Tui kuhria oh ka ginup abih tal page 31.10, hu 24 urang metai saong lahik, jaik 117.000 baoh sang di dom tinh Kreh negar jeng daok dauk dalam, rilo jalan mbak njauk glut jaleih, klaih klaoh, rilo danak dak ha tang njauk khat lahik trak, rilo labik njauk calah klaih klaoh abih; bruk ngak mbang pablei salih saong raidiuk di rahra njauk khut khat trak. Piah daong rahra samar drah tani tanat raiaiuk, Thu tuong ba tabiak harak pandar dom bhum palei gah Kreh negar patui veik peih ngak samu gauk, hu siam lagaih ka jalan pacang caga, samar drah pasiam kanjah jhak di hajan ia sua, samar drah tani tanat raidiuk rahra, pasiam bruk ngak mbamg, pablei salih di bhum Kreh negar.

Dalam dom harei tapa tinh Gia Lai hu hajan praong ngak ka dom jalan glut jaleih, ia dauk. Di xã Vĩnh Thạnh, hu 6 labik glut jaleih, labaih 47 met khoi patau jaleih pacang jalan, mbiah tal tuk ini dom jalan hu peih ka radaih tapa. Di xã Tuy Phước Đông, kayua ia ndik tagok glong meng page harei 30 /10, dom labik ia sre tapa saong rilo sang bac daok dalam ia. Piah khik brei salamat ka anek saih, dalam harei 30 bilan 10, 6 sang bac  hu jaik 2.600 anek saih  brei padeih bac saong panduan ba bhap bini nao tal labik hu salamat plaik njiak khat lahik kaya kan drap ar.

 So Khoa hoc saong Kong nghe Ban raya Ho Chi Minh daok peih nyaom biai bac pasram bruk pasang iek taneh ia dalam gah ilamo khoa hoc, kong nghe, salih bahrau hadah krah saong salih lek taka so ka urang jakar, kong chuc 168 xa, phuong, dac khu. Tapa tal bac pasram brei daong paglaong ilamo, paglaong prein ngak pasang iek saong jhul tagok pandar ilamo kong nghe lek taka so di xa, phuong, dac khu, gam haong nan salah blaoh bruk karja pambuak haong dom pakat karja. Tapa nan, pamaong tal padang kapul urang jakar naih gheih, salih bahrau, jeng sa pasak salih bahrau hadah krah dang akaok dalam negar.

Adit Ilamo - Padhih the thao huu nghi tinh Dong Nai daok peih ngak di Bien Hoa. Bruk ini piah mong iek gilac veik dom bruk ngak hu siam lagaih pambuak tinh Dong Nai saong dom bhum palei jeng yau di dunya piah rik dang pambak praong: “ Dong Nai - Labik mai rivang anit ranam, pambuak talei rohim saong patagok”. Dom harei ini dom jabat langiu rajaei, kapol nyaom negar langiu, doanh nghiep FDI jao brei harak jien daong tani tanat raidiuk jiak 4 ti dong ka dom sang bac, jabat, don vi, bhum palei di Dong Nai.

Tinh Vinh Long bahrau duah mboh veik dua labik jit ruak aih caraoh pabui chau Phi bahrau di puk palei Bến Nố, xa Long Hiệp saong puk palei Rôn, xa Vinh Kim. Yau nan meng akaok thun tal ini, tinh hu 16 labik tamuh jit aih caraoh chau Phi rah tabiak di 32 baoh sang rahra di 15 xa dalam tinh. Anak bruk jit ruak tamuh dak harei dak rilo, gah ngak nong hu pato tacei dom bhum palei kuhria hu bhum tamuh jit, pametai anek ruak, pruh jru di var ro, taong bhat dom bruk pablei salih, pajeng pabui ruak saong pabui metai tabiak.

Harei ini, Nyaom biai pakat glong Ndem meyai Pambuak bruk Kinh te chau A - Thái Bình Dương mbang ka 32 (APEC 32) hu peih ngak di Hàn Quốc ngan haong rilo  bruk hu makna praong. Di Nyaom biai, dom urang ngak praong APEC ndem biai ka rilo bruk samar chip di dunya urak ini  yau bruk pablei salih, pakhang dom bruk dunya, pambuak bruk ngak mbang cakrok patagok saong peih praong bruk pandar kong nghe glong, tri tue nhan tao AI, bruk oh daok thak carbon…

Dalam 9 bilan tapa, Jabat chuc nang Malaysia hu taoh talaih labaih 3.100 kadha vak di angaok dom nen tang xa hoi. Dom kadha ba tagok, rilo meng lac dom kein lagaih pablei salih, buh jien tame ngak ja; brei mesraiy jak; blei pablei saong brei pah kat bayar jien. Dalam sa bruk rah tabiak hu pambuak, dahlau nan, rajaei Malaysia brei srap gap  pandar taong abih dom blah mang xa hoi dinh danh ndien tu urang pandar piah khik kajap oh hu uranaih ala umo 13 thun pandar tai khoan.

Jabat chuc nang Thai Lan tame ngak bruk patuah di sa baoh sang praong di tinh Chiang Mai, chap khik 20 urang Trung Quoc lac pambuak tal bruk pachot pagat tapa dien thoai. Tui panuac di dom urang nan, yaok urang ngak bruk hu bayar jien meng 100.000 - 200.000 Baht sa  bilan (sumu meng 3.000 - 6.000 USD sa bilan). Dom urang pagat tapa pablei Bao hiem umo thun ja atau pagat jien pajeng pandap alin./.