Piah paglaong asar siam ka kaya ngak nong, Mentri Ngak nong saong alam langik ba tabiak danak dak pala drak tukvak thun 2025-2035, piah ba gah ini tame bruk takik tathuak nerak, khik kajap an ninh kaya mbang saong paglaong prein meraik gauk di kaya ngak nong Viet. Tui danak dak, tal thun 2035, gah pala drak di Viet Nam brei rik tame bruk ngak patrun takik abih 15% taong abih tathuak nerak sang kreih camin dut haong 2020. Dalam negar brei ngak jeng takik abih 15 bruk ngak iek dahlau piah patagok tanut carbon, hu ginup kein lagaih piah ba drei tame darak pasar dunya.

Tinh Vinh Long kham merat meng ini tal thun 2030 jeng sa dalam bhum palei ba akaok ngak dahlau di bhum Taneran kraong Cuu Long ka bruk ngak mbang cakrok patagok gah pablei salih online. Piah ngak hu bruk nan, tinh pataom tame ngak siam ha tang taka so. Gam haong nan, da-a urang buh jien tame ngak birau hatang so, brei ngak dahlau kaya hu rilo urang blei, hu angan je di bhum palei di angaok internet.

 UB Bhap bini tinh Dong Nai bahrau pandar ngak catang bruk pasang iek dom labik pato magru mam non saong pho thong thun bac 2025-2026. Dalam nan jalan ngak: khik kajap dom jien mek tame, jien buh tabiak brei ka njauk adat hukum, tantu cambaih laih; gam haong nan ngak catang dom bruk ngak suan hukum, srau kadau. Dom sang bac brei ngak cambaih laih, ngak tantu dom jien mek tame, bruk pandar di sang bac saong angaok website (meyah hu), gam haong nan ngak jeng jalan samar chip taduan dom panuac ndom meyai di amaik ame, piah dil samu langyah.

UB Bhap bini TPHCM njauk hatai ka jalan ngak di Kong ty CP Đô thị Yulit Cần Giờ daong kapal gilai  ngak bruk di tapen kraong Bình Khánh. Tui nan doanh nghiep daong 3 sruh gilai kapal hu prein khang pajang trak 200 tấn pajeng manuac saong pajeng radaih piah patagok prein ngak bruk pajeng di labik kraong Bình Khánh. Kapal gilai Bình Khánh, urak ini lac lagaih pambuak ban raya saong bhum tathik Cần Giờ, daok dak harei dak ngak bruk tapa prein, bhian rah tabiak gar tavak suai lavik, ngak kan kandah tal raidiuk bhap bini saong pacang cakak bruk pablei salih, yulit, jitvu di labik ini.

 Tal ini, ribuk Bualoi saong hajan ia sua, glut jaleih ngak 51 urang metai saong lahik oh ka duah mboh, 139 urang njauk rambuas, 8 urang lahik khau tin piah pambuak. Hu 91 sang jaleih, jaik 145.000 sang njauk khut tayah, papeih pabung, labaih 1.000 sang bac njauk kan kandah, khat lahik. Daok gah ngak nong ye hu labaih 34.000ha padai saong njam patam, jaik 10 ribau ha kaya dalam ia njauk khat lahik. Labaih 60.000 phun hijao njauk jaoh jaleih. Rah tabiak 22 bruk kan kandah ar pacang saong glut jaleih jaik 20.000m ar kraong, ar tasik. Taong abih khat lahik saong jien padai takik abih di dom tinh lac 8.061 ti dong.

Harei ini 1/10, Rajaei lien bang My kareik pambang, hadei Quoc hoi ginum biai oh hu ka hukum daong jien ngak bruk anak meta. Jabat Kadung jien Quoc hoi kuhria mboh dahlau hu labaih 750.000 urang lien bang anak meta brei padeih bruk. Rilo jitvu ngak bruk di karja njauk klaik klaoh, meng bruk brei ngak ho chieu, pasang iek, ngak harak ho so daong raidiuk bhap bini, tal dom danak dak  daong y te.  

Dom urang metai dalam mbang megei tayun taneh 7.0 do ngak megei tayun gah kreh negar Philippines hu tagok tal 26 urang metai, gam haong 147 urang karei njauk rambuas. Dom danak dak daong duah dom urang daok hu jhul samar. Karja tinh Cebu hu ba tagok panuac ieu da-a di angaok Facebook di drei ka bruk jak ba dom urang halan tian gah y te daong pasiam dom khut khat hadei mbang megei tayun taneh.

Dalam panuac tadhau ayuh Harei negar Trung Quoc mbang ka 76, urang ngak praong di Trieu Tien Kim Jong Un khan lac Bình Nhưỡng patui bruk pakajap saong patagok pa,bauk bruk haong Bac Kinh oh lac bruk dunya rah tabiak yau halei. Ong daok lac Bình Nhưỡng tuk halei jeng daong Bac Kinh kham merat jhul pakhang pambuak dua bruk, tapa nan rik tame khik sron mbon salamat saong tani tanat negar drei jeng yau dunya./.