Di mbang nyaom biai mbang ka 7 di Mban pato tacei dom danak dak pasak, danak dak hu makna pakat negar di gah jalan pasei, Thu tuong Phạm Minh Chính, Akaok Mban Pato tacei njauk hatai ka bruk tinh Dong Nai pambuak haong Ban raya Ho Chi Minh piah pambuak jalan pasei meng Ban raya Ho Chi Minh mai tal Mblang kapal ahaok par Long Thành langyah jalan mbak hu lagaih, dil samu, siam glaong. Tui nan, njauk hatai ka bruk, luac jalan peih gak tui hatai samar chip min njauk hukum, pacang cakak tham nhung, bruk jhak, bruk oh siam lagaih.

Tui Hoi dong Ngak bruk bol lin tinh Dong Nai, thun 2026 tinh hu 5.200 dam dara hu palih ruah nao ngak bol lin. Meng dahlau Tet Nguyen dan, dom bhum palei ngak siam  bruk daong bol lin, dam dara sahanang hatai tagok jalan ngak bol lin. Tukvak tapa, Hoi dong  Ngak bruk bol lin dom xã, phuong hu caik hatai sangka, ngak siam dom bruk, sarak yau: rivang, alin kaya Tet, pachreih jak ba dam dara saong baoh sang urang hu palih ruah ngak bol lin.

Darak pasar amraih kalu Viet Nam daok yam tame mbang yuak paik bahrau haong hatai caong yaom hu khik tani tanat di tanut glaong. Mbang yuak paik thun ini brei mek hu rilo di akaok bilan 3 saong dui atah tal abih bilan 4. Puac bilan 2 meng blaoh, yaom amraik kalu di dom bhum paka di Tay Nguyen saong Dong Nam Bo hu meng labaih 148 ribau tal jaik 150 ribau dong sa kilo, ini lac tanut glaong dut haong rilo thun dahlau. Amraih kalu yuak paik hu thun ini meda patrun labaih 15%-20% kayua gaok kan kandah di langik jhak.

Hadei Tet, yaom baoh durien di tinh Dong Thap tagok saong khik di tanut glong, daong ka po bein duah hu kein laba ralo. Rilo labik blei durian Monthong ka 1 ngan haong yaom 160 ribau dong sa kilo, janih 2 yaom 140 ribau  dong sa kilo; blei di bein urang pala hu yaom 110-130 ribau dong sa kilo. Tinh Dong Thap urak ini hu taneh pala praong abih di bhum taneran kraong Cuu Long hu jaik 34 ribau ha. Piah brei hu rilo baoh saong pablei hu yaom glong, jaik 70% taneh pala durian hu brei ngak tabiak baoh karei bilan.

UB Bhap bini phuong Hà tiên, tinh An Giang bahrau palao labaih 1 trieu drei hadang, aring, ghẹ pajaih rilo janih trun Danao Đông Hồ. Urak ini bruk lagaih meng kaya dalam ia daok kurang trak daok ngak kanjah jhak tal labik sinh thai, pambuak tapak tal bruk pasiam veik di bruk lagaih di kaya dalam ia saong bruk daok dang mbang ngui suai atah di rahra. Kayua nan bruk khik tani tanat palao pajaih di danao Đông Hồ piah pasiam bruk lagaih di kaya dalam ia, paglaong ilamo di bhap bini.

Myanmar brei an xá labaih 10.000 urang guk dalam “ Harei Urang ngak nong”. Bruk nan peih ngak dalam tuk bol lin Myanmar daok jao ramik bruk jao ka rajaei gah bol lin, tui kuhria ngak salah di bilan 4 thun 2026. Dahlau di nan, bilan 11 thun 2025, Myanmar brei an xa labaih 8.600 urang guk, piah rik tame jhul pakhang bruk ngak tui saong pambuak bruk di bhap bini ka bruk palih ruah.

Dom urang ngak bruk ka prein yava bhap bini Philippines daok patui veik jhul padrak rajaei ba tabiak bruk pakauk taong abih ngan haong pakao hala ndien tu, dom kaya pakao hala cuh pandiak saong kaya pabak nicotine karei. Urak ini hu 8 negar ASEAN tapa bruk pakauk ini. Thun 2024, 2024, Philippines hu sa bruk metai akaok meti pambuak tal ruak phổi kayua pandar pakao hala ndien tu.

Hang tin CNN khan brei thau bruk kuhria duah hadei tuk Mỹ saong Isarael patuh phao taok langik Iran, brei mbih ralo bhap bini Mỹ oh njauk hatai tui bruk mesruh Iran. Tui bruk birau ini, hu tal 59%  urang hu tangin lac oh khin bruk nan rah tabiak. Hu 41% urang njauk hatai atau oh ndem hagait./.