Page ini, di Ha Noi peih Nyaom roya Dang bo Rajaei mbang ka I, vaktu 2025 -2030. Tong Bi thu Tô Lâm hu mbaok saong brei panuac tacei pato di Nyaom roya. Vaktu tapa, Dang uy Rajaei pataom tame tacei ba jalan, peih ngak 3 bruk praong, 6 bruk hu makna, 12 nyaom jalan peih ngak tui tacei ba di Sarak Nyaom roya Dang mbang ka XIII saong pataom tame padang ngak, pasiam Dang hacih sa-at, khang kajap, paglong ilamo ngak bruk, prein meriak di dom pakat Dang, urang dang. Patagok bruk ngak mbang kinh te patagok, dang dalam nyaom glong abih di bhum taneh, dunya… Ndem ka bruk chinh tri praong dalam vaktu anak tal, Dang uy Rajaei  kham merat jhul pakhang GDP kuhria 10% sa thun tagok dalam rilo thun.

TPHCM birau peih bruk jak ba “ Bhap bini bac pandar taka so” vaktu 2025 -2026, kham merat 100% bhap bini dalam umo thun praong jeng dam dara saong hu ilamo ka bruk pandar taka so, pandar pandap mac thong minh, duah thau khaw tin saong jit vu taka so. Piah ngak hu bruk nan, bhap bini TPHCM hu kapol kong nghe bhap bini tacei pato dom ung dung hu makna yau “ Bhap bini taka so TPHCM”, VneID, VssID, vi dien tu, bayar oh pandar jien tapak. Tui nan, dom kapol kong nghe so bhap bini hu nao tame “yaok jalan, yaok baoh sang” piah daong bhap bini hu thau pandar saong pandar  kong nghe so.

Po bein tinh Dong Thap tame bilan yuak paik baoh thanh long thun ini. Tuk ini, darak pasar pablei thanh long biak suai, ba tal laik yaom. Thanh long baoh praong janih 1 daok 10.000 dong sa kilo, min biak takik; daok veik lac janih 2, 3 yaom meng 3.000 – 4.000 dong sa kilo, trun jaik meteh dut saong bilan dahlau. Tui dom doanh nghiep, baoh thanh long trun yaom  kayua darak pasar Trung Quoc gaok rilo kan kandah; dalam tuk bilan hajan ribuk darak pasar gah Barak kan pablei…

Piah ngak hu bruk ba Ca Mau jeng pasak ngak tabiak aring praong abih di  ĐBSCL saong dalam negar, tinh Ca Mau ba tabiak bruk ngak tabiak di aring, kham merat: peih praong taneh raong aring tagok labaih 418.000 ha, mek hu labaih 41.800 tấn. Piah ngak hu bruk nan, tinh patagok bruk pandar kong nghe raong rilo kacin saong raong peih praong danao saong pabak pandap mbang,  gam padang dom HTX praong, ngak jeng dom bruk pambuak raong - pablei, paglong raidiuk bhap bini.

Tinh Gia Lai urak ini hu jaik 5.000 mejam kong cieng, 600 kalup kapol ilamo-daoh tamia gam haong kong cieng, pataom yaok ribau urang nghe nhan, urang kumei, dam dara saong anek saih tame bac, khik ramik drap ar ilamo. Tinh hu peih ngak rilo bruk khik ramik ilamo kong cieng gam patagok gah yulit bhap bini, yau dom Festival Kong cieng, danak dak “Kong cieng puac adit”, atau “Ilamo siam gheih – khik ramik kong cieng”, padang veik dom adat cambat, rija roya meng kan, peih tal pato bac ma-in kong cieng ka rairah dam dara, daong ka bhap bini urang bangsa takik hu bruk ngak duah jien tame.

Tong thong My Donald Trump harei ini tagok jalan tapa Israel saong Ai Cập. Brei panuac haong gah harak mbaok  di janao nao, ong Trump ndem meyai ka bruk mesruh  di Gaza padeih blaoh paje. Ong Trump hu kadha bac anak quoc hoi Israel. Hadei di nan Tong thong My  nao tal Ai Cập pambuak haong Tong thong Abdel Fattah al-Sisi po sa nyaom biai pakat glong saong dang akaok di 20 taneh ia piah padeih bruk mesruh metak di Gaza saong padang veik sron mbon di bhum Trung Dong.

Trung Quoc pambuak haong My saong Thai Lan birau  taong tayak bruk pablei salih matuy di tathik praong, chap mek 7 urang saong chap mek jiak 5 tan matuy patau. Mentri Kong an Trung Quoc khan lac, ini lac bruk pablei salih ma tuy praong abih di jalan tathik dalam sa mbang pablei rai di bhum Chau A- Thai Binh Duong dom thun jaik ini, jeng lac bruk hu makna praong dalam bruk pacang matuy di klau gah Trung Quoc, Thai Lan saong Mỹ.

Jabat chuc nang Mexico khan lac takik abih hu 27 urang metai saong rilo urang karei lahik kayua hajan dui atah lavik harei ngak glut jaleih taneh, ia ribuk sua di rilo bang. Tong thong Mexico Claudia Sheinbaum tavak angaok mang xa hoi X lac rajaei daok kham daong bhap bini, kham peih veik dom jalan  mbak daok cakak saong pambuak siam talei gom ndien. Mentri Quoc phong Mexico khan lac  hu labaih 5.400 urang lin hu ba mai dang bruk panduan ba, daong saong ramik./.