Pan akaok Mbang nyaom ka 8, tukvak 2021-2026 di Hội đồng pakacah – Pok mayaom Trung ương piah taong yaom dom bruk ngak 6 bilan akaok thun, ba tabiak dom bruk ngak 6 bilan puac thun di dah page ini, Thủ tướng Phạm Minh Chính ieu kakei patui veik jhul khang bruk khau tin, pathau khan, mek dom bruk ngak gheih, klak nao dom bruk jhak, oh lagaih, ngak jeng prein khang piah ka taneh ia pakacah gauk peih ngak hu dom bruk praong bo nyaom roya XIII di Ndang hu ba tabiak, abih di nyu nan lac dalam tuk gaok kan kandah biak praong di jit praong COVID-19. Thủ tướng ieu dom urang dalam Hội đồng, langyah tantu cambaih laih dom hagait ngak hu; dom jalan ngak gheih, siam lagaih; dom kreih camin naih joi,.. piah pok mayaom peih ngak praong, dalam.

Nyaom roya pakacah Quyết thắng tapon nyaom bol pan phao kraong Quân khu 7 vaktu 2019 – 2024 ngan saong kadha “Salih bharau, sahneng duah, jayah” hu peih mbaok tuk mesup ini (12/7). Salam Nyaom roya pakacah Quyết thắng LLVT Quân khu 7 peih mbang pakacah tabung glaong “30 harei malam ngak bruk kiểu mẫu, khang hatai mek hu tabung glaong 3 dang akaok” haong rilo bruk ngak hu makna chính trị, xã hội praong dalam. Tapa nan, hu buh jien tame padang ngak 109 danak dak salam uan saong pasiam labik daok, langik tasik hijao, hacih, mekre haong yaom jien labaih 160 tỷ đồng; dom bruk pakacah gauk pato pasram naih joi, caga mesruh pacang, ngak catang tui kỷ luật, giao lưu ilamu, daoh tamia, pakacah thể thao.

Rajaei bahrau tabiak Sarak ka bruk padang Kadung jien dalam taneh ia ba gauk palahik sang kathaop, sang taik tahak ka dom baoh sang kan kathaot, sang jaik kathaot. Tui pasang iek di dom mintri, dom gah, dom bhum palei, dom baoh sang kathaot, sang jaik kathaot caong hu daong sang daok lac labaih 315.000 baoh sang. Dahlau di nan, Thủ tướng Phạm Minh Chính jeng hu pato tacei: peih ngak siam Danak dak pakacah “ba gauk palahik sang kathaop, sang taik tahak di dom tinh ban”.

Piah khik caga ikan hamu, tỉnh Cà Mau kham merat pathau khan, paglaong akaok sahneng di bhap bini. Jaik abih dom palei hu padang jalan talei pandiak piah taduan panuac khan ka bruk taong cap kaya ikan tui jalan mek abih mbong. Tal urak ini, gah chức năng hu mboh saong langyah 1.225 mbang urang khik piah, ba pandar pandap kích điện piah cap mek ikan, yaom jien taong phạt lac labaih 4 tỉ đồng. Langiu di nan, dom gah chức năng daok hu peih dom mbang pasang iek di dom labik pablei salih, dom darak pasar piah khik iek saong pacang cakak bruk pablei salih ikan anek, ikan sit, ikan meda. 

Hajan khang gam haong hangin ribuk dom harei tapa di dom tinh, ban pak bhum taneran kraong Cửu Long ngak kan kandah tal raidiuk di rahra. Di tỉnh Đồng Tháp, hangin ribuk gam haong hajan khang di xã Phong Hòa, huyện Lai Vung di dah page harei kabroi 11/7 ngak tapar tabung jaik 20 baoh sang saong bein phun mbang baoh jaoh jaleih, tabuac gha. Daok di ban Cần Thơ, hajan khang biak suai rahtabiak di tukvak tabung glaong ngak ka rilo jalan di dalam pasak ban njauk ia dauk dalam. Hajan khang ngak ka rilo jalan di ban Rạch Giá, tỉnh Kiên Giang dauk dalam ia, hu labik ia dauk tal mateh mét.

Tui kuhria mboh di Liên hợp quốc (LHQ), menuac sia dunya meda hu tal 10 tỷ 300 triệu menuac dalam abap ini.  Tui LHQ, tagok rilo menuac sia di dom taneh ia hu rilo menuac abih di dunya yau ye Ấn Độ, Indonesia saong Nigeria meda daong ka abih tih menuac sia dunya tagok jang 2 tỷ 100 triệu menuac dalam 60 thun tal. Langiu di nan, meda hu 9 taneh ia hu menuac tagok jang 2 mbang dalam vaktu meng thun 2024 tal thun 2054, yau ye Angola, Cộng hòa Trung Phi saong CHDC Congo. Dalam tuk nan, menuac sia tagaok tal tabung glaong abih di labaih 60 taneh ia, dalam nan hu Trung Quốc saong Japon.

Gah Y tế dunya (WHO) brei thau lac,  ruak COVID-19 jeng daok ngak brei labaih 1.700 menuac metai yaok adit di mangaok dunya. WHO ieu kakei dom nyaom rahra mbuan njom jit ruak patui veik klauk jru vaccine pacang caga janih ruak ini. WHO hu mboh labaih 7 trieu urang ruak metai kayua COVID-19 di dunya. Jit ruak ini jeng ngak tayah tayaic gah kinh te saong ngak klaih klaoh dom gah y tế.

Thống đốc bang Virginia (Mỹ),  tabiak adat brei takik pandar atau pakauk oh brei pandar phone tangin ngan saong 1 triệu 200 rabau nek saih sang bac di karja. Adat ini piah pacang caga dom bruk gah prein yava tâm thần saong bruk bac ta-a oh siam di anek saih. Dahlau di nan, adat pakauk pandar phone tangin hu Học khu Thống nhất Los Angeles, bang California, ba tabiak ngak di bilan dahlau. Hiệu trưởng Sang bac Công lập ban New York jeng daok pasang iek adat pakauk  pandar phone tangin di labik bac ta-a praong abih di Mỹ ini./.