Page ini, di Jabat Rajaei, peih nyaom ginum biai Rajaei kadha padang ngak hukum. Brei panuac di var ginum biai, Thu tuong Rajaei caong khin dom Akok mentri, akaok dom jabat bo oh kham ngak siam bruk padang hukum ye brei bac megru iek veik piah ngak siam, kham merat veik dalam bruk ini. Langyah sumu dom kan kandah, tavak tavaiy, paga pacang, ngak bruk cakrok patagok suai; ngak catang, njauk adat hukum, ngak siam dom jalan pacang caga dahlau, duah mboh saong langyah bruk tham nhung, ngak brei cambaic laic bruk ngak di karja, khik iek drap ar kaya  kan, jien mek tame di urang jakar, kong chuc, ja ba prein khang di bhap bini tame ngak bruk.

Tui Trung tuong Mai Hoàng, Yam ndoc Kong an Ban raya Ho Chi Minh, hadei pagam do vi hanh chinh, Kong an Ban raya Ho Chi Minh parilo rajakar ngak bruk di pasang duah kol duis. Bruk njauk uan lac kol duis  dak harei dak trun, bruk co blah  oh daok sraw kadau, bruk tuh thaik son 2 bilan tapa oh daok. Langiu di nan, dom bruk ngak srau kadau di labik pataom rilo manuac, taong paok gauk tuk nao angaok jalan…ba tagok mang xa hoi  hu kong an ngak tathak bruk. 

Urang ngak mbang di tathik di tinh Lam Dong daok tame bilan mek ikan saong dalam dom harei tapa rilo gilai njauk biak rilo ikan nuc daong ka mikva duah hu rilo jien tame. Meng kaok thun mbiah tal ini, Tapen tathik Phan Thiet taduan hu labaih 15.000 tấn  ikan di bhum tathik atah meng 15 tal 20 hai ly. Halau kaya ikan nan daong ka bhap bini hu jien buh tame ngak mbang veik, pachreih urang tabiak tathik ngak mbang.

Urak ini di tinh Dong Thap, urang ngak nong tame yuak padai bilan thu dong. Adit tapa hu hajan ngak kan kandah dalam bruk yuak padai, gam haong yaom trun lap dut haong adit dahlau saong trun biar jang 2.000 dong sa kilo dut haong thun dahlau, ba tal urang ngak nong jien mek tame oh ginup bayar jien ngak. Tui So Ngak nong saong Moi truong tinh Dong Thap, bilan thu dong 2025 dalam tinh trun pajaih hu 115.500 ha, hu 35.600 ha padai daok tathak, yuak hu 3.500ha, yuak hu 6,3 tan sa hecta.

Urang jakar UB Bhap bini xa Vinh Thuan Dong, ban Can Tho pachreih ba saong daong dom baoh sang gaok khat lahik kayua hajan praong di harei 11 bilan 9 meng blaoh. Anak meta , bhum palei daong 3 trieu dong ka baoh sang halei par tabung. Tui nan, kuhria bruk khat lahik piah pok tagok pakat ngaok daong dom baoh sang gaok bala samar tani tanat raidiuk. Dahlau di nan, harei 11/9, xa Vinh Thuan Dong hajan praong gam hangin khang ba tal sa baoh sang jaleih, par tabung 3 baoh sang; khut sa sruh radaih oto, sa sruh radaih moto di mikva pak ini.

Kapol urang jakar di Trieu Tien ngak bruk di Jabat Lien Hop Quoc khan lac bruk Trieu Tien lac taneh ia hu vu khi hat nhan lac “ oh cagar gilac”. Tui nan, ndem puac ka dom kadha iew taneh ia oh hu hat nhan di My nan lac bruk sro tame bruk taneh ia karei. Trieu Tien kakei lac danak dak ngak tabiak ten lua saong hat  nhan bo taneh ia ini daok tui ngak lac “ bruk palih ruah njauk” piah khik caga taneh ia anak dom bruk mbuan ngak jhak mai meng My.   

Meng harei ini bhap bini Nga hu ho chieu pho thong meda tame negar Trung Quoc oh cang hu thi thuc. Sarak thi thuc ngak iek dahlau di Trung Quoc haong bhap bini Nga hu ba tabiak hadei tuk Tong thong Nga Vladimir Putin mai rivang Trung Quoc birau ini. Kapol dom urang ba tuor rivang ma-in taneh ia Nga khan lac, sarak nan meda jhul pakhang tuai Nga mai Trung Quoc tagok 40%. Dalam 6 bilan akaok thun ini hu labaih 1 trieu urang Nga mai Trung Quoc, tagok jaik 30% dut saong thu dahlau.

Tui gah Y te Dunya( WHO) dalam thun 2024 urang ruak aih caraoh di dunya tagok 5% saong dom urang metai tagok 50% dut saong thun 2023. Kuhria labaih 60 taneh ia hu jaik 560.000 mbang urang njom ruak, dalam nan hu labaih 6.000 urang metai. Bruk mesruh taong kalin kan, langik salih karei, bhap bini klak palei nao saong bruk kurang ia hacih pandar, alam moi truong saong ha tang hacih sa-at daok ngak parilo jit ruak ini./.