Tui Mentri Padang ngak, urak ini dom danak dak jalan peih samar hu jalan ngak salah blaoh dalam thun ini piah ngak hu 3.000 km hu patagok samar bruk ngak dalam 6 bilan akaok thun ini yau ye: jalan peih samar Barak – Maraong gah pur; Danak dak banah 2 Bien Hoa – Vung Tau; Vanh dai 3 Ban raya Ho Chi Minh, danak dak banah 3 Khanh Hoa – Buon Ma Thuot. Abih di nyu nan lac dom danak dak banah 1 di Bien Hoa – Vung Tau jeng sanya salah blaoh jalan hu peih nduac rilo dalam thun ini. Bruk padang ngak salah blaoh 3.000km jalan peih samar dalam thun ini biak hu makna, ngak siam lagaih Sarak Nyaom roya mbang ka XIII di Ndang.

Dalam 5 thun jaik di ini, Kadung jien bayar dhal phol Trung uong jak ba hu jaik 26,4 ty dong, Kadung jien bayar dhal phol dom puk palei jak ba hu labaih 2.360 ty dong. Tapa Kadung jien Ba-yar dhal phol, mai meng dom bruk ngak hu mboh di meta, dom bruk ngak brei thau pren yava rik daong di dom urang liệt sĩ, kabo liệt sĩ hu pasiam veik; urang buh rilo pren yava ka cách mạng hu daong padang ngak sang anit ranam, pasiam veik sang danaok; bruk nao rivang, daong  ba urang buh rilo pren yava ka cách mạng jeng hu piah ngaok biak tani tanat, samar drah, ginup abih. (VOV) 

Tui Mban pato tacei pasang iek Gah ngak nong – palei pala thun 2025 di Ba Ria – Vung Tau (klak), urak ini bruk pasang duah thau hu salah blaoh, bruk kuhria hu brei hu khan brei thau dalam bilan 3/2026. Di xa Long Hải (ban sit Long Hải klak) tal ini, bruk pabak khau tin pasang duah thau mek hu labaih 100% jalan ngak. Ong Trần Quốc Thái, urang pasang duah thau daok di puk palei Hải Vân, xa Long Hải, brei thau, mbang pasang duah thau taong abih di thun ini hu cih tabiak jalan ngak hu rilo bruk bahrau jang dut haong thun 2016, pabak khau tin hu pambak tabiak grauk labik jang.

Ban raya Ho Chi Minh bahrau khan brei thau 35 jalan radaih buyt daong yaom, 27 jalan pandar radaih điện siam ka langik tasik taneh riya. Bruk ini daong ka bhap bani hu rilo jang palih ruah janih radaih bo drei caong khin, ngak padam trun nerak tachauk, njom nerak sap run thring. Dom jalan radaih buyt ini hu ba tame pandar meng harei ini 1/8. Abih di nyu, dom jalan radaih buyt oh mek jien harak ka uranaih glaong ala 1,3m, urang jaoh jo,  thuong binh, benh binh, urang taha prong thun. Hadei di ba pataom, Ban raya urak ini hu 164 jalan radaih buyt, dalam nan hu 108 tuyến daong yaom ngan haong labaih 2.300 sruh radaih daok peih nduac. (VOV) 

Kong an tinh Dong Nai pambuak haong UB Bhap bini xa ĐỊnh Quán (huyen Định Quán dahlau daih), peih bruk pasang iek baoh sang ngak mbang pablei salih “NGHĨA” di puk palei Hòa Đồng. Labik ini kayua ong Nguyễn Huỳnh Nghĩa (umo 50 thun) ngak bruk rak menyek meng dom janih kaosu, katak nerak. Di tukvak pasang iek, po sang ngak mbang pablei salih hu 6 ging rak menyek hu ngak 5 tan/harei, dalam bruk ngak mbang, labik hu tathuak dhun mun saong menyek tathuak meng ging rak menyak tabiak alam langik. Urak ini kapul chuc nang pasang iek cambaih laih, taong bhat tui adat di hukum.

Raja-ei Han Quoc hu brei adat ka bhap bani negar ini nao mai haong bhap bani Trieu Tien bo oh njauk pakuak hagait, min njauk khan brei thau dahlau ka dom bruk taom gaok. Dom adat hukum ini hu pandar blaoh piah ngak jeng kadha piah pacang cakak dom bruk pambuak nao mai di urang Han Quoc saong Trieu Tien urak ini yau oh daok hu brei ngak. Kuhria meng harei tagok rai, Tong thong Hàn Quốc Lee Jae-Myung hu peih ngak rilo jalan ngak piah patrun pandiak gah bol lin saong pambuak pagam gilac bruk ginum biai nao mai haong Trieu Tien. (TTXVN) 

Dom urang metai kayua hajan ia sua di ban ine Bac Kinh di Trung Quoc hu tagok 44 urang, jeng daok 9 urang lahik oh ka duah mboh. Kuhria meng akaok bilan 6, hajan di Bac Kinh hu rilo jang 75% dut haong tukvak ini thun dahlau. Hajan praong dui atah tal 7 harei ngak ia sua, gam haong ia meng halau angaok tuh mai ngak khat lahik khut tayah biak praong ka ban ine. Ia sua ngak kan kandah tal 300.000 urang saong ngak khut tayah 24.000 baoh sang.

Mbang pandiak bhang biak catang oh ka mboh daok me-om, daok pambak praong di Japon, ngak ka yaok rituh labik pandiak glaong labaih 35 doC, abih di nyu lac harei 30/7, Japon cih vak hu tanut pandiak glaong di abih ngan haong 41,2 doC, ini lac tanut glaong abih meng dahlau mai. Pandiak bhang tua riya dui atah daok ngak ka Japon tabiak harak kakei dahlau mebuk pandiak di grauk labik dalam negar. Tui dom urang ilamu, bruk pandiak bhang tua riya dui atah ini nan lac hệ quả tapak di kadha salih bahrau di langik tasik.  (VTV)