Nyaom roya Dang bo TPHCM mbang ka I, vaktu 2025 -2030, tamat blaoh saong rilo jak jeng siam mekre. Nyaom roya njauk gauk brei khan pata dom bruk caong ngak bahu, bruk hu makna dalam 5 thun anak tal, dalam nan njauk ndem tal bruk ba TPHCM jeng ban medil ilamo, salih birau, dalam nyaom 100 ban raya di dunya saong hu he sinh thai salih birau hadah krah  dang akaok dunya di thun 2030. TPHCM caong khin hu tame dalam nyaom 100 ban raya siam abih di dunya, njauk sa do thi praong pakat dunya di Dong Nam A, lac pasak ngak mbang kinh te, jien padai, pato megru dang akok bhum  chau A thun 2045. 

Mban Chỉ huy Boll in Biên phòng tỉnh An Giang pambuak haong Tổng Công ty Pasang duah menyek peih nyaom biai pathau khan khik tani tanat, salamat dom danak  menyek di tathik  ka labaih 200 urang nao tathik, po kapal gilai di xa Tây Yên  saong xã Bình An. Di var pathau khan mikva daok thau cambaic laic  makna praong dalam di dom danak dak menyek di tathik, dom bruk ba tal takik siam, takik salamat dalam bruk rivang iek, kuac mek menyek…Mbang ini, Mban peih bruk hu alin brei 10 sruh radaih ka anek saih ka anek bik sang kathaot.

Dom harei tapa, bhap bini xa Long Hải, TPHCM hu dom mbang nao tathik mek hu rilo ikan klic labaih 110 tấn. Kuhria rah tapa yaok urang ngak jien mek tame meng 500.000 tal 2 trieu dong sa mbang nao tabiak tathik. Di labik gilai li-i palei Hải Hà 1, xã Long Hải hu 50 sruh gilai  taong chap ikan tathik jaik, bhap bini daok chreih chrai mek hu rilo kaya kan ia tathik  biak lagaih.

UB bhap bini tinh Vĩnh Long birau khan brei thau samar chip glut jaleih ar tathik  di palei Giồng Bàn, xã Long Vĩnh hu 2 labik glut jaleih atah labaih 410 m saong mbuan daok jaleih veik kuhria abih tih atah labaih 800 met. UB bhap bini tinh Vĩnh Long tacei pato dom don vi pambuak tal bruk peih ngak dom jalan drah samar piah pacang caga saong pasiam veik dom bruk hadei bala rah tabiak. Meng akaok thun mbiah tal ini, dalam tinh Vĩnh Long hu 125 labik glut jaleih  kuhria atah labaih 7 km, kuhria tui jien labaih 24 ti dong.

Meng akok thun mbiah tal ini, hajan ribuk, glut jaleih taneh, ia ndik di tinh Ca Mau rah tabiak kan thau dahlau. Dalam nan, hajan ribuk ngak karam 14 gilai ikan, 7 urang metai saong lahik; hajan gam hangin ngak khut tayak 171 baoh sang; ngak ia dauk saong jaleih jaik 2.000 ha padai He Thu gam rilo  taneh pala nyam patam, phun mbang baoh. Langiu di nan, hu 64 mbang glut jaleih taneh  tapen kraong  atah jaik 1.800 m…Kuhria khat lahik kayua bala meng langik labaih 22 ti dong.

Kuhria meng  harei 1 bilan 10 tuk rajaei My kareik pabah mbang tal ini hu labaih 4.000 urang jakar lien bang lahik bruk ngak. Dom urang jakar brei padeih bruk meblah hasit dalam taong abih urang jakar di rajaei My, tuk dom jabat My pandar labaih 2 trieu urang ngak bruk di akaok vaktu di rajaei Tong thong Donald Trump. Kuhria meng thun 1981, My tapa hu 15 mbang rajaei lien bang kareik pabah mbang ba tal yaok rituh ribau urang brei padeih bruk.

Tui UB Chu thap do dunya, labaih 1.800 urang guk Palestine hu Isarael paeih palao dalam 24 mon harei labroi. Ini lac sa bruk hu ginum biai piah bayar urang hu chap mek di Israel – urang guk Palestine dalam bruk padeih mesruh birau di Israel saong Hamas. Yaok ribau urang hu pataom tame di dom ban pak Israel jeng yau di Dải Gaza piah taduan raok  dom urang hu peih palao  tui hukum padeih cuh saong bayar urang guk di Hamas saong Israel.

Lien minh chau Au (EU) birau khan dom asar kadha birau, ngak catang dom asar kadha tui tanut chuan  salamat ka kaya me-in piah khik prein yawa ka uranaih anak dom jru mek ruak. Tui hukum birau, dom janih jru mbuan ngak ruak brei pakauk atau takik pandar tame ngak kaya me-in. Tui kuhria, hadei hu Nghị vien chau Au mbaoh harak, dom labik ngak tabiak saong blei meng negar langiu tame labaih meng 4 tal 5 thun piah randap ngak tui kadha birau di hukum./.