Ngak bruk haong urang dang akaok tinh Tay Ninh piah taoh talaih kan kandah, jhul tagok bruk ngak mbang, pablei salih, pablei tabiak blei tame, Phaok Thu tuong Mai Văn Chính pandar, Tay Ninh kham merat mek hu tanut cakrok 10%, glaong jang asal kadha ba tabiak; ndom lac, hadei pagam haong Long An klak, Tay Ninh hu veik rilo kein lagaih piah patagok. “Kayua nan, tinh brei khang hatai jang dahlau”. Gam haong nan pato tacei dom metri, dom gah pataom tame taoh talaih tavak tavaiy cambaih laih ka Tay Ninh, meng phun jien, kadung jien, pacang glut jaleih tal peih tabiak sarak.

Kadha biak uan tabuan ka mikva urang ngak hamu padai, lac yaom brah daok tagok. Tui Cuc Chat luong, Che bien saong Patagok darak pasar, dom harei jaik ini, yaom brah dalam negar saong pablei tabiak negar langiu tagok yaom tuk dom taneh ia Chau Phi khin blei ralo. Urak ini, yaom brah pablei tabiak negar langiu di Viet Nam khik hu yaom glong abih di dunya. Tui Kapol padai brah Viet Nam, bruk Philippin brei padeih blei brah di Viet Nam katut panak saong doanh nghiep brei kuhria dahlau tuk darak pasar ini peih pablei gilac di puac thun ini.

Tui Mban Thuong vu Ban Ndoan Ban raya Ho Chi Minh, dalam thun bac bahrau blaoh dom pakat mentri ndoan kapul di Ban raya Ho Chi Minh hu ba tame 1.075 urang ndoan naih gheih tame Ndang. Dom danak dak “Sinh vien 5 siam”, “Gru pato sit thun umo naih gheih”…hu peih tabiak praong prang, pambak tabiak. Bruk padang kapul Ndoan, Hoi karo kajap jeng hu sangka iek praong. Amuk Nguyễn Thị Tuyết Minh, Phaok Akaok Mban Tuyen giao saong Dan van Ban uy Ban raya Ho Chi Minh pandar dalam thun bac 2025-2026, dom pakat mentri Ndoan - Hoi patagok pambuak haong gah ngak mbang pablei salih saong labik ilamo kong nghe glaong piah daong saih megru roh duah khoa hoc.

Di tinh Dong Thap, meng akok thun mbiah tal ini, hu labaih 4.200 urang ruak pandiak tabiak darah, tagok 87% dut saong tukvak ini thun blaoh, oh hu thei metai. Gah Y te kakei lac: tuk mboh drei yau ruak pandiak tabiak darah, bhap bini brei nao labik iek ruak piah jru ruak njauk lagaih, juai tame ia daok di sang atau menyum rilo jru ladam pandiak. Dom baoh sang brei ramik pametai lang quang brei gam sir pandap padang ia; ndih dalam kamo sang ngui cuk khan ao atah klak jamoh kaik.

Kuac klaik cuah suan hukum ngak khat lahik drap ar, glut jaleih ar kraong di Bhum taneran kraong Cuu Long. Di Vinh Long, kuhria tal bilan 9 ini, jabat chuc nang hu duah mboh 261 mbang kuac klaik cuah, taong bhat 8 urang, mek khik 6 radaih. Dalam tinh hu labaih 600 radaih njuk klaik cuah, dalam nan hu rilo radaih oh ka hu tut angan. Kuac klaik mek cuah oh lac ngak khat lahik drap ar taneh ia negar bo daok ngak kan kandah tal ar kraong, ngak kan kandah suai atah tal raidiuk saong bruk ngak mbang di rahra.

Tong thong My Donald Trump birau khan brei thau taong jien je birau ralo ndap nda pablei tabiak negar langiu, dalam nan hu jru, radaih tai praong saong kaya ngak mekre sang danaok. Dom jien je birau meda hu pandar meng harei 1 bilan 10 anak tal. Cambaic laic, My brei mek jien je taong abih ngan haong jru tavao hu angan je atau hu brei harak ngak tabiak, langiu di dom doanh  nghiep daok padang sang mac  di My. Radaih tai praong brei kak je 25%, dalam nan jien je kaya ngak mekre sang danaok saong ndap nda dalam aduk menei ia meng 30% tal 50%.

Kapul Pacang khik Israel khan brei thau lac hu panduan jak jeng labaih 700.000 rahra Palestine tabiak patruh ban Gaza dalam bruk mesuh gauk daok rah tabiak. Urak ini daok labaih 300.000 rahra Palestine daok veik di ban Gaza. Min, jeng hu mboh dom rahra patui veik panduan nao tabiak tuk kapul lin di Israel peih praong bhum taneh pasang iek./.

Sa inem krung 12.000 thun birau hu dom urang ilamo roh duah mboh lac sakawi Ia harei dahlau abih dalam sajarah dakrai di anek manuac. Kapol urang di Dai hoc Edinburgh (Anh) khan lac, dom akhar huroh sarak tame got patau di labik roh duah Gobekli Tepe, di Tho Nhi Ky, lac cih inem harei, bilan saong thun. Dom inem sarak nan daok brei mboh tukvak di Ia bulan saong dom mbang patuk sao mbang hadah.