Melam kabroi, tinh Lam Dong  peih pakak Harei nyaom Ilamo – padhih the thao bhum urang bangsa takik mbang VII. Peih pakak lac kadha ma-in taong kong chieng biak gheih di 20 kapol nyaom ngan haong 300 nghe nhan bhap bini mai meng dom huyen, ban di tinh Lam Dong hu mbaok tame. Gam haong taong kong chieng, trun jalan taduan raok kaya kan gireik di dom kapol nyaom urang hu tui gauk yaih khan, brei bhap bini thau. Ini lac bruk ngak ilamo, piah khik ramik saong patagok yaom glong ilamo meng kan di dom bangsa di tinh Lam Dong. Harei ilamo daok hu pakacah dom kadha ma-in bhap bini, kaya mbang, pakacah taong kong chieng, angui cuk ngak khan ao bangsa.

Harei kabroi, tỉnh Bình Thuận peih pakak Adit Dulich Binh Thuan thun 2024. Peih akok Adit lac Nyaom darak hu labaih 50 labik parang iek, yaih khan dom pandap dulich, kaya mbang bingik  di dom bhum palei. Bruk gheih di Adit Yulit thun ini lac Pakacah kaya mbang bingi Binh Thuan, hu mbaok di 29 kapol nyaom lac dom urang tahaneh mbang di dom kuan nha hang, khach san, resort…Abih diu nyu, mbang akok meti Dhar kapol Urang tahaneh mbang  chuyen nghiep Binh Thuan yaih khan saong parang iek bruk ngak lẩu thả ka urang iek mbang. Vien Kỷ lục Viet Nam peih bruk khan brei thau, alin harak bằng Kỷ lục chau A pandap mbang  “Lẩu thả Phan Thiet” saong meyaom urang Tahaneh mbang - Đầu bếp ameh di tinh.

Ngan haong bruk peih ngak dom Danak dak Pakat Negar, mbaok meta bhum urang bangsa takik di tinh Kon Tum dak harei dak hadah hadai, raidiuk bhap bini hu paglong. Tinh Kon Tum urak ini hu 50 dalam abih tih 85 xa mek hu tanut chuan palei pala birau. Thun ini, Kon Tum kham merat ngak brei patrun baoh sang kathaot di bhum urang bangsa takik saong bhum ceik trun 4%, hu 7 xa saong 5 palei tabiak truh kan kandah; taong abih dom baoh sang urang bangsa takik hu taneh daok saong taneh pala drak. Karja dom palei pataom tame langyah bruk kurang taneh daok, taneh pala drak, ia pandar ka bhap bini hu sahanang hatai ngak mbang, dak harei dak paglong raidiuk.  

Tui Sở Kong thương Ben Tre, kuhria taong abih jien pablei pandap tabiak negar langiu di tinh 9 bilan tapa hu 1 ty 225 trieu dola My, tagok labaih 14% dut saong tuk vak  ini thun dahlau saong labaih 70% dut saong bruk ba tabiak dalam thun. Pandap pablei tabiak negra langiu  di tỉnh lac rilo la-u thu; ia la-u njiak; ia la-u lon; dang hoạt tính; merai nduh la-u; menyim jhik, kalik takhaoh,  kaya ikan, baoh kayau yaok janih. Darak pasar pablei tabiak negar langiu  di tỉnh hu peih praong labaih 130 taneh ia saong bhum taneh di dunya. Ben Tre kham merat tal thun 2030, hu jeng sa dalam 3 tinh ba kaok ka jien mek tame meng bruk pablei pandap tabiak negar langiu di bhum taneran kraong Cuu Long saong dang di kapol 30 dalam negar. 

Tui UB bhap bini tinh An Giang, taneh ia pala phun mbang baoh di tinh hu labaih 20.000ha, kuhria abih tih pandap dalam thun kuhria labaih 350.000 tan saong hu Mentri Ngak nong saong Patagok palei pala brei 446 ma so bhum pala kaya pablei tabiak negar langiu. Gah ngak nong tinh An Giang hu daong ngak jeng bhum pala phun mbang baoh pataom sa labik, daong brei labaih 500 ma so bhum pala saong pablei tabiak negar langiu: Hoa Kỳ, New Zealand, Úc, Hàn Quốc, Trung Quốc saong rilo taneh ia karei. Yau nan min, pandap pablei tabiak negar langiu di tinh daok kurang ralo dut saong pein lagaih di drei.

Kapol Tesla di urang kaya meda Elon Musk khan brei catuak drei lac jien pablei radaih tabiak meda tagok meng 20% tal 30% di thun anak tal, meng dom bruk salih birau dalam kong nghe peih nduac saong tabiak mbaok dom radaih yaom lap. Bruk nan ngak ka co phieu kong ty ini tagok 12% dalam mbang pablei salih meng blaoh. Dom urang ilamo mboh lac, bruk patagok glong di Tesla ralo mai meng bruk dak harei dak glong ngan haong dom radaih điện di hãng pablei di dom taneh ia dunya, jeng yau ngak brei patagok bruk pabak dunya.

Kong ty peih mbang ngui Deep Blue Aerospace di tỉnh Giang Tô, Trung Quốc khan lac, ong Huo Liang urang padang tabiak, Akok Hội đồng quản trị kong ty, brei tabiak 2 harak vé par tame langik vu tru dalam var livestream di Taobao saong yaoh khan cambaic laic ka tukvak peih ngak jeng yau bruk patagok kapal haok vũ trụ pablei salih di kong ty. Ini lac bruk taong yaom brei mboh makna praong di gah dulich vu tru  di Trung Quốc. Tui kong ty khan lac, yaom harak vé di mbang par tame langik vu tru  abih 1,5 trieu nhan te lac labaih 540 trieu jien Viet Nam.

          Hadei sa thun ngak bruk, radaih peih drah samar akaok meti saong samar abih ĐNA  lac radaih Whoosh di Indonesia poajeng hu 6 trieu mbang tuai damuai. Radaih peih drah samar  pambuak Thủ đô Jakarta haong ban  Bandung di tỉnh Tây Java hu peih di kreh bilan 10 thun 2023. Peih khang 350 km/h, radaih Whoosh nao mai dua labik abih 40 minit, salih ka bruk radaih oto peih abih 3 mon. Urak ini, mblang radaih padeih di Halim Station di Ban ine Jakarta hu pambuak rilo jalan mbak, radaih pajeng ba yau ye jalan radaih pasei, radaih buyt, radaih taduan raok tuai tame tabiak mblang kapal haok./.