Peih akaok mbang ginum biai Quoc hoi page ini 28/10, Phó Akok Quoc hoi  Lê Minh Hoan khan lac, dom tinh, ban bhum kreh Negar daok gaok kan kandah kayua ribuk ia sua, raidiuk mikva gaok rilo kan kandah. Pho akaok Quoc hoi khan lac: Quoc hoi payua panuac tangin sua, klak rabha tal bhap bini dom bhum palei gaok ribuk ia sua. Dahlau di nan, Pho Thu tuong Trần Hồng Hà jeng hu payua Harak tacei ba dom mentri, karja pataom tame daong samar chip saong ramik pasiam hadei ribuk ia sua di bhum Trung Bộ. Urak ini, gah bol lin Quan khu 5 hu padang sơ chi huy daong bruk, daong dalam hajan, panduan ba labaih 1.000 baoh sang nao labik tani tanat.

Di Bhum taneran kraong Cuu Long, ia ribuk tagok glong dalam thun ini. Ia kuhria mboh di dom balai sumu tanut pakat 2. Ia ribuk tagok glong ngak talah ar pacang, ba tal yaok rituh hecta padai, phun mbang baoh do dom xã  Trường Xuân, Phương Thịnh (tỉnh Đồng Tháp) dauk, ngak lahik yaok ti dong di urang ngak nong. Urak ini, rilo ar pacang dak veik brei ngak kajap piah pacang ia sre, meyah ia ndik tagok glong gam hajan praong, dom ar pacang nan meda talah tuk halei oh thau.

Meng akaok thun mbiah tal ini, dalam tinh Vinh Long rah tabiak 135 labik glut jaleih kuhria atah abih tih labaih 7,6 km, ngak kan kandah tal labaih 520 baoh sang, kuhria khat lahik jaik 25 ti dong. Ta-eng Cồn Thanh Long, xã Quới Thiện, ia ndik ngak talah 15 met ar ribaong, talah labaih 500 met ar labik karei, ngak khat lahik 15 hecta phun mbang baoh saong 6 baoh sang rahra. Ong Trần Văn Lâu - Bí thư Tỉnh ủy Vĩnh Long mboh lac, karja meda oh luai ka bhap bini gaok kan kandah.

Yaom lac, hajan padeih meng melam kabroi mon ia meng gah angaok kraong daok tuh trun, rilo labik gah ia harei tagok, tinh Lâm Đồng page ini daok dauk dalam ia. Di xa Lương Sơn, ia tuh trun samar ba tal ia kraong Lũy  tagok glong ngak ka rilo labik daok di bhap bini saong taneh  pala njam patam di mikva dauk trak. Njauk ndem tal, jalan raya 1A tapa tatua Ong Vạt, ia sre tapa jalan radaih nao mai oh hu. Dom sang bac di xã Lương Sơn brei ka anek saih padeih bac piah  khik brei salamat.

Urak ini, ban Cần Thơ hu 895 kaya OCOP di 449 po kaya nong. Hadei tuk pagam tame, piah daong ka dom urang, HTX hu kaya OCOP patagok siam lagaih, dom Sở, gah chuc nang pakhang bruk pachreih urang ngak mbang pablei salih, peih praong darak pasar pablei kaya OCOP. Gam daong dom po kaya OCOP pandar kong nghe so tame bruk ngak mbang pablei salih, yaih khan angan kaya saong pambuak darak pasar pablei tapa dom blah website dien tu…

Rajaei Thai Lan duah thau bruk pacang caga saong pagui mek kol pachot pagat tapa mang online lac brei ngak dahlau dalam negar. Meng akaok bilan 10 mbiah tal ini, Thái Lan pagui mek kol pachot pagat online, chap mek 73 urang saong mek veik drap ar tagok tal labaih 520 trieu Baht sumu labaih 15 trieu USD. Dom jalan pachot pagat kuhria ngak khat lahik labaih 1,4 ti Baht, labaih 40 trieu USD ka bhap bini Thai Lan. Cảnh sát Patao Thái Lan daok taduan yaok harei labaih 1.000 harak pathau khan di bhap bini.

Philippines brei ngak dahlau keik laba di ASEAN jang danak dak ngak bruk sarak ka drei tuk taduan Dang akaok ASEAN di thun 2026. Ngoại trưởng Philippines Lazaro mboh lac bruk sanya di Philippines dalam bruk pambuak saong ndem meyai nao mai, tui nan khan lac Manila kham merat patui bruk jhul pakhang Dom kadha daok dang haong gauk di tathik Bien Dong (COC) padeih meng lavik mai, piah bruk meblah gauk di tathik hu langyah dalam sron mbon salamat.

Nhật Bản daok khan brei thau ka bruk pagau pagui kaik manuac. Kuhria dalam bilan 10 hu 64 mbang, rilo bruk tame tal labik daok di bhap bini. Dalam nan, kaya mbang saong kaya nong lac bruk ngak ka pagau mai dalam 33 mbang. Dom urang ilamo kakei bhap bini di labik hu pagau njauk brei caga dahlau, takik nao tabak nao takai di tuk subuh page atau melam./.