Brei panuac ka bruk tacei ba padang ngak danak Hukum kadung jien karja (pagam hasa), Akok Quoc hoi Trần Thanh Mẫn khan lac, danak dak hukum ginum biai langyah dom bruk gar tavak  ka sarak pambuak Hukum Dau tu di Karja, salih birau dom bruk parabha tui pakat, parabha catang dalam tukvak birau; njauk ndem tal bruk pasiam pablak tame dom sarak hu lagaih. Akok Quoc hoi kakei lac, Hukum Kadung jien karja (pagam hasa) mbang ini hu rilo kadha salih birau piah taneh ia cakrok patagok, njauk ndem tal Ban raya HCM saong ban ine Ha Noi.

Danak dak Hadar gilac veik masa tukvak gireik, di Dinh Độc Lập, TPHCM peih pakak page ini 19/8, tapa kong nghe ao, daong bhap bini yau hu diukrai gilac veik “tukvak jaman dahlau” di biar harei 2/9/1945 di Mblang bein Ba Đình, hu pang hu iek Po di Ho Chi Minh bac harak Tuyen ngon Doc lap, padang taneh ia Viet Nam Dan chu Cong hoa. Bruk ini kayua Rayo sap ndem Viet Nam tacei ba ngak. Brei panuac di danak dak, Pho Akok UBND TP.HCM Nguyễn Mạnh Cường khan lac: “ TPHCM iek ini lac sa bruk ngak rik daong ba dom ilimo pambak praong jang, abih di nyu lac dom dam dara, anek saih, sinh vien saong tuai damuai”.

Harei ini,  di Mblang Kapl ahaok Dunya Can Tho peih pakak jalan haok par Cần Thơ - Đà Lạt – Cần Thơ. Jalan ahaok ini piah ngak brei takik abih tukvak  nao mai meng 8 - 10 mon, ba mbuan lagaih ka bhap bini, doanh nghiep saong tuai damuai; tui nan peih praong bruk ngak mbang pablei salih, pambuak bruk buh jien tame ngak mbang saong patagok yulit  di ban Can Tho saong tinh Lam Dong.

Tỉnh Dak Lak birau mbaoh tangin 9 harak pambuak bruk, buh jien tame ngak mbang patagok di baoh durian khik brei khang kajap kuhria abih tih hu jaik 9.000 ti dong. Tapa nan caong khin bruk pambuak, jhul pakhang buh jien tame ngak dom danak dak, dom gah ngak tabiak baoh  durian pak ini. Jalan ngak ini lagaih haong bruk ba tabuak di tinh Dak Lak  lac patagok gah ngak nong kong nghe birau.

Meng ini mbiah tal puac adit, gah Meraong negar hu sa mbang hajan praong di rilo labik. Rilo bhum taneh hu hajan mbiah, hajan praong. Dalam dom mbang hangin khang meda hu jakala klak, hangin khang, mikva brei kuhria caga dahlau. Hajan ralo ngak langik la-ar, mbuan ka anek ruak tamuh njom mbak ka jalan suan yawa di urang praong jeng yau uranaih. Langik hajan ralo, atau pandiak ralo jeng mbuan hu jit ruak pandiak tabiak darah.

Campuchia saong Trung Quốc ngak tabiak QR piah bayar jien tapa negar karei piah pambuak pakhang bruk pandar ilimo ky thuat saong jhul pakhang bruk yulit, pablei salih di dua gah. Bruk bayar jien yau nan hu ba mbuan lagaih ka dom doanh nghiep Campuchia, brei adat ka urang duh ka tuai damuai dunya tapa nen tang bayar jien yau urak ini di Campuchia bo oh abih jien phi.

Mỹ daok jhul pakhang bruk salih sa hukum khik iek glai labiah 20 thun tapa. Hukum nan urak ini pacang jak tak kayau glai, ngak jalan mbak saong mek kaya ka di taneh praong labaih 30%  taong abih taneh Glai pakat negar Mỹ. Bruk atah klak hukum khik iek hu lagaih saong trun apui khuah glai. Kuhria tal harei ini, labaih 3 trieu hecta glai apui mbang glai. Kuhria tal ini, labaih 3 trieu hecta glai apui mbang abih dalam negar.

Hu labaih 3 trieu bhap bini Italia gaok dom mbang pachot pagat atau pagat tapa ba-ar kak jien ndien saong gar khi cuh. Kuhria taong abih jien khat lahik  tagok tal tanut caga dahlau, jaik 650 trieu euro( 752 trieu USD). Njauk caik hatai lac, urang hu bac dai hoc gaok pagat jang dua mbang dut saong tanut kuhria rah tapa dalam negar./.