHCM peih ngak sumu dom bruk pasang iek di labik, padang tabiak  dom “kapol iek glang prein yawa gam gam”, pamong tal bruk iek glang prein dahlau ka bhap bini. Ngan haong kadha “Pacang caga dahlau ruak - Kayua sa Viet Nam khang kajap” brei mboh bruk cak rok patagok gah y te ngan haong 4 bruk praong: manuac lac pasak, caga dahlau bruk ngak dahlau, balai iek ruak bhum palei bhap bini lac labik ngak bruk. Bingun ini, dom “kapol iek glang prein yawa gam gam” pambuak haong bhap bini, kuhria ngak iek di yaok baoh sang rahra. Tui nan, peih ngak di 61 labik pasang iek ruak kik do 60 balai y te di ban raya.

Labaih 137.000 anek saih birau pakacah Taong yaom prein bac Sang bac Dai hoc Pakat negar TPHCM thun 2026, di 55 cum pakacah di 15 tinh, ban nan lac: Huế, Đà Nẵng, Quảng Ngãi, Gia Lai, Đắk Lắk, Khánh Hòa, Lâm Đồng, TPHCM, Đồng Nai, Tây Ninh, Đồng Tháp, Vĩnh Long, An Giang, Cần Thơ saong Cà Mau. Mbang pakacah  prein bac Sang bac Dai hoc Pakat negar TPHCM thun 2026 hu peih ngak dalam mbang: tut angan pakacah mbang ka 2 meng harei 18 -25 bilan 4 saong pakacah mbang ini di harei 24/5 di 36 don vi di 9 tinh, ban.

Yaom baoh li-u thu di dom tinh Vinh Long saong Dong Thap daok biak biar, pablei suai, ba tal po bein khat lahik trak. Tuk ini, yaom la-u thun daok labaih 35.000 - 40.000 dong sa pluh blaoh, biar abih kuhria meng dom thun jaik ini. Yaom li-u trun biar ba tal rilo po bein gaok ralo kan kandah, jien mek tame oh ginup bayar jien ngak kaya ndap nda. Bruk ba tal yaom la-u thu trun kayua ngak tabiak rilo baoh, dalam tuk nan pablei tabiak negar langiu suai damuai.

Page harei 4-4, di puk 3, xa Tân Hộ Cơ, tinh Dong Thap hu rah tabiak mbang jaleih taneh jalan ar barak ribaong Tân Thành hu atah 50 met. Mbang jaleih taneh ini ngak ia dauk, khat lahik tal danao kavei raong ikan di 1 baoh sang rahra hu taong abih taneh danao raong ikan njauk ia dauk labaih 3ha. Taong abih jien padai khat lahik labaih 5,2 ty dong. Makna ngak jaleih taneh jalan ar ribaong hu brei mboh lac kayua mbaok ia di danao tagok glaong jang dut haong mbaok ia ribaong labaih 4m, ngak jalan ar njom ia ba tal calah ar. Urak ini jabat chuc nang di tinh Dong Thap daong baoh sang rahra samar chip pasiam gilac jalan jaleih taneh.

Thai Lan daok yam tame dom harei bilan pandiak bhang catang aval jang dut haong yaok thun hu kuhria pathau khan ka pandiak hu tagok samar tal 43°C di anak Tet bhap bini Songkran. Ban ine Bangkok saong dom labik jaik taphia jeng njauk kan kandah ngan haong tanut pandiak meng 35 - 41°C. Di labik bhum Meraong negar meng nan mai thau lac labik langik mat lagaih urak ini jeng tagok glaong abih tal 39°C. Piah caga haong bruk ini, dom urang ilamo pachreih kakei rahra juai tabiak langiu langik dalam tukvak meng 9 tuk page tal mon 3 tuk biar harei.

Mesuh metak di Trung Dong daok jhul yaok trieu uranaih tame srau kadau trak, ngan haong bruk gaok bala, lahik labik daok saong njauk laik tame dom bruk bol lin dak harei dak tagok di rilo labik. Tui Kadung jien daong Uranaih Lien hop quoc (UNICEF), labaih 340 uranaih metai lahik saong yaok ribau uranaih gaok bala. Di Lebanon, labaih 1,1 trieu urang, dalam nan hu jaik 400.000 uranaih, brei tabiak truh sang danaok. Lambaok UNICEF kakei caga ka bruk ini meda caik gilac bruk kan kandah dalam hatai sahaneng suai atah ngan haong uranaih.

Talmo ameh yao klak 2.500 thun njauk klaik mek di Ha Lan hu duah mboh. Ini lac kaya ndap nda banrik di ilamo Dacia meng kal klak di Romania,hu maong yau lac sa dalam dom kaya banrik di negar hu makna. Mbang co klaik hu ngak tagok bruk srau kadau di Ha Lan saong Romania. Akaok Mentri Tu phap Romania tuk nan ieu ini lac “bruk jhak tachauk haong negar” saong ndom khang catang ka bruk duah mek lac bruk brei caik dahlau./.