Bingun pahadar Harei negar 2 bilan 9 thun ini dui atah 4 harei, dalam negar sumu gauk peih ngak rilo bruk praong pahadar 80 thun Cach mang bilan 8 jak jeng  saong Harei negar. Yau nan ye, Thu tuong caong khin dom mentri, dom gah, dom bhum  palei duah thau bruk rah tabiak dalam bhum palei, brei kuhria caga dahlau saong hu jalan pacang caga, langyah dom bruk tamuh tabiak oh thau dahlau, oh luai drei oh thau, catuah. Gah bol lin, mac moc, hu caga blaoh blai, abih di nyu lac di bhum palei, khik brei salamat dom labik karja, danak praong, dom bruk praong di taneh ia.

So Pato megru TPHCM birau iew dom labik pato megru ba mbuan lagaih salih tuk salih labik bac ka anek saih lac anek bik di urang jakar, kong chuc salih tui amaik ame mai Ban raya HCM ngak bruk tuk dakramik labik ngak bruk. Hadei pagam tinh ban, TPHCM hu labaih 2 trieu 500 ribau anek saih saong labaih 3.500 labik pato megru. Sarak ini brei mboh bruk sangka daong bruk bac da-a mbuan lagaih, piah urang jakar, kong chuc saong baoh sang mai ngak bruk, diukrai di labik birau hu sahanang hatai. 

Urang ngak nong di Bhum taneran kraong Cuu Long daok tame bilan yuak padai He Thu. Hadei tuk yaom trun biar, yaom padai tathak tagok veik hasit meng 200 tal 500 dong sa kilo. Yau nan min, kein laba ka urang ngak nong daok biar rilo dut saong dom bilan dahlau. Gah chuc nang kakei piah bruk pablei tabiak hu tani tanat, urang ngak nong njauk brei pambuak haong doanh nghiep, HTX saong pakhang bruk pala drak tui jalan birau takik abih jien buh tame ngak.

Glut jaleih ar pacang kraong, jalan mbak di Bhum taneran kraong Cuu Long ngak khat lahik yaok rituh ti dong. Di tinh Dong Thap, ar pacang glut jaleih  kraong Tiền kuhria taong abih tih  phun jien buh tame labaih 300 ti dong hadei tukvak katut ba tame ngak bruk rah tabiak glut jaleih gam gam. Ar ribaong Hà Giang, xã Giang Thành, tỉnh An Giang phun jien buh tame ngak jaik 80 ti dong, hadei 5 bilan ba tame ngak bruk hu tal 3 mbang glut jaleih. Glut jaleih dom danak dak oh lac ngak kahat lahik yaok pluh, tal yaok rituh ti dong, bo daok ba tal bala, bruk haduh hatai di yaok ribau baoh sang bhap bini daok tapen kraong.

Gah bol lin chuc nang tinh Tay Ninh duah mboh, chap mek 2 urang daok pagui mek dalam 11 urang Viet Nam njauk Campuchia patrauk. Dahlau di nan, biar harei 19/8, bol lin di Mban Tacei ba Bol lin Bien phong tinh Tay Ninh pambuak haong Kong an tinh Tay Ninh peih bruk taduan 11 urang Viet Nam kayua Đại su Viet Nam di Campuchia saong gah chuc nang Campuchia jao mai. Ini lac bhap bini Viet Nam hu gah chuc nang Campuchia thau labik daok, urang ngak suan hukum saong patrauk bayar mai.

Kapol urang jakar di Rajaei Thai Lan saong Myanmar hu taom mbaok ginum biai saong pambuak bruk langyah ka bruk njom nerak halau ia di labik tapen negar dua taneh ia, pamong tal bruk kuac mek kaya drap ar saong tathuak ia njom hu kim loai trak di dom nyaom bangsa takik di bhum taphia negar dua taneh ia.

Mentri Y te Gaza khan lac dom urang Palestine metai dalam tuk mesruh metak di Dải Gaza tagok tal 62.000 urang, gam haong labaih 156.000 urang njauk rambuis. Dom urang ilamo kakei dahlau bruk mesruh metak tame Isarael daok jhul  Gaza tame eik lipa. Mentri Y te Gaza khan lac takik abih  112 uranaih metai kayua dom lavang lavaih kuhria meng tuk Israel - Hamas mesruh gauk rah tabiak. 

Gah Hong Kong, Trung Quoc khan lac ruak brah glo akaok viem nao Nhật Bản hu tame negar hadei 5 thun. Urang ruak lac kumei umo 49 thun. Dom bruk duah thau tapa hu mboh, urang kumei ini hu nao Philippines meng 21/7 tal harei 4/8. Hadei tuk mai Hong Kong harei 4 bilan 8, muk pandiak dalam rup, pandik akaok saong glaok ta-ok meng harei 10 bilan 8. Muk hu ba tame sang iek 14/8 saong urak ini prein yawa karo kajap./.