Jaik 2.200 urang buh phieu di dac khu Thổ Châu, tinh An Giang hu salah blaoh bruk palih ruah urang ka Quoc hoi mbang ka XVI saong urang ka HĐ Bhap bini dom pakat tukvak 2026-2031 dalam harei 8/3. Di dom labik buh phieu khik kajap an ninh siam mekre, salamat jalan mbak ngan haong bruk ba drei tame tacei ba di dom kapul chuc nang, urang dalam Kapul palih ruah daong mikva urang buh phieu hu brei kein lagaih, salamat. Lac bhum taneh kaoh pulao, atah taneh riya labaih 200km jalan tasik, dac khu Thổ Châu, hu brei peih bruk palih ruah aval drah piah khik kajap njauk lagaih haong kein lagaih nao mai, bruk quoc phong, an ninh saong quyen ngak po di urang jakar, bol lin, rahra angaok kaoh pulao.

Di 20 labik buh phieu di dom kaoh pulao palao Dac khu Truong Sa, tinh Khanh Hoa peih bruk palih urang ka Quoc hoi mbang XVI saong urang ka Hoi dong bhap bini dom pakat vaktu 2026 -2031, aval dahlau dalam negar sa adit. Ta-eng  labik buh phieu di kaoh pulao Truong Sa brei peih bruk palih ruah sa harei haong negar. Hadei taong abih bruk hu salah, dom kapol palih ruak hala phieu, tauk tagok saong payua phieu palih ruah blaoh hala phieu saong payua tame taneh  piah jao ka UB palih ruah di Dac khu Truong Sa tui hukum ba tabiak.

Gam haong bruk chreih chrai salam uan urang ka Quoc hoi, dom pakat urang jakar ndoan, ndoan vien, urang sit thun umo dalam ban raya Can Tho hu peih rilo bruk lagaih, hu makna. Naih gheih lac, Thanh ndoan pambuak dom labik peih mbang pakacah cih thaik salam uan harei palih ruah. Daok dom kadha palih ruah hu parang saong brei yai di rilo danak dak chinh tri, labik di rahra. Tapa nan, daong urang ndoan vien, dam dara, urang sit thun umo saong paglaong ilamo, bruk ngak di drei, chreih chrai ba drei tame harei palih ruah.

Ngan haong hatai alin brei darah daong menuac urang, Danak dak haarei Adit Bhong meraih 2026 hu peih tabiak di Ban raya Ho Chi Minh hu dui pachreih 5 ribau urang ba drei tame. Harei raya oh lac bruk alin brei darah bhian yaok thun blaoh daok jeng sa bruk pagun gauk di dom urang hu tung hatai anit ranam, pambak tabiak kadha “Alin brei darah daong menuac urang – Bruk diuk rai di ayut saong dahlak” tal bhap bini, daong pasiam bruk kurang darah dalam bruk daong chip saong taong ruak.

Ar kraong Tiền daok dalam labik puk Tân Quới, xa Tân Long, tinh Dong Thap patui veik rah tabiak glut jaleih taneh, ngak kan kandah tal dom baoh sang rahra. Kapul chuc nang hu daong rahra panduan drap ar saong dom kaya dalam sang tal labik salamat jak ba, pachreih kakaei rahra oh nao tal labik glut jaleih saong patui veik tui iek tani tanat bruk daok rah tabiak. Meyah bruk ini patui veik ngak patagok bruk duh hatai di rahra diuk rai di rah tapen kraong Tiền, jalan jaik tapen gilai gaiy Tân Quới klak.

Di meng harei ini nao, mbang pasram ka mesuh haong gauk hu angan ieu lac “Hala pacang bebas 2026” di bol lin Han Quoc saong bol lin My brei hu peih ngak, hu bruk hu mbaok di 18.000 bol lin, haong dom mbom phao siu, ahaok par mesuh metak. Langiu bruk paglaong prein pambuak bruk mesuh di bol lin 2 negar, “Hala pacang bebas 2026” hu maong yau lac kein lagaih piah srap gap ka bruk brei quyen pato tacei mesuh metak ka bol lin Han Quoc meyah rah tabiak mesuh – sa asal kadha hu makna pambuak bruk bol lin dalam tukvak bahrau di My saong Han Quoc.

Quoc hoi Singapore bahrau brei tapa Hukum Pasang iek Pakao hala saong pakao hala ndien tu ngan haong dom hukum taong bhat catang oh ka tuk halei hu. Tui nan, bruk blei tame suan hukum janih vape hu janih ini meda ciuk duas daok guk meng 3 – 20 thun pagam bruk taong bhat meng 5 tal 15 mbang tasuak ahuei. Abih di nyu nan lac, adat ini daok pandar haong rahra pandar janih pamong tal yang mebang tuk daok di negar langiu piah ngak abih bruk “nao jirah rivang piah ngak ka suk bruk mahu”.

Karja dom bhum palei di Myanmar, hu gam gam peih adat pablei xang menyek ka radaih ta-eng menuac urang tui majam chẵn - lẻ piah tani tanat bruk pabak xang menyek. Tantu lac, radaih hu ralaoh taka chẵn tok hu blei xang menyek dalam harei chẵn, dom radaih hu ralaoh taka lẻ hu blei dalam harei lẻ. Taphia nan yaok radaih ta-eng menuac urang tok hu blei rilo abih 50.000 Kyats (samu haong labaih 23,8 USD) ka yaok mbang pabak xang menyek./.