Patui veik mbang nyaom ka 10, Quoc hoi mbang ka 15, page harei ini, Quoc hoi nyaom biai ka bruk patagok gah pato megru saong sangka prein yava rahra. Du thao Sarak di Quoc hoi ka dom bruk ngak, sarak karei piah ngak Nghi quyet ka 71/2025 di Mentri Chinh tri pataom tame pasiam 6 kapul mbang tui sarak hu makna, dalam nan, kapul sarak lagaih karei, naih gheih ka kapul gru pato saong urang ngak bruk dalam dom labik pato magru; bruk dui pachreih, brei bruk ngak saong patagok urang ngak bruk ilamo glaong dalam bruk pato megru, mek hu rilo panuac ndom meyai di dom urang lambaok vakil. Urang lambaok ong Lê Kim Toàn, kapul tinh Gia Lai ndom lac, brei hu sarak lagaih karei, naih gheih brei ka kapul gru pato saong urang dalam dom labik pato megru glaong abih piah paglaong ilamo urang ngak bruk.

Peih ngak Danak dak “Patagok khang kajap 1 trieu ha hamu padai asar siam saong takik tathuak nerak gam patagok hijao di bhum Taneran kraong Cuu Long”, tinh Vĩnh Long daok kuhria peih praong taneh ngak padai tagok 80.000 hecta dalam thun 2026. Urak ini, dalam tinh hu labaih 30 HTX hu tame danak dak. Tui bruk kuhria, yaok thun meda tagok hu labaih 10.00 ha. Tapa 4 mbang peih ngak, padai yuak hu meng 7 tal 8 tấn sa hecta, kein laba tagok meng 6 tal 8 trieu dong sa hecta. Njauk ndem tal, taong abih padai nan yuak hu doanh nghiep glong hu blei meng 200 tal 300 dong sa kilo.

Harei raya Aring di tinh Ca Mau mbang ka 2 daok rah tabiak saong dui atah tal harei 22/11 anak tal. Danak dak pamaong tal jalan patagok angan je Aring Ca Mau di angaok darak pasar, ngak jeng labik pambuak anit ranam saong peih mbang ngui salih bahrau hadah krah. Ong Phạm Văn Thiều, Phaok Bi thu Tinh uy, Akaok HĐ Bhap bini tinh Ca Mau taong yaom glaong dom bruk raong Hadang – Aring – Ikan pambuak haong ala phun glai dauk dalam ia mbak. Jalan ngak ini ba mai siam lagaih kinh te saong daong pacang khik alam langik karo kajap – bruk siam gheih bo Ca Mau tuk halei jeng khik ramik, patagok.

          Page ini (17/11), hajan praong dui atah pagam ia ribuk sua meng gah angaok kraong tuh trun ngak khut tayak rilo jalan mbak ribaong kraog dom tinh Lâm Đồng - Khánh Hoà saong Dak Lak. Rilo labik bhap bini di bhum biar, dauk dalam ia; dom jalan mbak nao mai dalam xã, pagam dom palei ia tame cakak klaoh oh nao mai hu. Jalan raya 29 tapa xã Sông Hinh, tinh Dak Lak dauk dalam ia. Glut jaleih taneh ralo labik di  jalan ceik Khánh Hoà - Lâm Đồng ngak metai 6 urang. Di tinh Khánh Hòa, ralo labik glut jaleih  ngak gar jalan.

Daok di gah Meraong Negar, kayua kanjah jhak di langik la-an, pambuak haong ia ndik bilan 10 saka ia bulan nan dalam dom harei anak tal di Ban raya Ho Chi Minh mbuan rah tabiak hajan angin, di dalam labik hu hajan gap saong hajan praong, ia ndik tagok glaong abih meng harei 19 tal 21/11 anak tal. Dalam tuk nan, di labik bhum Taneran kraong Cuu Long, urak ini tame puac bilan ia sua, ia tagok di kraong Mekong patrun min jeng daok di tanut glaong. Kayua nan dom bhum yau Ban Can Tho, tinh Vinh Long saong dom labik dhaong biar di pasak tinh Ca Mau rah tabiak veik bruk ia dauk di rilo labik.

Mentri Quoc phong Indonesia pasram labaih 20.000 urang lin ngak bruk khik sron mbuan salamad di Dải Gaza. Indonesia daok dalam dom taneh ia hu Mỹ tacei ba peih ngak bol lin rilo negar tame daong khin siam mekre sron mbuan Di Trung Dong. Indonesia daong ka dua taneh ia, bhian daong ka bruk ngak pahala ka gauk tal Gaza saong oh pambuak haong Israel.

Rajaei Myanmar brei ngak padam bruk bruk chot pagat saong ma-in mbie online lac bruk ngak di negar saong brei patui veik peih ngak rilo bruk catang di tukvak anak tal piah ngak abih patruh bruk suan hukum ini. Tal harei 12/11, kapul chuc nang hu taong tayah 110 baoh sang saong daok taong tayah labaih 500 danak dak karei. Gam haong nan mek kareik saong taong bhat labaih 10.000 urang tame mai daok suan hukum.

Mentri Quoc phong Mỹ birau taong mbang ka 21 tame sa sruh kapal gilai pajeng matuy aphien pablei di tathik Đông Thái Bình Dương. Bruk taong tame birau abih  nan ngak metai abih tih kayua dom bol lin My cuh tame dom gilai pajeng jru aphien matuy tagok 83 urang. Bol lin Mỹ hu pandar rilo kapal ahaok mesruh metak, jamraih par oh hu manuac peih saong kapal  haok taong tayak bruk pajeng ba matuy tame negar Mỹ./.