Rajaei birau patabiak Sarak ramik pasiam hadei bala ribuk ia sua, pasiam veik bruk ngak mbang pala drak di 9 tinh di bhum Kreh negar kayua ribuk ka 12, 13 saong hajan ia sua bilan 10, 11. Tui nan, Rajaei iew dom mentri, dom gah, karja bhum palei brei daong dahlau khik salamat manuac urang, prein yawa saong tani tanat raidiuk bhap bini; oh caik bhap kurang labik daok, iek lapa, la-ar langaoh. Kham merat ngak brei patagok kinh te hu labaih 8% dalam thun ini. Gilang pariak Sarak karja pok tagok Thu tuong pasang iek brei trun jien laba mesre 2% sa thun ka dom phun jien mesre tui srak karja  di dom bhum palei hu mbang tui sarak daong.

Thanh uy TPHCM birau jao brei 10 ti dong, 500 tan ndap nda daong ka tinh Dak Lak ramik pasiam hadei ribuk ia sua, samar tani tanat radiuk bhap bini. Langiu di nan 50 urang gru jru iek ruak ka mikva  saong dom urang halan hatian tahaneh mbang yaok harei hu 10 ribau paok lisei oh mek jien. Dahlau di nan, Tinh uy Dak Lak hu payua harak thu tal Mban Thuong vu Thanh uy TPHCM thau dhar phol hu bruk daong samar nan, hu daong ka bhap bini bhum ia sua. 

Tỉnh Vĩnh Long daok iew da-a buh jien tame 10 danak dak hu makna praong ngak tabiak nang luong meng ini tal thun 2030, kuhria abih tih labaih 55.250 ti dong; dalam nan, hu 8 sang mac dien hangin, 1 sang mac dien ia harei saong 1 sang mac ngak tabiak Hydro xanh praong, pamong tal pasak nang luong hacih di Bhum taneran kraong Cuu Long. Urang ngak praong di tinh Vĩnh Long sanya daong ba mbuan lagaih ka dom urang buh jien tame ngak mbang. Tỉnh hu tacei pato ba jalan ngak  dom cum kong nghiep hijao, khu cong nghiep hu pandar kong nghe glong ngak meng nang luong, meng nan padang darak pasar pandar dien tani tanat saong suai lavik.

UBND xã Phan Sơn, Lâm Đồng (di huyện Bắc Bình, Bình Thuận dahlau diah) birau  padang ngak 4 baoh sang ka bhap bini bangsa takik kathaot. Phun jien kuhria hu yaom 220 trieu dong hu jak ba  meng bruk rik daong di dom doanh nghiep saong kadung jien Trung uong…Phan Sơn lac xã bhum glong hu rilo bhap bini bangsa takik diuk rai, dalam nan ralo lac bangsa K’ho saong Raglai. Urak ini, dalam xã hu 1.730 baoh sang saong labaih 6.800 urang, raidiuk bhap bini daok rilo kan kandah.

Harei ilamo bangsa Cam mbang VI thun 2025 kuhria peih ngak meng harei 5 tal harei 7 bilan 12 pak di tinh Khánh Hòa. Yau nan min, kayua langik hajan ribuk di ralo labik di tinh Khanh Hoa saong dom tinh bhum Kreh negar ia dauk, khat lahik ka manuac urang saong drap ar, ngak kan kandah tal raidiuk saong bruk ngak tabiak di bhap bini. Yau nan ye, Mentri Ilamo, Padhih the thao saong Yulit brei padeih peih ngak Harei ilamo bangsa Cam saong tal tuk halei hu lagaih ye peih ngak.

Ia ribuk sua di Malaysia daok rah tabiak sraw kadau, urang panduan ba nao labik karei tagok tal 19.200 urang. Karja bang Perlis brei kareik pabah mbang anak meta jaik 10 bala y te kayua ia dauk dalam. Njauk ndem tal, ia di dom kraong praong tagok tal tabung glong. Gah khik caga bol lin Malaysia jak ba 1.200 urang lin saong bhap bini jhul pakhang bruk pasang iek, tui iek ia tagok, samar taong yaom, mbuan ia sre ar piah peih ngak sumu gauk, lagaih dom jalan pacang caga bruk rah tabiak.

Dom bac si Israel di Pasak Y khoa Rabin peih ngak hu jak jeng siam mekre te bao hu bien doi gene, jru ruak ka 3 urang ruak đa u tủy. Đa u tủy lac ruak ung thư tủy talang, labaih 550 urang birau njom ruak yaok thun di Israel. Yaom lac dom palih ruah taong ruak dak harei dak rilo saong umo thun urang ruak hu siam tagok ralo, min hu dom urang oh lagaih haong jalan iek ruak yau urak ini, khin jalan iek ruak birau jang.

Indonesia pacang hu siam virus bai liet tuyp 2, hadei peih bruk klauk jru hu jaik 60 trieu mbang vaccine pabak ka uranaih di dunya. Gah Y te dunya (WHO) khan lac, Indonesia mek hu tanut pacang jit  hadei oh daok virus dalam bhap bini saong gah langiu moi truong. Ini lac sa taneh ia ngak hu siam piah pamong tal dunya oh daok ruak bai liet - ruak pran./.