Patui danak dak Mbang nyaom ka 10, harei ini - lac Harei Gru pato di Viet Nam harei 20/11, Quoc hoi ginum biai klau danak dak gah pato megru saong Du thao Sarak ka dom jalan ngak, sarak dac thu piah peih ngak Sarak 71. Brei mboh cambaic laic  Sarak 71, Du thao Sarak rak di Quoc hoi brei daong ka gru pato tui dom tanut yau ini: 70% ka gru pato mam non, pho thong saong trung hoc bac bruk ngak; 30% urang ngak bruk di sang bac saong 100% ka gru pato uranaih jaoh jo, sang bac chuyen biet saong bhum biak kan kandah. Sarak nan hu rilo urang Quoc hoi taong yaom biak samar, brei iek praong dom bruk kham merat di dom gru pato.

Melam 19 bilan 11, TPHCM meyaom 50 gru pato naih gheih rik daong tame bruk salih birau saong patagok gah pato megru ban raya 50 thun tapa. Muk Trần Thị Diệu Thuý, Pho Akok  UBND TP.HCM khan lac, bruk meyaom oh lac brei mboh bruk thau dhar phol ka dom, bruk rik daong biak praong di dom gru pato bo daok lac panuac payua tal dom rairah dam dara ranaih umo: pasang tame bruk abih hatai, diuk rai siam gheih, thau ka bruk ngak, caong khin patagok; jum pataom, sahatung hatian, daong padang TPHCM patagok; nao dahlau dalam negar tame jalam birau – jaman pok drei patagok di bangsa.

Nyaom biai Urang jakar akaok sang bac ASEAN+3 mbang ka 7 birau hu peih ngak di Sang bac Đại học Cần Thơ hu mbaok di dom urang ngak praong di dom sang bac dai hoc dom taneh ia ASEAN gam haong klau taneh ia Nhat Ban, Hàn Quốc saongTrung Quốc. Nyaom  biai piah ka dom urang jakar akaok sang bac hu megru ka jalan ngak, bruk ngak atah dhua suai lavik, klah rabha dom ilamo khik iek bruk bac dai hoc, tacei pato patagok bruk bac ndai hoc dalam samar tame dunya saong salih pandar taka so. GS.TS Nguyễn Thanh Phương, Akok Hoi dong Sang bac Đại học Cần Thơ ndem lac cambaic laic jang angan je ka bruk bac megru saong pambuak haong dunya dak harei dak patagok di gah pato megru Viet Nam.

Kuhria tal melam harei 19 bilan 11, kayua ia ribuk sua biak praong, tok sa harei melam, di tinh Gia Lai hu 3 urang metai, labaih 10.400 baoh sang hu jaik 42.600 urang gaok ia dauk, pacang cakak; yaok pluh xã, phuong dauk dalam ia. Hajan ribuk ngak dauk tal 2,5 met, hu labik ia tagok glong meng 3-4 met. Anak ribuk ia sua praong dut haong dom thun dahlau, Akok UB bhap bini tinh Gia Lai Phạm Anh Tuấn iew gah kong an, bol lin saong taong abih karja bhum palei brei ramik panduan ba bhap bini nao labik salamat.

Ia ndik di rilo kraong ribaong meng ban Hue tal Khánh Hòa saong bhum Tây Nguyên daok dang di tanut glong saong rah tabiak sraw kadau. Anak dom bruk bala rah tabiak kan thau dahlau, Pasak Kuhria iek langik tathik Pakat negar hu kakei ka bala rah tabiak pakat 4 do tinh Dak Lak. Ini lac pakat caga bala biak trak tuk labik ini rah tabiak rilo bruk yau: ribuk ia sua saong glut jaleih taneh, meda ngak khat lahik trak tal manuac, drap ar saong dom danak dak karei.

Harei kabroi, radaih Ong Taha Tuyết di  Nga tagok jalan meng Vladivostok nao labaih 20.000 km saong ba tui dom chreih chrai bui sambai Noel  tal labaih 70 ban raya di Nga. Radaih hu ngak meng dom kaya kan Noel biak mekre, biak lai la-ar, pachrei hatai urang duah thau. Uranaih hu taom gaok Ong Taha Tuyết saong dom urang dalam dalikan, hu ma-in saong taduan kaya alin. Langiu di nan, tuai damuai daok hu mbang yaom kaya di bilan Noel, tapa nan caik veik dalam hatai kan si var di radaih Ong taha Tuyet.

Dom bac si di An Do khan lac, yawa langik dak harei dak jhak kayua dhur mur di ban ine New Delhi daok ba tal rilo bruk oh siam ka prei yawa. Dah page harei 19/11, kuhria ka yawa langik  di New Delhi tal 239 nan lac tanut biak jhak. Njauk ndem tal, di dom labik di ban ine hu tal 400 tanut biak jhak ka prein yawa. Sa roh duah thun 2023 brei mboh thak dhur mur di bhum Nam Á meda ngak katut veik umo thun diuk rai di yaok bhap bini tal labaih 5 thun

Sa harak pathau khan di LHQ hu khan gah langiu Nyaom biai pakat glong ka langik COP30 di Belém, Brazil, kakei ka makna praong di taneh riya dalam bruk pacang langik salih karei oh lagaih. Tui harak nan, mbaok taneh khik kandong ralo carbon tal labaih 45% dut saong  kuhria dahlau di nan, min samar jak nao, ba tal thak sang camin praong tathuak tabiak gah langiu. Tui yaok kuhria di LHQ brei daok tagok veik tal labaih 90% di thun 2050 meyah oh hu jalan caga siam./.