Page ini ( 22/12) di Jabat Trung uong Dang, ala tacei ba di Tổng Bí thư Tô Lâm nyaom biai mbang 15 BCH Trung uong Dang mbang 13 hu peih ngak dalam praong prang. Nyaom biai langyah pataom tame klau kadha praong nan lac, Dom bruk ngak urang jakar di Nyaom raya XIV di Đảng; Dom bruk Ginum biai ka dom Harak ar khan di Nyaom raya XIV di Đảng; Dom bruk peih ngak Nyaom raya mbang XIV di Đảng. Nyaom raya pakat negar mbang XIV di Đảng kuhria peih ngak meng harei 19/01/2026 tal harei 25/01/2026 di Ban Ine Ha Noi hu 1.586 Urang lambaok ka labaih 5 trieu urang Đảng, mai taom mbaok Nyaom raya.  

Pasak ngak bruk harak gar karja TPHCM tame ngak bruk di harei 31/12 anak tal di phuong Thu Duc. Ba Pasak tame ngak bruk piah ngak hu ngak brei sumu gauk dom bruk pambuak tal jabat ngak bruk, urang ngak, kaya ndap nda, mac jamraih, bruk langyah harak hành chính,  jamraih kong nghe khaw tin, pham mem  ung dung jeng yau khik iek harak gar, tai lieu. Tapa nan, ngak siam bruk duh ka bhap bini, doanh nghiep hu lagaih, siam mekre, oh klaik klaoh dalam tuk salih bruk.

UB bhap bini tinh Cà Mau mbaoh harak Du an padang ngak 7 brong pacang ia mbak, pacang ia ndik, khik caga taneh pala drak kuhria tui jien labaih 277 ti dong. Danak dak peih ngak piah pacang ia mbak, khik ia taba pruh ka 27 ribau hecta taneh pala drak di dom xa dalam tinh Bac Lieu (dahlau diah). Danak dak daok rik tame pacang caga njom ia mbak kayua ia tathik ndik, khik tani tanat bruk pala drak, ngak tabiak rilo kaya  nong siam, pablei hu jien tame.

Dalam thun ini, Lâm Đồng hu 38 mbang hajan praong ngak metai 17 urang, 21 urang njauk rambuac, labaih 20.000 baoh sang  khut tayak. Kuhria khat lahik jien tagok tal 1.840 ti dong. Yaom lac Thu tuong Rajaei samar daong 500 ti dong piah ramik pasiam jalan mbak, min anak bruk khat lahik biak praong, kadung jien di tinh oh ginup. Yau nan ye, UBND tinh Lâm Đồng  caong khin Trung uong langyah, daong phun veik phun jien daok kurang jaik 1.200 ti dong piah tinh ramik pasiam jalan mbak.

Meng akaok bilan, yaom durian di gah Pei negar drei trun biar ralo, ba tal po bein takik laba. Urang blei di phuong Ngã Bảy( Ban Cần Thơ) khan lac, durian Thái janih A blei di bein tok labaih 85.000 dong sa kilo. Yaom trun lap kayua dom jabat test Cadimi, Vàng O brei padeih ngak bruk saong dom janih pandap pasang iek oh ginup, ba tal doanh nghiep gaok kan kandah pablei tabiak negar langiu. Ban Cần Thơ urak ini hu labaih 13.000 ha taneh pala durian, dalam nan hu labaih 500 ma taka so bhum taneh pala. Tukvak tapa, gah ngak nong brei patui tacei pato urang ngak tui dom tanut chuan pablei tabiak negar langiu, piah khik hu siam kaya mbang saong pasang iek khik caga phun pala. 

Quyen Tong thong saong Chu tich UB An ninh saong Hoa binh Karja  Myanmar Min Aung Hlaing iew taong abih bhap bini jum pataom gauk piah khik bruk palih ruah hu siam, kakei bruk buh phieu sanya saong rik daong brei hu bruk ngak po di bhap bini. Tui nan, brei mboh bruk rajaei ngak siam bruk di drei ka, ba jalan ngak njauk, khik brei bhap bini hu mbaok palih ruak.

Karja Tong thong Donald Trump daok kuhria caga peih praong bruk khik iek catang urang negar langiu tame di thun 2026, kadung jien birau tagok tal yaok rituh ti dola. Kuhria tal ini, hu labaih 622.000 urang patrauk tabiak meng tuk ong Donald Trump tagok ngak. Yau nan min, tapa kuhria di rajaei brei mboh  ralo dom urang njauk chap mek oh ngak hagait jhak, tok tame negar suan hukum, ngak catang tagok bruk karja ngak meluh haong kadha patrauk dom urang duis ha-oh. 

    15 urang metai saong 19 urang karei njauk rambuac dalam sa mbang bala rah tabiak kayua radaih buyt di harei page ini di sa balai mek jien di ban Semarang, tỉnh Trung Java, Indonesia. Urang peih radaih buyt pajeng tuai peih plait tangin radaih nduac catang, ginuh tame paga pacang jalan saong tableih trun. Bruk daong ba urang dalam radaih tabiak kan kayua dom urang gar dalam radaih kayua pacah kareik camin.