Mbang nyaom ka 10, Quoc hoi mbang XV peih pakak dalam praong prang di page ini pak Sang Quoc hoi, Ban ine Ha Noi. Labaih 40 harei ngak bruk, Quoc hoi pasang iek 49 danak dak hukum, 4 sarak di danak dak padang hukum saong 13 nyaom bruk ngak gah kinh te – xa hoi, gilang sarak karja, tui iek saong dom bruk ngak hu makna karei di taneh ia. Mbang ginum biai puac Nyaom biai ka XV,  oh lac piah kuhria iek veik taong abih bo daok brei mboh bruk kham merat salih birau, paglong asar siam di labik ginum biai, lagaih haong Sarak 66 di Trung uong: ba sarak hukum jeng kein lagaih meriak gauk patagok.

Rivang Pasak duh bruk ngak sarak karaj phuong Hưng Phú, ban Cần Thơ dalam harei 19/10, Thu tuong Phạm Minh Chính hu taom gaok, ndem meyai ka bruk ngak haong dom urang jakar.  Thu tuong caong khin Ban Can Tho jhul pakhang bruk dak padang, pagam tame, pambuak dom co so du lieu, abih di nhu lac dom gah hukum, taneh riya, pablei salih; tui nan ngak siam hatang kong nghe so, peih pambak praong bang thong, jhul pakhang bruk “ bhap bini bac pandar taka so”, tacei pato bhap bini salih pandar taka so. Tapa nan, bhap bini thau pandar taka so, karja so, xa hoi so, jeng randap ngak bruk tui jalan online.

Hadei tukvak suai lavik padeih ngak bruk, kapal haok par meng Nga tal Phú Quốc hu peih tabiak saong para mai veik mbang akaok meti di harei 19/10 meng Ban Vladivostok (Liên bang Nga) tal Mblang kapal ahaok Dunya  Phú Quốc (An Giang) kayua Anex Vietnam pambuak haong Vietjet Air.  Ong Trần Minh Khoa, Akok UBND đặc khu Phú Quốc khan lac, tukvak tapa  Phú Quốc  hu jeng sa dalam dom labik rivang ma-in tal tuai damuai dunya takre mai, bruk peih jalan ahaok par tapak meng Nga mai Phú Quốc rik tame daong brei mboh labik dang di gah yulit kaoh pulao di angaoh dunya.

Patui bruk tacei ba  di Akaok Cuc Canh sat jalan mbak ngak bruk pasang duah urang menyum alak peih radaih  dalam tukvak ba tabiak, harei kabroi 19/10, gah Canh sat jalan mbak Kong an 34 bhum palei  pasang iek urang menyuk alak tabiak jalan meng mon 12 tuk 30 minit tal 14 mon 30. Dalam 2 mon, gah pasang iek bruk menyum alak  peih radaih 58.000 urang. Tapa nan duah mboh saong ngak harak gal jaik 2.000 mbnag urang ngak suan. Yau nan ngak suan hu trun takik dut saong harei 18/10.

Dalam dom harei tapa bruk blei bingu that di dom darak di Ban raya HCM trun dut saong harei 20/10 – Harei urang kumei Viet Nam thun dahlau. Di darak bingu  Hồ Thị Kỷ (phường Vườn Lài), sa dalam dom darak bingu praong abih di banraya, bruk pablei salih mboh jua dut haong dom mbang dahlau. Yau nan min, bruk pablei salih angaok mang online mboh chreih chrai jang, tapa nan mboh bruk blei saong pablei pablei salih karei di urang. Yau nan ye, urang blei patak pataom jien blei tapa online ba tal takik blei di darak langiu.

UB dac biet di Campuchia ka bruk Pacang pachot pagat onlien patrauk 64 urang duis pagat tapa online mai meng Hàn Quốc, dalam nan hu 5 urang kumei. Kapol urang njuak patrauk hu pambuak tal bruk pagar online. Campuchia peih bruk duah mek pambak praong piah khik brei salamat ka radiuk manuac sia dalam negar. Campuchia chap mek hu abih tih 3.455 urang tapa online mai meng 20 taneh ia karei di gauk dalam jaik 4 bilan tapa.

Gilang khik drap ar Louvre di Paris (Pháp) kareik pabah mbang hadei tuk 3 urang likei pacang sit mbaok tame saong duak tabiak gam haong 9 janih kaong baoh nyuk, karah di patao Napoleon saong diuk di ong. Bruk co klaik rah tabiak tuk peih pabah mbang page 19/10, tuk dom urang tame labik parang iek Apollo di Gilang khik Louvre – Labik khik piah hu rilo pandap ngui cuk di patao Prang. Tong thong Emmanuel Macron khan lac dom pandap nan meda hu duah mboh saong dom urang co klaik nan taong phat trak.

 Karja ban ine New Delhi, Ấn Độ ba tabiak bruk ngak tui dom adat pakauk dalam bruk Pacang caga tui dua pakat 2 (GRAP-2) di taong abih ba ine, piah caga haong bruk njom nerak  daok rah tabiak jhak.  Di Ấn Độ tagok glong di harei Adit 19/10, trun jaik haong tanut biak jhak./.