Kuhria tal ini ribuk ka 10 saong hajan ribuk tuh tame negar drei ngak 19 urang metai, 13 urang lahik, 8 urang oh thau daok pak hlei, 88 urang njauk rambuac; labaih 100.000 baoh sang par tabung, tayak tayaic; labaih 9.400 ha padai saong njam patam, 1.700 ha danao raong kaya dalam ia khat lahik; rilo jalan mbak, ar kraong ribaong, labik pablei salih khut khat trak. Piah samar ramik pasiam, Thu tuong Rajaei iew dom mentri, karja dom bhum palei  gaok kan kandah daong ka rahra bhap bini ramik pasiam; brei hu labik daok dahlau, daong kaya mbang, ia menyum, oh luai ka urang hlei iek lipa, la-ar, kurang labik daok, kurang khan ao ngui cuh.

Dom harei ini di Bhum taneran kraong Cuu Long hajan gam gam, hajan gah  angaok kraong ralo yau nan ye ia kraong tagok, gam ia ndik ngak jeng ribuk. Tui kuhri meng harei 8 tal 10 bilan 10 meda hu sa mbang ia ribuk, ia tagok glong abih di balai Tân Châu, Châu Đốc tagok meng 0,2 – 0,4m. Mbuan ia ribuk dauk di dom labik dhaong biar di dom tinh An Giang, Đồng Tháp, Ban Cần Thơ. Njauk brei mboh bruk talah ar kraong ribaong, ar kraong mbuan glut jaleih di dom bhum rah tabiak ia dauk.

Harei ini peih Nyaom roya Dang bo tinh Dong Thap mbang I, vaktu 2025 -2030. Ngan haong kadha “ Jum pataom - Dan chu - Njauk ngak- Jalan ngak birau - Patagok”, nyaom roya kham ngak hu jayak dom bruk, jalan ngak ba Dong Thap patagok samar, khang kajap, lac labik rivang sirah hu mekre. Nyaom roya mbang ini, Dong Thap  peih ngak oh hu pandar harak ba-ar dalam Nyaom roya, taong abih harak gal hu ba tagok mac dien tu. Gam haong nan, pandar kong nghe camera piah yaok urang mai taom mbaok, rik tame ngak siam saong ngak brei takik bruk peih ngak.

Meng harei 1/10/2025 dom po radaih oto hu peih tai khoan nao ngaok jalan mbak piah buh jien tame bayar jien jalan mbak oh padeih radaih daok lac ETC. Meyah oh hu tai khoan nao mai angaok jalan mbak oh brei tapa blai ETC. Uak ini dalam negar hu labaih 6 trieu 300 ribau radaih pandar jitvu kak jien tu dong, min bruk peih salih tai khoan nao mai angaok jalan mbak daok biar. Kayua po radaih oh ka thau kadha birau ka tai khoan jalan mbak atau oh ka salih angan po radaih atau radaih di dom po ngak mbang pablei salih tavak tame hukum karja di po doanh nghiep saong urang peih radaih.

UBND tinh An Giang birau padang ngak tatua angak jalan tapen tathik pambuak meng An Bien - Rạch Gía, atau daok tatua tapa tathik Rạch Gía. Danak dak hu 6  jalan radaih kuhria atah labaih 3.500 m. Danak dak tatua ini rik tame khik siam an ninh - quoc phong, peih tabiak jalan ngak mbang di tathik gah Pei negar ka tinh saong lac pambang pambuak bhum taneran kraong Cuu Long.

Toa an Trung cap ban Ôn Châu, tỉnh Chiết Giang, Trung Quốc brei pametai tu hinh 16 urang  di kapol pachot pagat biak kan thau. Kol ini peih dom “ pasak pachot pagat” ngak mbang praong, peih ngak rilo bruk suan hukum karei yau pablei salih matuy, peih bruk mai dam, peih bruk ma-in mbia saong padar phao ndao. Meng thun 2025 tal ini kapol ini pametai takik abih 14 urang, dalam nan hu 10 urang chap mek tame ngak bruk pagat  min duah jalan dauk atau oh ngak tui.

Bruk eng drei sahaneng ngak jhak di Han Quoc jeng bruk ba tal metai ralo abih di Han Quoc, dalam nan nyaom urang 40 thun nan lac ralo. Thun 2024 hu jaik 15 ribau mbang urang metai kayua pametai rup eng. Dom urang ilamo sahaneng bruk ngak mbang kinh te, ndua nong trak bruk sang danaok saong prein yawa lac bruk praong. Dom urang ngak praong kakei lac njauk brei hu dom jalan ngak siam taong abih gah saong khang kajap jang piah caga bruk srau kadau, bruk pametai rup eng jeng bruk metai lahik rilo urang umo thun 40 tagok ralo jang ruak karei.

Thái Lan duah mboh, chap mek hu 28 urang Myanmar tame negar suan hukum hadei sa bala radaih oto. Tui panuac kakei camereip, nyaom urang nan tame negar Thai Lan meng jalan tabak saong gilai. Yaok urang bayar meng 18.000 Baht - 20.000 Baht, sumu 550 USD - 650 USD ka dom urang pablei salih manuac tapa duah bruk ngak di ban ine Bangkok saong dom tinh jaik taphia. Dahlau di nan, harei 16 bilan 9, Thai Lan duah mboh saong chap mek 53 urang Myanmar tame negar suan hukum./.