Rajaei bahrau ba tabiak Sarak 338, adat brei cambaih laih dom kadha ka Hukum Bruk ngak ka sarak daong brei bruk ngak. Dalam nan njauk caik hatai sangka lac dom adat ka bruk brei mesraiy daong brei bruk ngak, khik tani tanat, peih praong bruk ngak. Daok sarak brei mesraiy daong brei bruk ngak, khik tani tanat, daong brei bruk ngak, Sarak brei adat: Ngan haong labik ngak bruk, pablei salih, jien mesraiy rilo abih lac 10 ty dong saong oh tapa 200 trieu dong ka 1 urang ngak bruk hu daong brei bruk ngak, khik tani tanat, peih praong bruk ngak. Ngan haong urang ngak bruk, jien mesraiy rilo abih lac 200 trieu dong. Tukvak brei mesraiy jien rilo abih 120 bilan.

Tui Cuc Yaok kuhria, bruk likei kumei oh sumu gauk di Viet Nam hu kuhria meng thun 2005 mbiah tal ini. Tapa nan yaok kuhria rahra kreh thun 2024 mboh urang likei  umo thun lakhah  rilo urang kumei sa ha thun haong gauk hu labaih 415 ribau urang. Meyah bruk likei rilo jang urang kumei daok rah tabiak ye hadei thun 2034, bruk labaih urang likei atau kurang urang kumei umo thun lakhah (20 -39 thun) daok dak harei dak ralo,thun hadei ralo jang thun dahlau. Tui kuhria tal thun 2049, taneh ia kurang labaih 1,3 trieu urang kumei dalam umo thun lakhah.

Ban raya Ho Chi Minh brei ka UB Bhap bini xa, phuong saong dac khu hu brei padang brei sang daok karei, hu takik abih 3 tal glaong saong sa tal labang. Dom danak dak daok dalam labik ngak kaya, labik ilamo kong nghe glaong kayua gah pasang iek bruk hu brei ngak. So Padang Ban raya Ho Chi Minh ciuk bruk brei harak padang ngan haong dom danak dak daok veik, langiu dom bruk hu rabha pakat. Adat bahrau piah rabha pakat cambaih laih, brei kein lagaih ka rahra, gam haong nan patagok bruk pasang iek siam mekre padang di dalam Ban raya Ho Chi Minh.

Tui bruk kuhria dahlau meng thun 2025- 2030, tinh Vĩnh Long padang ngak yaok pluh danak dak dien hangin, dien ia harei, dien meng kaya nong saong sang mac Hydro xanh, kuhria abih tih phun jien buh tame ngak yaok pluh ti dong, pagol sanya pabak prein khang ka gah kinh te bhum palei. Gam haong nan, kinh te kaya ia nan lac bruk praong patagok kinh te di Vĩnh Long. Dalam tinh urak ini hu labaih 110.000 ha taneh raong pala kaya dalam ia, kuhria rah tapa labaih 650.000 tan yaok thun.

Kapul brei Ky luc Viet Nam bahrau brei harak mbaoh tangin brei ky luc ka thaik cih Bangu caraih dalam danak dak “54 Bangsa Viet Nam” haong angan “Thaih cih mathik sambo bar hu kadha Bangu caraih 54 bangsa Viet Nam hu ngak tapa dom tinh ban kayua anek saih mai meng dom bangsa karei gauk ba drei tame rilo abih”. Danak dak “54 Bangsa Viet Nam” peih ngak di kreh thun 2024 – camreip hu mai meng sahaneng ka jalan pling ragam – pahla pambuak bhap bini, pok glaong ilamo bangsa kayua ca si Phúc Anh peih bruk.

Hang thong tan karja Trieu Tien KCNA khan lac, Urang ngak praong di Trieu Tien Kim Jong Un khan lac taneh ia ini meda ngak tabiak ten lua dalam 5 thun anak tal. Dahlau di nan, ong Kim Jong Un mbaoh tangin dom harak salih birau dom doanh nghiep ngak vu khi praong  piah pok tangok nyaom roya ndang hu makna praong peih ngak di akaok thun 2026, piah ba tabiak patagok ka Trieu Tien dalam 5 thun anak tal.

Patui veik dom kham merat ngak pahla samar chip kayua rahra Gaza gaok kan kandah meng bruk mesuh metak dui atah labaih 2 thun, Kapuk Ia Bilan dalah vang bhong meraih di Ai Cap hu brei veik 6.000 lo ndap nda daong pahla bahrau dalam nan hu yaok ribau tan kaya mbang, jru cavao saong ndap nda njauk hu mai tal Gaza. Langiu di nan, Ai Cap jeng daok kham merat pambuak haong dom gah khik tani tanat bruk padeih mesuh metak di Gaza tukvak 1 saong jhul tagok peih ngak di tukvak 2 di bol lin Israel saong kapul Hamas.

Jabat Khik iek Du lieu urang Hong Kong ( Trung Quoc) iew bhap bini saong sang bac brei caik hatai haong thaot binguk, video uranaih anak bruk mbuan gaok bala kayua kong nghe deepfake. Urang ngak amaik ame kakei brei kuhria iek tani tanat ba thaot binguk atau video anek tagok mang, iek pagam caik tai khoan mang xa hoi ta-eng. Deepfake lac kong nghe tri tue nhan tao ngak mblak  saong salih mbaok meta, sap ndem atau bruk ngak di sa urang tapa thaok binguk, video saong tavak sap di urang nan./.