Hadei 3 bilan peih ngak, 134 jalan radaih buyt oh mek jien di Ban raya HCM hu pajeng ba labaih 30 trieu mbang tuai damuai. Daok harei 1/10, tuk danak dak yam tame tukvak 2, hu jaik 450.000 mbang tuai damuai nduac radaih. Piah khik kajap bruk duh bruk, Pasak Pasang iek jalan mbak rahra pambuak haong dom labik pajeng ba tacei ba tuai damuai ngak tantu lagaih, samar drah; gam haong nan tui iek bruk pandar, dil samu langyah dom asal kadha karei piah paglaong bruk duh bruk.

Jaik 118 ti dong jien bayar, daong hu bayar ka 58 baoh sang di xa Phước Sơn, TP. Đồng Nai (tỉnh Bình Phước klak), piah jhul pakhang bruk peih taneh ka danak dak praong Bauxite. Danak dak ba tame pandar, palih ruak quặng  Bauxite Bình Phước kuhria phun jien tagok tala 22.780 ti dong, ngak bruk dalam 30 thun. Ta-eng xã Phước Sơn, danak dak  ngak kan kandah tal labaih 3000 baoh sang. Dalam thun ini, karja palei ini hu jao brei mek veik 1.009 mblang taneh hu taneh praong 760 ha piah padang ngak.

Tinh Vinh Long kham merat tal puac thun ini hu takik abih 30 xa, phuong mek hu tanut “oh jru aphil”, tapa nan dak harei dak padang labik salamat, siam mekre, daong khik kajap an ninh siam mekre meng di labik. Bruk padang “xa, phuong oh hu jru aphil” oh tok piah pacang cakak saong kanjah jhak jru aphil blaoh daok pamaong tal bruk ngak jeng bruk salih jalan sahaneng tal bruk ngak di rahra. Dalam 9 bilan tapa, kapul Kong an hu duah mboh, mek kareik 467 mbang ngan haong 971 urang.

Di Bein bingu rup patau Nguyễn Trung Trực, 80 blah thaok binguk praong ka bhum taphia negar, kaoh pulao tathik Viet Nam yaih khan tal bhap bini An Giang  tapa bruk pathau khan  bhum taphia negar, kaoh pulao tathik. Dom kadha pataom tame yaih khan labik, bruk ngak di labik taphia negar, kaoh pulao Viet Nam; thaik binguk urang jakar, urang lin  khik caga bruk ngak po tathik, kaoh pulao;  bhap bini tabiak tathik  ngak mbang; patagok kinh te tathik pambuak haong bruk khik iek kaya alam moi truong saong pandar khik kajap bruk ngak mbang di tathik. Bruk parang iek ba khaw tin pathau khan tal  bhum jaik tapen negar, tathik  tal dom bhap bini rahra di tinh.

Pasak Daong, Khik ramik saong Patagok Sinh vat, Mbang Pasang iek bein pakat Negar Kon Ka Kinh, tinh Gia Lai bahrau palao veik 31 athur dalam glai hadei mbang daong ka langik ceik glai. Ini lac dom ca the hu daong, sangka, pasiam prein yava saong hu taong yaom khik kajap prein diuk bebas dalam labik ceik glai. Bruk ba dom ca the athur glai gilac mai glai daong pasiam, khik tani tanat saong paatagok quan the dom janih athur, gam haong nan daong duh bruk khik ramik bruk khik parilo sinh hoc.

Meng harei 1 bilan 10, Campuchia pakauk ma-in mbia saong pakacah gauk online dalam negar, dalam saong gah langiu dom casino. Tukvak tapa, jabat chuc nang Campuchia mboh hu dom casino hu pambuak tal atau pabak labik ngak bruk online. 18 casino mek veik harak gal, 9 casino karei brei padeih ngak bruk piah pasang iek. Bruk pakauk ma-in mbia saong cá cược  online  hu Campuchia  iek yau jalan pacang khik kol dius pandar kong nghe  pagat.

Urang tuai blei pandar Japon brei patui veik gaok sa mbang tagok yaom bahrau meng bilan 10, dalam bruk dong yen laman saong jien ka kaya tamo, kadung gam haong rilo jitvu njauk hu tagok. Yaom labaih 3.000 ndap nda kaya mbang haong sa mbang tagok yaom dalam bilan anak tal, hadei tuk patrun jaik 5.000 kaya kan hu tagok yaom dalam bilan 9. Kuhria di thun ini, labaih 20.000 kaya saong ia menyum di Japon hu atau kuhria tagok yaom.

Tong thong Hàn Quốc Lee Jae Myung kakei dahlau ka taneh ia ini ngak tui “dom jalan pabak” ngan haong Ucraina  meyah oh taduan bruk ginum biai pambuak tal 2 urang lin Trieu Tien chap khik saong oh likau ma-ah cambaic laic. Tong thong Han Quoc khan lac  “ biak damen” anak dom panuac di Ucraina pambuak tal bruk mesruh metak di Trieu Tien saong Han Quoc ndem meyai lac dom panuac nan yau pahreih urang mesruh metak.