Rilo labik di Ban raya Ho Chi Minh hu caga biak gheih raok Yang Sinh, dui pachreih rilo rahra saong tuai damuai mai me-in, thaot binguk. Thun ini, dom labik randap yau ye: Nha tho Duc Ba, labik dom pasak pablei salih, tadai kuan saong kuan kophi di pasak ban raya jeng cuk tame drei sa blah ao biak gheih. Tukvak rahra pataom tame rivang me-in, thaot binguk rilo abih lac meng mon 18 tuk ba tagok. Di dom labik bhian rilo urang yau ye Nha tho Duc Ba saong Pasak pablei salih Diamond Plaza, kapol chuc nang hu ramik caga piah dui ba jalan mbak, khik kajap siam mekre, salamat.

Taneh durian di tinh Dong Thap urak ini hu jaik 35.500 ha; dalam nan, 19.000 ha daok brei baoh. Gah ngak nong hu pambuak haong sang bein, gah ngak mbang pablei salih padang bhum pala durian saong hu pabak 350 ma so bhum pala hu labaih 15.000 ha pablei tabiak Trung Quoc, gam haong 111 ma so labik papaok…Tinh Dong Thap hu rilo bruk pathau khan, tacei ba urang ngak nong ngak njauk bruk pala drak, pasiam kandaong Vàng O, Cadimi piah khik tani tanat pablei tabiak gah ndap nda durian.

Gah Kapal ahaok par Vietjet bahrau pathau khan peih praong labik ngak harak gal di Sang ga T1, mblang kapal ahaok par Dunya Tân Sơn Nhất piah paglaong bruk pandar jitvu saong pandar ilamo kong nghe bahrau ka tuai damuai. Tui nan, tuai damuai di dom mbang par Vietjet hu par meng Ban raya Ho Chi Minh nao Thanh Hoa saong Ha Noi brei ngak harak gar di Mblang A, Sang ga T1. Dom mbang par dalam negar karei di Viejet jeng ngak harak gar di Mblang B, Sang ga T1. Gah Ahaok par Vietjet jeng peih ngak majam ralaoh pathau khan saong ramik urang ngak daong di dua mblang piah tacei ba tuai damuai ngak harak gal njauk labik, lagaih saong salamat.

UB Bhap bini tinh Lam Dong bahrau pathau khan mek gilac taong abih taneh hu jao brei, brei pah saong brei salih jalan pandar taneh ngan haong Danak dak Labik Ban medin pablei salih, jirah rivang, padeih padei sinh thai Đại Ninh (Danak dak Sai Gon Đại Ninh) kayua Kong ti Co phan Buh tame – Jirah rivang Sai Gon Đại Ninh ngak po buh jien tame, kayua ngak suan hukum taneh riya. UB Bhap bini tinh Lam Dong pandar po buh jien tame saong dom kapul, menuac urang hu pambuak ngak bruk ngan haong pasang iek drap ar di angaok taneh dalam tukvak brei adat, hadei nan tinh brei ba tabiak dom bruk mek gilac taneh tui adat hukum.

       Tal jaik kreh pandiak harei ini 17/12, langik Ban raya Ho Chi Minh jeng daok ma-om kayua tal ia kakuan kapal, ngak ka meta maong salih maong mboh cambaih laih. Tui du lieu quan trac ka yava langik tuk mon 9 tuk page ini, dhun klik PM2.5 di labik Ban Thu Duc klak hu 92,4 µg/m³, glaong tagok labaih 18,5 mbang tanut chuan Kapul Y te Dunya. Ngan haong tanut ini, yava langik di Ban raya Ho Chi Minh hu kakei caga di tanut “oh siam”, meda kanjah jhak tal prein yava. Rahra hu pachreih kakei brei patakik tabiak jalan di tuk tabung glaong, cuk kaya pabang mbaok halang dhun klik tuk nao mai di langiu jalan saong kareik sir bambang piah takik gaok yava langik dhun.   

Co phieu Tesla bahrau mek hu tanut glaong abih dalam jaik sa thun tapa hadei tuk gah ngak radaih ndien di My ini brei thau lac daok ngak iek radaih taxi ta-eng peih nduac salamat di kik tuai damuai gah anak. Bruk ini hu brei mboh sa bruk patagok pamaong tal bruk ta-eng peih nduac radaih taong abih. Yam ndok dui ba Tesla Elon Musk brei thau bruk peih nduac iek dahlau radaih taxi ta-eng peih nduac oh hu urang daok dalam radaih daok hu peih ngak.

Trung Quoc hu brei bruk peih nduac ka dua thaik thaot radaih ndien hu caga bruk ta-eng peih nduac pakat 3, brei mboh mbang akaok meti negar ini brei ka dom radaih ta-eng hu peih nduac di jalan mbak. Dua radaih sedan ndien ta-eng peih nduac hu brei nduac di angaok jalan mbak mbang ini lac radaih Trường An meda hu ta-eng peih nduac di angaok jalan nduac hu 50 km/h dalam tuk gar jalan saong radaih Arcfox hu brei ta-eng peih nduac hu nduac 80 km/ha di dom jalan peih samar saong jalan ban medin hu brei nduac di Bac Kinh.

Yaok thun, labaih meteh trieu uranaih di grauk dunya vak harak saong payua tal buu ndien di ong taha Noel. Tabung glaong, bruk ini meda tagok tal labaih 30.000 hala harak yaok harei. Tal ini, palei atah ma-om bak tuyet di Lapland, Phần Lan, bhum palei di ong taha Noel taduan hu harak meng jaik 200 negar saong bhum negar dalam dunya. Buu ndien di palei pandar anek inem Vòng Bắc Cực hu thaik ong taha Noel saong anek rasa danei angan…