Patui Danak dak Mbang nyaom oh bhian ka sa, QH mbang 16, page ini, dom urang lambaok mbaok ginum biai ka bruk pagam 4 danak daka pakat negar jeng sa danak dak pakat negar  ka bruk cakrok patagok ilimo - xa hoi, palei pala, bangsa saong bhum ceik vaktu meng thun 2026 -2035. Dahlau di nan, rilo urang brei mboh bruk pagam 4 danak dak pakat negar  patagok ilimo - xa hoi, palei pala, bangsa saong bhum ceik hu jeng sa danak dak praong piah ngak tui hu kein lagaih, buh jien tame ngak sumu gauk, patagok bruk kuhria caga dahlau saong bruk ngak di bhum palei. Njauk hatai ka bruk khik tamo phun jien kuhria peih ngak Danak dak pakat negar vaktu anak lac 808.000 ti dong.

Rajaei brei ramik pasiam tanut patagok jien daong ngan haong urang ngak bruk cach mang meng 2.789.000 tagok 3.012.000 đồng. Sarak hu ba tabiak jien daong, jien karei ka urang ngak bruk cach mang saong gauk gar urang ngak bruk cach mang; dom bruk daong ka urang ngak bruk cach mang saong bruk daong di gah jabat, kapol nyaom, urang ngak bruk tui sarak daong urang ngak bruk cach mang.

Di Bein bingu Le Thi Rieng, TPHCM, harei kabroi, bol lin ngak bruk hu duah mboh pataom 11 atau talang liet si saong 5 atau kaya di Khu B. Di xa Thường Tân (Bắc Tân Uyên, Bình Dương klak), Bộ Tư lệnh TP.HCM ngak salah bruk duah pataom atau talang liet si var klak rup daong ka taneh ia di dom thun 1968 saong thun 1970.

Labaih 115 trieu laik phone tangin daok pandar, dalam nan hu labaih 102 trieu laik phone hu ba tame tanut chuan, hu urang pandar saong pagam tame VneID. Ini lac du lieu hu makna praong dalam  piah dom gilang paglong bruk ngak  haong tuai damuai meyao meyit saong caga bruk bleik saleih. Mentri Ilimo saong Kong nghe patui pambuak haong dom jabat, pasang iek brei ramik pasiam, langyah catang, gam khik hu du lieu laik phone  “ njauk, ginup, hacih, diuk” njauk urang pandar.

Meng bilan 7 thun 2025 mbiah tal harei 30 bilan 6 thun 2026, TPHCM hu 19 mbang  njauk jru mek dan haong 1.389 urang ruak. Dom mbang jru mek kaya mbang gam ralo urang gam ralo labik. Yau nan ye, piah var mbang huak di sang bac, ong Nguyễn Mạnh Cường, Pho chủ tịch UBND TP.HCM caong khin Sở khik iek kaya mbang pambuak haong Sở Pato megru tacei pato dom sang bac brei palih ruah labik ngak lisei huak ka sang bac brei mek kaya tahaneh mbang di dom labik hu angan je. Pakhang bruk pasang iek yaok mbang jeng yau oh khan dahlau ging tahaneh mbang, can tin sang bac piah samar duah mboh, pasiam dom bruk daok tavak tavaiy, plaik njiak bruk kaya mbang mek ruak .

Mentri Kinh te saong Jien padai Capuchia ba tabiak harak pathau khan trun tanut patagok kinh te Campuchia dalam thun ini daok 4,1%, trun 0,1% dut saong tanut birau ba tabiak jaik ini saong patagok 5% dut saong akaok thun. Bruk nan kayua dom gah ngak nong saong yulit patagok suai jang dalam tuk gaok rilo kan kandah dalam negar saong dunya. 

Tong thong Nga Putin tacei ba rajaei peih ngak danak dak pasiam dom gilang pablei salih khut tayak atau yak klak dalam luac sa bilan mesruh patuh phao siu tame Ucraina. Dahlau di nan, Ucraina peih bruk patuh phao meng kapal haok oh hu manuac peih  tame takik abih lac 24 gilang saong pasak logistics di sa labik pablei kaya online praong abih di negar Nga, ngak ba tal bruk patuh saong apui khuah mbang ngak palai lahik kong ty ini.

Takik abih 21 urang metai saong 4 urang njauk rambuac dalam sa mbang bala trak rah tabiak di jalan peih drah samar di Meraong Brazil. Bala rah tabiak tuk radaih buyt saong sa radaih tai ginuh tame gauk. Taong abih dom urang metai lac tuai ndik radaih  buyt. Tui truyen thong pak ini, sruh radaih buyt lac di Sở Y te ban Imbituva. Urak ini karja ban raya oh ka ndem hagait tal bruk ini./.