Rajaei birau patabiak Sarak ka 66/2025/NĐ-CP ba tabiak sarak ka adei sit ba payua di sang uranaih, anek saih, urang bac di bhum urang bangsa takik saong bhum ceik, bhum taneran,  bhum tapen tasik saong kaoh pulao saong dom sang bac uranaih sit, anek saih hu taduan mbang tui sarak nan. Dalam nan, anek saih bangsa takik bac daok veik luac harei hu daong 15 kilo brah sa bilan saong hu mbang tui dalam 9 bilan.  Ta-eng anek saih daok veik bac luac harei  tal bac 1 lac urang bangsa takik hu bac sap Viet dahlau tuk tame bac danak dak tal bac 1 ye hu pabak brei sa bilan tra tui dom bruk ba tabiak angaok nan.

Melam kabroi, tỉnh Kon Tum peih ngak dalam prong prang bruk Pahadar 50 thun Harei peih paha tinh ini lac (16/3/1975 - 16/3/2025). Harei 16/3/1975, taong abih dom gah bol lin di tinh Kon Tum gam haong Sư đoàn 968 taong tame mek veik, ngak po di dom labik bol lin, chinh tri praong, peih paha taong abih ban sit Kon Tum saong bhum gah Barak Tay Nguyen. Di var pahadar, ong Lê Ngọc Tuấn, Pho Bí thư Tỉnh uỷ, Akok UBND tỉnh Kon Tum mboh lac: Peih paha Kon Tum lac bruk sajarah dakrai praong di Đảng bộ, bol lin saong bhap bini bangsa dalam tinh, rik tame ngak jeng bruk hu makna  praong glong tame bruk ngak brei pasamar  di bruk Mesruh metak  khang di bilan pataih thun 1975 peih paha gah Meraong negar, yasa taneh ia.

Danak dak  “Bhap bini tangi - Karja Ban raya javap calei” harei kabroi, So Noi vu TPHCM khan ka sarak daong palih ruah urang jakar daok labaih daok prein ngak bruk, ilamo  saong caong khin ba drei daong ka ban raya. Tui nan, TPHCM brei palih ruah tame dahlau jaik 7.200 urang jakar, kong chuc, vien chuc daok labaih tame doanh nghiep karja. Ban raya  hu daong padang bruk ngak mbang birau saong  duah bruk ngak  di dom gah, doanh nghiep karei. Kuhria abih tih jien daong jaik 17.000 ti dong, glong abih lac 2,7 ty dong ka sa urang.

Urak ini, urang blei baoh durian di tinh Tien Giang, janih Mongthun yaom meng 115 -130 ribau dong sa kilo, durian Ri6 yaom meng 65 ribau dong tal 85 ribau dong kuhria tui baoh praong sit karei di gauk. Yaom nan bhian trun tagok, tui bruk caong blei di darak pasar. Di xa Tam Bình, huyện Cai Lậy hu labaih 500 baoh gilang khik piah baoh durian pablei min urak ini hu ala 5 gilang peih pambang blei baoh ini min jeng takik blei. Durian lac baoh kayau biak bingi karei, hu pala ralo di tinh Tien Giang labaih 24.000 ha.

          Jalan nao dalam glai pambuak dua tinh Ninh Thuận saong Lâm Đồng hu kuhria abih jien buh tame labaih 1.000 ty dong dak harei dak jaik hu jeng jalan lagaih praong. Danak dak nan rik tame bruk ngak mbang di dom bhum taneh ralo bruk lagaih, ba mbuan mbiah ka bruk cakrok patagok kinh te – xahoi di dua labik ini. Ini lac danak dak jalan pakat III bhum ceik di dalam dom bruk B. Mbaok jalan praong 9m, jalan tuh radaih patau saong betong.

Tong thong Mỹ Donald Trump birau mbaoh sarak hukum jien kadung jien karja anak meta dui tah tal luac bilan 9 thun 2025, abih bruk rajaei lien bang meda padeih meneng ngak bruk hadei tuk kandah gauk khang di Quoc hoi. Camereip hukum ini brei khik kadung jien lien bang hu ba tabiak tuvak Tong thong Joe Biden lac jaik 1.700 ti dola My. Sa dalam dom bruk ngak kamelah guak khang abih lac adat tui hatai brei ramik pasiam kadung jien bo hukum ini hu jao veik ka ong Donald Trump bo oh hu bruk  tui iek tani tanat di Quoc hoi.

Rajaei Indonesia khan ka bruk padang ngak 200 sang bac gam bac gam daok dalam negar piah pabak  ka bruk pato megru bac da-a oh abih jien ka anek saih baoh sang jien duah tame takik. Rajaei  brei bayar abih jien sap janih, jien mbang huak, labik daok , tapuk siphau, kalam mbut, khan ao saong jien bilan ka gru pato. Dom sang bac nan hu brei ka anek saih bac pakat tieu hoc, THCS saong THPT, ngan haong sang bac noi tru hu labaih 1.000 anek saih. Urak ini, Mentri Xa hoi Indonesia daok pambuak  haong dom urang ngak praong di karja piah danak dak ini ngak hu siam.

Rajaei An Do birau ba tabiak bruk padang paga pacang  taong abih jalan tapen negar atah labaih 1.600km haong Myanmar dalam 10 thun anak tal. Danak dak brei ngak tui kong nghe “pacang cakak, pacang ndik tapa” piah khik brei salamat jeng yau pacang urang negar langiu tame suam hukum. Rajaei An Do buh tame 13 trieu USD ka bruk ngak paga pacang saong dom labik ngak bruk ka gah bol lin khik iek labik  bhum taneh taphia negar./.