Page ini, di Pasak Papar sap pakat negar di labik 58 Quán Sứ, Ha Noi, Rayo Sap ndom Viet Nam (VOV) peih harei tabiak tapuk “Rayo Sap ndom Viet Nam - 80 thun daong taneh ia” di bingun pahadar 80 thun harei padang Rayo (7/9/1945-7/9/2025). Ini lac danak dak pataom ngak bruk, glo akaok saong hatai anit ranam bruk ngak di rilo rairah ngak harak mbao papar sap, gam lac panuac payua tal rairah harei hadei. Hu cih vak jaik 500 blah, tapuk pataom tame dom asar kadha brei mboh veik bruk ngak saong hatai truh tapa dom kan kandah dalam 80 thun dak padang, patagok dalam negar - bangsa; Brei mboh bruk daok di rilo rairah urang jakar, urang phong vien, urang ngak ky thuat ngan haong bruk pambuak jalan di Ndang - hatai di rahra; pamong tal bruk patagok dalam jaman lek taka so.

Tỉnh Khánh Hòa birau khan hu 2 danak dak sang daok xa hoi kuhria taong abih phun jien labaih 2.100 ti dong di phuong Phuoc Long saong Vinh Hai, pabak jaik 1.600 baoh sang, pabak bruk caong khin hu labik daok di yaok ribau bhap bini hadei pagam tinh, ban. Dua danak dak ini hu peih ngak sumu gauk jalan mbak, labik caik radaih gah ala sang, phun kayau, jalan nao mai dalam labik sang daok. Tukvak ngak bruk 50 thun, sang padang ngak tal tuk blaoh ba tame daok di quy III thun 2027. Dalam tuk Khanh Hoa - Ninh Thuan birau pagam tame, dom danak dak nan oh lac pabak ka sang daok bo daok khik hu karo kajap urang ngak bruk di tinh ini.

Dom xa labik gah Pur di Ban raya Ho Chi Minh (Ba Ria - Vung Tau dahlau diah) hu 52 po pandap haong 110 ndap nda hu kapul taong yaom ramik dak ndap nda OCOP mbaoh tangin dak 3 saong 4 patuk. Jaik abih dom ndap nda hu rahra thau tal tapa dom kenh yaih khan, pataom darak yaih khan ndap nda. Tui So Ngak nong - Labik Ban raya Ho Chi Minh, labik gah Pur di ban raya hu rilo ndap nda OCOP danei angan, asar siam, ndung bak ilamo di bhum palei saong hu prein meraik gauk di angaok darak pasar.  

Dalam tuk padeih padei Harei bangsa negar 2/9 meng blaoh, tinh Dak Lak taduan raok rilo tuai damuai mai rivang ma-in. Oh lac takik labik padeih padei, homestay di labik jaik tathik hu urang pah abih labaih 80%, ralo tuai nao ta-eng atau baoh sang gam rilo bruk ngak ilamo, nghe thuat daoh tamia hu ngak pamere tuai damuai luac harei melam. Dom labik yulit  paglong ndap nda mac moc, urang ngak bruk, ramik pasiam labik saong ngak birau bruk rivang ma-in piah duh ka tuai damuai hu siam jang.

Tinh Lam Dong raok labaih 590.000 mbang tuai damuai rah rivang, jien mek tame kuhria labaih 700 ty dong. Cong suat aduk bilik dom khach san kuhria rah tapa hu meng 60 tal 70%, dalam nan dom labik padeih padei meng 3 tal 5 patuk mek hu meng 75 tal 85%. Gam haong bruk paglaong bruk ngak dalam bruk duh tuai damuai rah rivang, bingun ini dom bhum palei, dom so, dom gah chuc nang, gah ngak mbang pablei salih di tinh Lam Dong jeng patagok bruk yaih khan ndap nda rah rivang saong brei hu dom laba piah pachreih rah rivang.

Kuhria labaih 1,7 trieu anek saih Campuchia hu mbang tui danak dak yaom 105 trieu USD daok hu Gilang dunya peih ngak, dalam nan hu danak dak pataom tame pabak ka 37.000 gru pato saong padang ngak 900 duk bilik bac birau piah klak ngak bruk tapa prein yau urak ini. Danak dak brei paglong bruk hu daong iek glang saong pato pakai uranaih, padang ngak 60 pasak iek glang uranaih bhap bini. 

Cao uy Lien Hop Quoc ka Urang ti nan (UNHCR) pathau khan brei patrun 1/5 kadung jien dalam thun 2026 kayua “kurang jien padai”, mati ka mesuh metak daok rah tabiak di Sudan saong rilo mbang kan kandah ka bruk siam mekre karei ngak patagok dom urang truh tabiak sang danaok. Jalan ngak ini ngak patakik bruk buh jien tabiak dalam nan hu kareik pabah mbang jabat di Nam Phi meng harei 1/10 anak tal saong patrun 4 ribau bruk ngak. Kuhria dom urang njauk pandar tabiak nao daok labik karei saong urang oh hu negar dalam harak gar mek hu tanut glaong abih lac 136 trieu urang dalam thun anak tal

 Jaik 8 thun hadei tuk Sang megik Islam sajarah dakrai Al Nuri di ban Mosul gaok Kol IS taong  tayak, urang ngak prong di Irac birau brei peih pabah mbang gilac veik labik ini. Sang megik ini hu jeng gilang khik peih pabah mbang ka tuai damuai tame rivang iek, tui nan karja daok pambuak UNESCO ba Sang megik Al Nuri saong Labik Medil meng kan Mosul tame Angan Drap ar Dunya. Tabung bimong Al Hadba mbliang meng abap 14, ngak jeng thaik thaok siam gheih di Mosul./.