Phaok Thu tuong Lê Thành Long bahrau mbaoh tangin ka Danak dak paglaong prein ngak saong bruk ngak siam lagaih di dom pasak bac megru dalam bol bhap rahra di bhum mikva bangsa takik saong bhum ceik tal thun 2030. Jalan ngak di danak dak lac paglaong bruk bac megru hu siam lagaih di dom pasak bac megru dalam bol bhap rahra, daong mikva hu nao bac di dom tal bac akhar huroh, bac megru bruk ngak, paglaong ilamo saong bruk ngak. Tal tuk salah blaoh danak dak Mentri Pato Megru brei peih bruk kuhria iek veik saong taong yaom ka dom bruk hu ngak jeng.

Amuk Nguyễn Thị Kim Ngân dahlau diah ngak Akok Quoc hoi gam haong dom urang jakar mai rivang Labik khik ramik ilamo bangsa S’tiêng sóc Bom Bo, xã Bình Minh, huyện Bù Đăng, tỉnh Bình Phước. Kapol urang hu Bí thư huyện ủy Bù Đăng Vũ Lương yaih khan ka bhum taneh, anek manuac, diukrai sahanak gireih di bhap bini Bù Đăng jeng yau ilamo, kaya mbang menyum di urang bangsa S’tiêng. Uan tabuan mboh bruk cakrok patagok di bhum palei ini, Amuk Nguyễn Thị Kim Ngân dahlau diah ngak Akok Quoc hoi caong khin: urang ngak praong di tỉnh Bình Phước, huyen Bù Đăng  patui veik dom bruk ngak hu jak jeng, patagok veik, dak padang  huyen Bù Đăng  dak harei dak siam gheih.

Tui So Lao dong – Thuong binh saong Xa hoi tinh Binh Duong, kuhria ka tanut thuong Tet Nguyen dan Ula Naih glaong abih lac 840 trieu dong, nan lac sa doanh nghiep hu phun jien buh tame meng negar langiu (FDI). Dom gah ngak mbang pablei salih karei jeng hu tanut thuong Tet tal 300 trieu dong. Tukvak ini, dom pakat Kong ndoan tinh Binh Duong daok kham merat piah thau ka hatai caong, raidiuk di urang ndoan vien, urang ngak bruk. Gam haong nan, pasang iek catang bruk ngak dom sarak di gah ngak mbang pablei salih ngan haong urang ngak bruk, khik kajap ka urang ngak bruk thei thei jeng hu Tet bui sambai, trei sir.

T.Ư Kapol urang jru ranaih umo Viet Nam pambuak haong Kapol Urang dam dara Viet Nam tinh Dak Lak saong huyen Krong Buk birau peih ngak Danak dak “ Xuan halan hatian – Tet anit ranam” di xã Chư Kpô. Mban peih bruk hu alin brei 20 paok pandap ka anek saih  saong dom baoh sang  hu raidiuk kan kandah, daong 10 mbang blaic raih ruak baoh hatai oh mek jien brei ka uranaih saong bliac ruak meta ka 50 urang, jru ruak, brei jru oh mek jien ka 500 urang. Bruk ngak hu makna  nan rik tame daong kuhria Tet Nguyen ndan ka bhap bini  di dom bhum kan kandah di tỉnh Dak Lak.

Dalam dom harei jaik Tet ini, baoh li-u that saong thu di tinh ben Tre yaom pablei tagok glong. Dalam tukvak ini, kuhria tui yaok baoh li-u baoh siam, dom labik blei baoh li-u thu duh ka bruk pablei tabiak negar langiu hu yaom meng 120 ribau tal 140 ribau dong 12 baoh. Daok baoh li-u that ye hu yaom meng 70-80 ribau dong 12 baoh. Min, mbang paik li-u jaik ini takik baoh, kurang gah pabak baoh li-u nan dom gah ngak mbang pablei tabiak negar langiu gaok rilo kan kandah. Ben Tre lac “pala rilo” phun li-u dalam taneh ia ngan haong labaih 80 ribau ha, hu 88% taneh pala phun li-u dalam bhum taneran kraong Cuu Long.

Dom urang plang lahik  kayua baoh taneh megei khang 6,8 ndo richte  di huyen Nhật, Tây Tạng, Trung Quốc tagok tal 126 urang, dalam tuk nan hu 188 urang karei njauk rambuas. Dom paneng tavak veik thaok binguk kayua jabat daong bala Tây Tạng brei mboh, rilo baoh sang di ban Shigatse, labik megei baoh taneh saong lac labik diukrai di 800.000 urang, kua nao sumu abih. Akok negar Trung Quốc Tập Cận Bình iew brei kham ngak bruk duah saong daong piah takik metai lahik abih saong padang veik labik daok birau  ka dom urang gaok kan kandah kayua bala nan.

Kuhria meng harei 6/1/2025, Indonesia peih ngak danak dak pabak var mbang oh mek jien ka jaik 83 anek saih dalam 5 thun anak tal, hu yaom 28 ty USD, piah langyah ka bruk biar saong lavang lavaih di uranaih saong jhul bruk duah hu jien mek tame ka urang ngak nong. Urang jakar Indonesia brei thau lac hu takik abih 5.000 sang ging hu padang dalam taneh ia, daong pasiam prein yava uranaih saong daong pandap kaya nong ka dom bhum palei pala. Mỹ saong Trung Quoc hu pagun sanya daong ka danak dak ini.

 Jabat Pandap meng klak meng kan Israel hu duah mboh sa tuvien jaman Byzantine, labaih 1.500 thun, dalam sang nan hu blah thaot hadah tanjiak saong daok khik hu siam tamo. Ala sang tuvien hu thauk dom blah thaot ngak meng candiah biak gheih, hu ngak jeng gai thanh ya, thau sing (thing – sư tử), cim katrau, bingu saong dom binguk. Di ala sang tuvien hu sarak akhar huroh Hy Lạp: “Haniem phol ka urang mai saong haniem phol ka urang nao”. Langiu di dom urang roh duah daok duah mboh inem mek di takik 9 danak dak karei, dalam nan hu sang ngak alak ala sang thauk blah thaok sambo hijao saong patih dalam dom labik piah ngak tapai saong wuang padang alak./.