Rajaei kuhria caga buh tabiak labaih 125.000 ti dong ka danak dak iek glang prein yawa saong rahra, khik brei taong abih bhap bini  hu iek glang prein yaw camereip hu siam. Tui Mentri Y te Đào Hồng Lan, bruk kham merat di danak dak pamong tal prein yawa siam, jalan sahaneng, rup pabhap, umo thun saong raidiuk di bhap bini; taong abih bhap bini rahra hu iek glang, sangka prein yawa camereip. Bruk ngak hu di danak dak lac bhap bini hu ngak harak gal iek ruak dien tu saong prein yawa tui umo tal thun 2030 sumu 100%.

Pachreih tui panuac iew da-a di Kapol Akok UB Trung uong MTTQ Viet Nam, Mban Tuyen giao saong Dan van pakat negar birau alin brei 450 trieu dong rik daong ka bhap bini rahra bhum ia sua. Kuhria tal mon 17h00 harei 25/11, kuhria taong abih jien rik daong tapa Mban jak ba rik daong Pakat negar lac labaih 2.088 ti dong. Ong Cao Xuân Thạo, Urang jakar di Kapol Chủ tịch, Akok mban Ngak bruk xa hoi di UB Trung uong Mat tran negar Viet Nam sanya rik jien daong payua samar abih tal bhap bini dom tinh gaok kan kandah kayua ribuk ia sua.

Mbiah tal ini, khat lahik kayua ribuk ia sua di tinh Gia Lai tal 1.500 ti dong. Dalam nan hu 3 urang metai, 3 urang njauk rambuac; glut jaleih  103 baoh sang, 107 sang par tabung, khut tayak; jaik 21 ribau baoh sang dauk dalam ia. Anak bruk khat lahik ralo saong rah tabiak tuk langik dak harei dak sraw kadau, UBND tinh Gia Lai jeng payua harak iew pataom prein tame pasiam veik hadei ribuk ia sua saong caga bala meng langik dalam tukvak anak tal.

UBND tinh Cà Mau birau jak ba gauk ngak bruk tabung brei salah bruk mek veik taneh ngak Danak dak jalan peih drah samar Cà Mau - Đất Mũi, jalan mbak nao mai tabiak kaoh pulao Hòn Khoai, Cảng Hòn Khoai. Piah ngak hu bruk ba tabiak tal harei 15 bilan 12 anak tal ngak hu salah bruk mek veik taneh, karja bhum palei brei pakhang patau khan, jak ba bhap bini jao veik taneh, samar meyaom dom urang saong kapol nyaom gheih jak ba, ngak njauk tui kadha di hukum karja. 

Xã Cù Lao Giêng, tinh An Giang daok patagok jeng labiak khang gah pablei baoh pa-ok ralo abih  dalam negar. Yau ye HTX GAP Cù Lao Giêng meng akaok thun mbiah tal ini pablei tabiak jaik 1.500 tấn pa-ok tapa dom darak pasar kan pablei yau Hàn Quốc, New Zealand, Úc, Mỹ, Nga saong Trung Quốc. Urak ini, HTX hu labaih 550ha bhum taneh palei pa-ok tui tanut chuan VietGAP saong GlobalGAP. Hadei tuk pagam tame xã Cù Lao Giêng hu jaik 4.200 ha phun mbang baoh, ralo lac pa-ok  tượng kanduh hijao brei paik baoh dua mbang dalam sa thun. Xã urak ini brei hu 35 ma taka so bhum taneh pala pa-ok hu jaik 3.000ha.

Bein bingu ma-in Dunya Bang tuyet Cáp Nhĩ Tân hu padang ngak di ban Cáp Nhĩ Tân, di tỉnh Hắc Long Giang, Đông Bắc Trung Quốc. Labaih 10.000 urang ngak hu pandar labaih 200.000 met khoi băng khik hu 10 bilan piah ngak jeng dom drap ar sarak biak gheih saong danak dak, kayua dom kraong ia nan oh ka khar abih di bilan la-ar thun ini. Lac “ban ia khar” di Trung Quoc, Cáp Nhĩ Tân ngak bilan la-ar suai lavik saong la-ar jeng labik pachreih tuai damuai mai rivang.

Campuchia daok dang anak bruk pachot pagat online saong tapa phone biak ralo njauk brei pacang caga. Dalam labaih 2 bilan jiak ini, Mentri Noi vu Campuchia taduan hu labaih 200 harak khieu nai pambuak tal bruk pachot pagat online saong jien meblah hu tal 800.000 dola My. Urak ini, Rajaei Campuchia daok pakhang dom bruk pato pakai bhap bini khik jien padai online, njauk ndem tal bruk brei ma OTP atau khaw tin di drei ka thei karei tapa phone atau mang xa hoi.

Indonesia paglong bruk kakei ka ceik apui Bur Ni Telong tagok pakat 2 - pakat pathau khan tal pakat 4 di taneh ia ini lac pakat glong abih. Jabat gah taneh riya kakei bhap bini, tuai damuai saong urang ndik ceik juai mai jaik tabung ceik atak 1,5km, plaik njiak dom labik tathuak thak panjiak lưu huỳnh meng taneh tagok saong thak ia./.