Pahadar Harei padang tinh Ben Tre harei 17/1 (dahlau tuk pagam tinh) saong 66 thun Harei Ben Tre dang tagok mesruh metak (17/1/1960 - 17/1/2026), harei 14/1, tinh Vĩnh Long  peih bruk ginum biai “Bol lin ambuk tah” - nan lac dom urang rik tame ngak ka bruk mesruh metak Dong khoi thun 1960. Bruk mesruh metak Dong khoi di Ben Tre lac bruk mesruh metak  cach mang naih gheih di bruk Dong khoi gah meraong Negar; dalam nan hu bruk kham merat di dom muk, dom anai di “ kapol bol lin mbuk atah” di tinh Ben Tre ngak jeng bruk dang tagok mesruh di Dong Khoi catang, rik tame ngak jayak  kol My daong ka taneh ia.

UBND TPHCM birau padang Hoi dong pasang iek Harak pathau khan ka bruk buh jien tame padang ngak jalan tapa tathik pambuak bhum Cần Giờ saong Vũng Tàu, peih ngak tui jalan urang saong karja (PPP). Jalan atah 14 km, kuhria camereip hu 104.000 ti dong, kuhria peih ngak di bilan 6/2026, salah di quy II/2029. Kapol Vingroup daok padang ngak Labik do thu tathik Can Gio saong padang ngak metro Ben Thanh - Can Gio. Tuk dom danak dak ngak hu salah pambuak jalan mbak praong, daomng bhum taneh Can Gio cakrok patagok khang kadang di anak tal.

Piah pabak ka bruk nao mai rilo di bhap  bini dalam tuk Tet Nguyen dan nethak Athaik Waw – Binh Ngo 2026, Vietnam Airlines patui veik brei peih rilo mbang ahaok par  dalam negar meng mblang kapal haok Tan Son Nhat. Tui nan, Viet Nam Airlines peih pablei hu 60 ribau harak ve kihria jaik 300 mbang par, pataom tame tukvak tabung glong meng harei 9/2 tal harei 3/3/2026 ( lac harei 22 bilan Mat tal tuk ia bulan Pomi bilan Tha) piah duh ka bruk nao mai, rivang sang danaok jeng yau nao ma-in di tuai damuai dalam negar  dalam tuk tabung glong Tet.

“Cần Thơ Mega Sale 2026” peih pakak harei kabroi 14/1, di khach san Mường Thanh - TP. Cần Thơ. Bruk ngak nan brei mboh bruk pachreih “ harei pablei saong blei kaya” hu caong khin dom harei tapa, bo hu lagaih piah urang pandar kaya ini yaom lap di tuk Tet mai Bilan pataih tal. “Cần Thơ Mega Sale 2026” rah tabiak meng ini tal harei 18 bilan 1 thun 2026, pataom hu labaih 500 kaya hu nagan dalam negar saong dunya, rilo janih kaya pablei trun yaom meng 10% - 80%, pachreih rilo bhap bini saong tuai damuai mai rivang, blei pandar di bilan akaok thun.

Tui Rayo Khi tuong Thuy van tinh Vinh Long, dalam 2 harei anak tal, ia mbak njom tame di dom pabah kraong labaih 20km. Dom labik pabah kraong atah meng 21 km tagok ia mbak nyom tame samar, tagok hasit saong takik salih harei. Ia mbak 4 binah angaok ribau di pabah kraong Cửa Đại njom tame xã Giao Long, atah labaih 44km; angaok kraong Hàm Luông njom ia mbak tal dom xã Tân Hào, xã Đồng Khởi atah pabah kraong 34 km. Njom ia mbak  ngak jhak tal dom janih phun pala, athur raong, halau ia hacih di bhap bini.

Oh huac bruk kan kandah di bruk pablei salih gah langiu, Trung Quoc lac taneh ia ngak mbang praong ka dua di dunya lac hu sa thun pablei kaya tabiak negar langiu hu catang, laba labaih 1.000 ti USD. Abih di nyu, dalam thun 2025, hu tal 7 bilan Trung Quoc  jien pablei salih hu tal 100 ti USD, dalam nan thun 2024 lac sa bilan. Tui kuhria tukvak anak tal, bruk na  daok rah tabiak tuk dom doanh nghiep Trung Quoc daok pakhang  kajap di darak pasar di dunya.

Karja ban raya Phnom Penh, Campuchia birau peih bruk brei urang jakar nai pasang duah, chap mek dom labik pachot pagat saong ma-in mbia online daok ngak dauk di dom sang glong rilo tal saong bhum bhap bini. Tui bruk ba tabiak, Đô trưởng Phnom Penh ong Khuong Sreng tacei ba tapak 14 quan huyen daok tame ngak bruk catang, peih ngak rilo mbang pagui mek, pasang iek di dalam ban, pataom tame dom do thi, sang glong rilo tal  meda hu rilo urang dauk dalam nan.

Jien pato pakai ka anek bik dak harei dak cuang kandah di Australia ba tal rilo baoh sang brei cakak trun dom jien karei piah jien kuhria ka anek atau khin hu bruk daong di ong muk. Bruk Pato megru kayua gah Dau tu harei hadei khan lac, meyah lac sa uranaih tal umo thun nao bac dalam thun ini ye jien piah bac da-a ka anek dalam 13 thun di Australia tagok tal labaih 110 ribau AUD dut saong dom anek saih sang bac di karja. Yau nan ye, oh lac takik baoh sang brei cakak trun dom padeih padei, amaik ame ngak rilo bruk jang piah anek bik hu nao bac./.