Du thao pasiam, pabak veik dom asar kadha di Hukum negar daok peih bruk duah thau hatai sahaneng pambak praong dalam bhap bini, tui jalan taom gaok tapak saong tapa ung dung VneID, jeng yau dom blah web karei. Dom urang saong urang jakar Quoc hoi mboh lac, bruk nan meda peih tabiak jalan ngak bruk dak ramik, njol njac bruk ngak di karja, duh ka bruk cakrok patagok taneh ia palei negar. Urak ini Mbang ginum biai daok hu peih tapak angaok Kenh Thoi su VOV1, Rayo sap ndem Viet Nam.   

UBND tinh Dong Nai ba tabiak 9 bruk cambaic laic ngan haong yaok gah, yaok bruk ngak, gam brei ngak dahlau piah patagok kinh te hu dua taka so. Dalam nan, tinh brei ngak dahlau bruk brei mesre phun jien ka dom ngak mbang pablei salih, dom gah ngak brei patagok kinh te; pataom tame pasang iek jien mek tame kadung jien karja; peih praong labik mek jien, pacang bruk dauk kak  je. Tui nan, tinh peih ngak dom bruk, dom labik rivang ma-in yulit yaih khan  thaot binguk, anek manuac Dong Nai.

Nyaom darak Pablei salih dunya Tịnh Biên – An Giang tui kuhria peih tabiak meng harei 19 tal harei 25/5 anak tal, di ban sit Tịnh Biên, tỉnh An Giang. Nyaom darak pasar piah daong lagaih ka dom po ngak mbang pablei salih hu pandap OCOP, pandap duah hu rilo jien di dom bhum palei hu lagaih dalam bruk yaih khan ndap nda, duah urang pambuak bruk ngak mbang, ginum biai, mbaoh harak ngak mbang, ginum biai pambuak bruk peih praong darak pasar dalam negar saong pablei tabiak negar langiu. Tui nan, pakhang bruk pambuak saong paglong pein meriak gauk ka dom kaya ngak tabiak dalam tinh haong dom tinh, ban karei dalam negar.

Meng akaok thun mbiah tal ini, tinh Dak Lak hu 3 sruh jit ruak aih caraoh pabui chau Phi, ba tal 56 drei pabui metai saong am cuh klak. Langiu di nan, 7 sruh jit ruak meruai di athur raong hu 11 drei athau  metai ba nao am cuh klak. Langiu di nan, daok hu  2 urang metai kayua ruak meruai. Anak bruk nan, UBND tinh Dak Lak caong khin dom bhum palei saong so, dom gah samar peih ngak dom jalan pacang caga jit ruak ka athur, manuk ada.

Page harei kabroi di bhum Long Định, phường Long Hưng, quận Ô Môn, TP. Cần Thơ glut jaleih ngak labaih 50 met jalan jaleih tal ar kraong, rilo jalan ra-ai talah. Bruk nan ngak bhap bini rahra daok di labik ini mboh haduh hatai tuk jalan ini birau hu pasiam pakajap harei ini nyu khut jaleih. Thun blaoh, ban Can Tho rah tabiak 27 mbang glut jaleih taneh, 50 baoh sang glut jaleih. Kuhria khat lahik abih tih labaih 15 ti dong.   

Dom harei he langik pandiak glong meng 250C tagok meda rah tabiak di rilo labik di negar Nhat Ban - Japon meng harei ini. Anak bruk langik pandiak meda dui atah, urang jakar Nhat Ban kakei bhap bini brei ngak tui dom jalan pacang caga piah hu lagaih. Hiep hoi Langik tasik Nhat Ban mboh lac meyah daok dalam langik pandiak catang, rup pabhap mbuan pacah ia hauk jang saong la-ar dalam rup. Yau nan ye, mikva brei ngak tui dom jalan piah hu lagiah meng puac bilan 5 ngan haong dom kadha pasram rup pabhap mbuan mbiah.  

Pambuak tal bruk jaleih sang Jabat Kiem toan Karja Thai Lan hadei baoh taneh megei tayun harei 28/3 meng blaoh ngak takik abih 86 urang metai, Cuc Pasang iek dac biet Thai Lan khan lac, tapa ngak bruk haong dom ky su tui iek danak dak, hu 30 urang mboh lac hu manuac mbaoh tangin ja angan je dom urang ini saong pandar ngak oh njauk bruk. Jabat pasang iek duah pataom dom bruk pambak tal saong daok pabak harak gal ho so piah payua ka jabat kong to langyah tui hukum karja.

Canh sat Ấn Độ khan lac takik abih hu 14 urang metai saong 16 urang daok ruak trak harei menyum alak blei tame dauk di bang Punjab, gah Barak taneh ia ini. Bruk nan rah tabiak di melam 12/5 di 5 palei dalam huyen Amritsar, tuk bhap bini hu menyum alak hu hlai methanol nan lac asar jru ngak sup bang meta, barah gan saong metai. Cảnh sát chap mek 9 urang pambuak tal bruk nan saong daok duah thau piah ngak brei cambaic laic bruk ngak tabiak saong pablei alak dauk./.