Harei kabroi 11-11, Ndang uy Mentri Padang ba tabiak bruk mbaoh tangin di Mban thuong vu  Ndang uy Rajaei mbaoh tangin danak dak tatua Rạch Miễu 2 lac danak dak salam uan Nyaom roya Ndang mbo Rajaei mbang ka I, tukvak 2025-2030. Tatua Rạch Miễu 2 pambuak tinh Dong Thap saong tinh Vinh Long hu salah blaoh ba tame ngak di harei 19/8 bahrau blaoh. Danak dak hu atah taong abih jaik 18km, hu 4 jalan radaih co gioi, tukvak ngak 80km dalam sa tuk. Tatua Rạch Miễu 2 salah blaoh hu brei oh daok bruk gar jalan di tatua Rạch Miễu 1, daong ngak salah blaoh majam jalan mbak, khik kajap quoc phong, an ninh saong patagok kinh te - xa hoi bhum taneran kraong Cuu Long.

Di Kubo liet si Chư Prông, biar harei kabroi UBND tinh Gia Lai peih ngak ndam padhi, ba nao dar 18 atau talang urang lin var klak rup drei di jaman mesuh metak pacang kol Mỹ, birau hu duah mboh di xã Ia Boong, tinh Gia Lai. Brei panuac di ndam padhi, Pho akok UBND tinh Gia Lai, amuk Nguyễn Thị Thanh Lịch khan lac: Bruk duah, pataom saong ba nao dar dom atau talang liet si lac bruk njauk ngak, brei mboh hatung hatai biak praong di Dang, Karja saong bhap bini, brei mboh hatung hatai thau dhar phol dom urang var klak rup drei piah khik veik bebat, tu do di Taneh ia palei negar.

Tukvak tapa, Bol lin Bien phong Ban Can Tho hu dang bruk saong pambuak duah mboh, mek kareik rilo bruk ngak suan, dalam nan hu mboh rilo abih lac bruk pajeng ba suan hukum labaih 822.000 lit menyek DO tapa negar, taong abih yaom kaom kaya mek hu kuhria jaik 9 ty dong. Bruk hu jao ka Kong an ban Can Tho taong bhat tui adat. Dai ta Phạm Lê Xuân Bình, Urang dang akaok tanei ba Bol lin Bien phong Ban Can Tho brei thau, dalam tukvak anak tal labik brei patagok pambuak, taong bhat catang dom bruk pablei dauk tapa tapen tasik negar.

Tui ong Vũ Hồng Thuấn, Akok UBND phường Vũng Tàu, TP.HCM, urak ini biak ralo hareik tuh tame tathik meng tathik Cần Giờ, dom kraong Dong Nai saong dom tinh Bhum taneran kraong Cuu Long theik tame tathik. Bruk ramik hareik di tathik birau ngak hu bruk nan meta. Suai lavik UBND phuong Vũng Tàu  hu harak tacei pato di UBND TPHCM tacei ba dom so, dom gah pambuak haong phuong peih bruk pasang iek, taong yaom bruk rah tabiak saong duah thau hareik nan mai meng halei tame tathik piah hu jalan langyah tal labik tal dhua.

Kayua kanjah jhak di hajan ribuk nan dom njam patam baoh karaoh ka Ban raya Ho Chi Minh trun khang saong hu janih tagok yaom tagok dua mbang dut haong dahlau. Di darak pasar Thu Duc, njam patam baoh karaoh ka darak trun yaok harei, urak ini tok daok labaih 2.300 tan sa malam dut haong labaih 2.800 tan sa malam dahlau nan. Njam pabak ka Ban raya Ho Chi Minh mai meng tinh Tay Ninh saong Dong Nai ka dom darak bhap bini jeng trun, rilo meng lac njam mek hala. Di dom darak yau ye: Thị Nghè, Phước Long, Tân Định… njam pabak tame darak trun lagaih 30% dahlau mbang hajan ribuk saong tagok meteh tal dua mbang.

Kapol Jingdong di Trung Quốc meda padang ngak sang mac praong logistics kong nghe thong minh akaok meti di dunya di tỉnh Giang Tô. Hadei tuk ngak salah blaoh, dom sang mac praong ini hu jeng sa dalam dom labik ngak robot praong abih saong ngak meng mac jamraih hu lagaih ralo abih di Jingdong. Bruk pandar Smart Wolf hu patagok rilo dalam bruk pandar gilang khik piah drap ar, mek ndap nda tabiak hu samar lagaih abih.

Rajaei Dan Mach khan lac pakauk uranaih ala umo 15 thun pandar mang xa hoi. Min dom amaik ame halei brei ka anek drei pandar mang xa hoi meng sit jang, ye thun umo brei pandar biar abih lac angaok 13 thun saong tok hu pandar dom nen tang njauk brei pandar. Tui langyah meng jabat pasang iek meraik gauk saong pandar Dan Mach meng bilan 2 thun ini, dam dara di negar Bac Au ini tui kuhria rah tapa hu caik 2 tuk 40 minit yaok harei piah pandar mang xa hoi.

Patui bruk kham merat ngak brei takik hareik tabiak alam moi truong, Australia pakauk pandar dom pandap nhựa sa mbang. Bang New South Wales ba tabiak dom nuak nhựa pagam tame kalaoh tuk peih. Tui nan, bang ini brei pakauk dom jru hoa hoc hu jru mek dalam ao papaok kaya mbang saong ia menyum meng pandap nhua piah pacang jru mek tame taneh, ia saong dom janih ndap mbang./.