Page ini, Nyaom biai kuhria iek veik taong abih bruk di thun 2024, peih ngak bruk thun 2025 di Rajaei saong Karja palei rah tabiak di labik ngak bruk Rajaei ala tacei ba di Tong Bi thu Tô Lâm, Akaok negar Lương Cường, Thu tuong Rajaei Phạm Minh Chính, Akaok Quoc hoi Trần Thanh Mẫn…Khan brei thau di nyaom biai ka dom bruk ngak di thun 2024 saong jalan ngak di thun 2025 di Rajaei brei thau, thun 2024, bruk kinh te - xa hoi di taneh ia drei hu patui pasiam veik biak gheih ghang di grauk gah, bilan hadei glaong jang dut saong bilan dahlau. Thun 2025 biak hu makna saong lac thun rah tabiak rilo bruk praong glaong di taneh ia. Bruk ba tabiak lac biak trak damak, kol drei brei ngak “samar drah saong bahrau” piah ngak jeng dom bruk hu kuhria meng blaoh ka bruk patagok kinh te - xa hoi di dalam thun saong dalam nhiem ky 2021-2025, brei kein lagaih piah ngak jalan ngak patagok kinh te - xa hoi tukvak  2026-2030.

Brei panuac tacei ba ngak bruk bangsa thun 2025, ong Trần Việt Trường, Akok UBND Ban Cần Thơ caong khin Mban Bangsa peih ngak, pambuak dom sở, dom gah pambuak tal saong UB bhap bini huyen Cờ Đỏ saong dom quan Ô Môn, Ninh Kiều roh duah pok tagok UB bhap bini Ban piah ramik pasiam veik dom bruk ba tabiak jeng yau jalan peih ngak brei patagok kinh te - xa hoi bhum urang bangsa takik. Akok UB bhap bini Ban Cần Thơ brei caik hatai, dom pakat, dom gah, dom bhum palei njauk brei sangka  palih ruah, pandar saong daong ngan haong urang jakar, kong chuc, vien chuc bangsa takik; ngak siam bruk parilo urang ndang, pabak piah ba tame ngak bruk, pato pasram, pabak ilamo ka dom urang jakar bangsa takik sumu bruk caong khin  ngak bruk yau urak ini.

Ong Danh Phúc, Akaok Mban Bangsa tinh Kien Giang brei thau, thun 2025 kuhria abih tih jien buh tame ngak Danak dak pakat negar ka bruk patagok kinh te - xa hoi bhum urang bangsa takik saong bhum ceik di tinh Kien Giang lac labaih 175 ty dong. Tinh kham ngak salah blaoh salah abih phun jien jao brei ngak danak dak; patrun baoh sang kathaot dalam mikva bangsa takik meng 0,4% ba tagok. Tui nan, tinh Kien Giang jeng daong sang daok ka 203 baoh sang, daong taneh daok ka 8 baoh sang; pakajap, peih praong 9 danak dak pabak ia pandar dalam bol bhap rahra; buh jien tame yaok pluh danak dak jalan mbak, ribaong ba ia, duh ka bruk ngak mbang, raidiuk bhum mikva bangsa takik saong bhum ceik.

Mban Bangsa tinh Dak Lak pambuak haong Pasak pato megru thuong xuyen tinh birau peih bruk tamat tal bac pato sap Ê Đê ka 214 urang jakar, kong chuc, vien chuc pakat xã bhum urang bangsa takik, di dom huyen: Krông Pắc, Krông Bông, Cư M’gar saong ban sit Buôn Hồ. Hu mbaok tame danak dak pato, urang bac oh lac hu bac akhar huroh, panuac ndem meyai bo daok hu nao rivang bhum palei, yau ye dom mbang nao rivang dom palei  mbon urang bangsa takik piah duah thau ka adat mbat, tanarakun di urang bangsa Ê Đê di Dak Lak daong urang bac hu thau ka akhar vak, panuac ndem meyai, ilamo di urang Ê Đê.

UB Bhap bini Quan 6, TPHCM saong UB Bhap bini huyen Tu Mơ Rông, tinh Kon Tum bahrau peih bruk mbaoh tangin pambuak bruk, daong paglaong raidiuk di mikva bangsa Xơ Đăng. Dua gah njauk gauk ngak 5 bruk: UB Bhap Quan 6 daong pambuak piah parang saong yaih khan dom pandap kaya hu karei di huyen Tu Mơ Rông; Daong bruk daok dang mbang ngui ka urang baoh sang kathaot saong jaik kathaot; Padang saong pasiam baoh sang anit ranam ka dom baoh sang kan kandah; Pabak pandap kaya bac megru saong thiet bi piah pato online; Yaih khan thaik thaot yulit di bhum palei. UB Bhap bini Quan 6 jeng daong pasiam sang anit ranam, alin hadiah yaok rituh paok pandap daong bruk daok dang mbang ngui ka dom baoh sang kan kandah.

Indonesia birau ini hu jeng taneh ia ĐNA akaok meti hu mbaok tame Nyaom dom taneh ia kinh te birau patagok (iew lac BRICS). Padang tabiak di thun 2006 hu 4 taneh ia tame nan lac Braxin, Nga, Ấn Độ saong Trung Quốc, BRICS urak ini hu 10 taneh ia saong dak harei dak hu iek praong kayua pambak tal taneh ia phuong Tay. Ini lac mbang kaok meti di Nyaom dom taneh ia kinh te birau patagok kuhria meng thun 2023. Tui pathau khan di Mentri Ngoại giao Indonesia lac, bruk Indonesia hu jeng taneh ia dalam nyaom BRICS brei mboh bruk dak harei dak kham merat di Indonesia dalam dom bruk di dunya saong pagol sanya pambuak bruk di ralo gah…

Kongti DAMAC Properties di Negar Ả rập Thống nhất (UAE) hu jalan ngak buh jien tame takik abih lac 20 ty USD tame dom pasak du lieu di Mỹ. Panuac ndom dalam mbang hop mbao rah tabiak dalam harei kabroi (7/1) di bang Florida di Mỹ haong Tong thong Donald Trump, ong Hussain Sajwani – urang padang tabiak kongti brei thau, jien buh tame 20 ty USD hu brei ka dom pasak du lieu du ka gah patagok tri tue nhan tao saong ndien toan dam may. Daok di drei, Tong thong Mỹ ong Donald Trump ndom lac, paok jien buh tame ini brei piah daong “dom pasak du lieu bahrau praong di dalam negar Mỹ”.

Bruk langik la-ar biak la-ar thun ini daok dui atah di Nhat Ban, ngak khut khat biak ralo, jhak tal diukrai di anek manuac jeng yau khut khat drap ar di ralo bhum taneh di negar ini. Dalam 2 adit tapa, tuyet biak khang oh yau bhian mboh tuh trun ralo bhum di Nhat Ban. Njauk ndem tal, di tỉnh Aomori, tuyet laik kapan dalam 24 mon hu tukvak laik kapan tal 403 cm, dom bhum taneh karei tuyet laik kapan meng 128 cm tal 152 cm./.

/.