Thu tuong Phạm Minh Chính bahrau mbaoh tangin daong ka dom bhum palei pasiam kanjah jhak kayua ribuk ka 10 saong dom mbang bala karei meng akaok thun 2025. Dalam nan daong labaih 2.520 ti dong meng kadung jien di trung uong thun 2025 ka 15 bhum palei piah daong ka rahra, pasiam danak dak ar kraong ribaong, danao padang ia, danak dak pacang caga bala, labik ha tang njauk hu, caga tani tanat rahra bhum gaok bala samar chip kayua kanjah jhak di mbang ribuk ka 10 saong dom mbang bala karei meng akaok thun 2025.

Harei 3 bilan 10, HĐND tinh Dong Nai peih mbang nyaom ka 5, HĐND tinh mbang X, vaktu 2021-2026. Mbang nyaom ini, HĐND tinh iek veik, sarak 13 asar kadha  hu makna praong di tinh pambuak gah kinh te - xa hoi, jien padai, bruk quy hoach, jalan mbak, alam moi truong, yau: bayar jien ngak bruk, jien peih nyaom biai di tinh; kuhria tui jien pah taneh ngan haong taneh papah mek jien yaok thun oh tapa meriak yaom, jien pah taneh ngan haong danak dak padang ngak ala taneh…

UB Bhap bini tinh Dong Thap bahrau ba tabiak jalan ngak ka bruk patagok kinh te lek taka so dom gah dalam tinh di thun 2025. Tui nan, tal puac thun ini, tinh ba tabiak tanut tanut ti trong kinh te lek taka so hu 15% GRDP, dalam yaok gah mek hu takik abih 10%. Gam haong nan, 80% rahra meng umo 15 thun ba tagok hu tai khoan bayar jien gilang pariak atau kapul njauk hukum; 80% rahra praong jeng menuac jeng urang hu ngak cambaih laih angan ndien tu VneID saong 50% hu tut angan ta-eng drei.

Nyaom Urang umo taha tinh Dak Lak birau peih bruk “Bilan ngak bruk daong Urang  taha umo Viet Nam” thun 2025. Bilan ngak bruk thun ini pataom tame paglong jalan sahaneng ka urang taha umo, abih di nyu lac dom urang kathaot, urang taha, kan kandah. Tinh Dak Lak urak ini hu jaik 290 ribau urang taha umo. Mbang ini, Mban peih bruk jao brei 30 paok pandap alin ka urang taha umo raidiuk kan kandah, daok jua sa drei dalam tinh.

Tukvak tapa, rilo baoh sang katuak tuk thau anek drei hu harak kham  menek min oh ka hu angan di labik du lieu negar ka rahra. Di Ban raya Ho Chi Minh, tui kuhria di kong an, bruk ini lac labaih 140.000 urang. Ngak cambaih laih hu makna ngak suai tukvak tut angan labik daok ka uranaih, canh sat labik hu mai tal yaok sang, maong bruk halei hu uranaih hu tut angan khan menek blaoh bo oh ka tut angan labik daok ye tacei ba tapak piah rahra ngak harak gar dahlau, blaoh hadei nan ngak harak gar tut angan labik daok di VneID.

Trung Quoc taduan hu jaik 29 trieu harak ho so tut angan daong raong uranaih, dalam nan hu labaih 15 trieu harak gal ho so. Anak dom bruk pachot pagat mek angan jabat karja piah meblah mbang jien daong, dom jabat karja Trung Quoc ba tabiak bruk kakei dahlau samar, dahlau di nan brei mboh cambaic laic dom kein lagaih mini di Alipay, WeChat saong internet jitvu karja dom tinh; bhap bini brei caga dahlau haong dom bruk, pandar app karei atau laik phone iew mai meng negar langiu, juai brei mat khau gilang pariak atau mã taka so brei thau.

 Tong Yam ndok Kapul Y te Dunya brei mboh daong hatai ka salamat di Gaza kayua Tong thong My Donald Trump ba tabiak. Gam haong nan pok meyaom bruk “brei patruh abih dom mesuh metak, palao abih dom urang njauk mek kareik, pambuak veik bruk daong ngak pahla saong pasiam Gaza”. Israel peih bruk mesuh metak hadei tuk kapol Hamas taong tame gah Meraong Israel di harei 7/10/2023, ngak metai 1.200 urang saong mek kareik 251 urang.

Canh sat bang Madhya Pradesh, bhum kreih negar Ấn Độ brei thau hu 11 urang metai saong dom urang lahik hadei radaih pajeng urang laik di tatua trun ia kraong Abna do bhum taneh Khandwa. Tui dom urang jakar, sruh radaih gaok bala hu pajeng 14 urang nao ngak adat palao rup patau po yang. Camereip lac hu sa uranaih likei umo 12 thun payeng anek so, radaih patuh nduac laik tame kraong. Gah bol lin daong bala srong tagok  hu rilo ruptau saong daok duah dom urang lahik./.