Brei panuac tamat Nyaom biai mbang ka 2 BCH Trung uong Dang mbang XIV di biar harei, Tong Bi thu To Lam  khan brei thau, di nyaom biai mbang ini, Trung uong  njauk hatai biak ralo ngan haong dom bruk hu makna praong di Dang saong taneh ia, njauk ndem tal dom asar kadha  ka bruk ngak, urang jakar saong dom bruk ngak di Đảng. Tui nan, hu 5 bruk piah dom he thong chinh tri brei peih ngak dalam tukvak anak tal, dalam nan bruk dak padang Dang ka chinh tri, jalan sahaneng dalam tukvak birau njauk brei caik hatai, pakhang bruk, pakajap piah paglong bruk bruk ngak, ngak dahlau dalam bruk, kham merat saong paglong ilamo tacei ba jalan di Dang. 

Pahadar 95 thun Harei padang Ndoan Dam dara CSHCM (26/3/1931-26/3/2026), Ban raya Can Tho peih bruk Ginum biai haong urang jakar Ndoan tapa dom rahra dahlau. Di var taom mbaok, dom rairah dam dara biak gheih thau saong iek praong bruk ngak rik daong dom bruk praong di dom rairah dahlau, mbang ini hu meyaom 11 urang doan, dam dara naih gheih di rilo gah. Bingun ini,  Ban ndoan Can Tho hu alin 10 baoh mac vi tinh ka Sang bac tieu hoc Thạnh Xuân, kuhria tui jaik 170 trieu  dong.

Dom harei tapa, langik pandiak dui atah ba tal halau ia di kaoh pulao Hòn Chuối, tỉnh Cà Mau kurang ia. Taduan hu panuac pathau khan di bhap bini dao di labik ini, harei kabroi, Bo Tư lenh Bhum 5 Hai quan peih bruk ba ia taba ka bhap bini oh abih jien. Urang jakar, urang lin Gilai 527 brei pabak labaih 40.000 lit ia ka dom baoh sang rahra di kaoh pulao, tui nan daong brei ia pandar ka rilo bai long be raong ikan saong gilai  di urang nao ngak mbang di labik ini.

          Labaih 550 bhap bini di phuong La Gi và xã Tân Hải, tỉnh Lâm Đồng (bna sit xã La Gi, tỉnh Bình Thuận dahlau) hu mbaok di phien toa ngak yau biak pathau khan ka hukum pacang cakak taong chap ikan suan hukum, oh pathau khan saong oh tui hukum IUU. Di ini, dom hukum pambuak tal bruk taong chap ikan saong bruk pasang iek, langyah hu padang ngak veik, daong ka rahra mbuan thau cambaic laic, mbuan taom gaok saong ngak tui njauk hukum.

Rilo bhum palei di tinh Gia Lai daok tame bilan paik mek asar điều – paok blait thun 2026. Yaom lac asar pa-ok bliat  daok that tagok glong, kuhria tui jien labaih meng 34 -36 trieu dong sa tấn, glong jang  ralo dut saong thun dahlau, min urang pala pa-ok blait biak oh bui hatai kayua takik hu asar, ba tui laba labaih takik. Thun ini pa-ok blait  di bein trun ralo, tok hu labaih 1 tấn asar that sa hecta, sumu meteh dut haong thun dahlau.

Urang brei panuac di Mentri Ngoai giao Trung Quoc Lâm Kiếm harei kabroi kakei lac, Bắc Kinh cagar veik catang bruk My pandat adat taong phat eng, tui nan pajadrah Washington padeih kateik greik Cuba tui rilo rilo jalan.Ong khan lac Trung Quoc  njauk hatai daong ka Cuba patui veik jalan  patagok lagaih haong taneh ia, khik caga bruk ngak po saong an ninh taneh ia, cagar veik bruk meng gah langiu. 

Tong thong Philippines Ferdinand Marcos khan brei thau bruk ngak samar chip ka nang luong taneh ia tapa hukum negar, brei adat ka rajaei ngak samar jang dom bruk mbuan gaok kan kandah kayua bruk mesuh gauk di Trung Dong. Tui hukum, Mentri Nang luong Philippines hu taduan bruk ngak po peih ngak dom bruk piah hu ginup menyek, pacang cakak bruk blei pataom piah pablei tagok yaom, pataom tame  bruk pajeng ba saong oabak menyek.

Karja bhum ban ine New Delhi di Ấn Độ daok pambuak haong Vien Kong nghe Madras peih bruk roh duah kong nghe “ njom dhur mun” piah ngak brei yawa langik hacih. Bruk nan di danak dak duah tabiak jalan ilamo, suai lavik saong patak pataom jien padai, dalam nan bruk do thi samar saong bhap bini. Dom urang ilamo kakei, kong nghe ini oh salih dom bruk ngak njom nerak./.