Dang dui ba mbang nyom biai ka sa di mban tacei ba di Rajaei ka bruk pasang iek, dui ba kinh te vi mo, Thu tuong Phạm Minh Chính ndom cambaih lac brei jhul tagok bruk brei phun jien mesraiy ka bruk ngak di negar hu khang jang piah daong jhul tagok cakrok; rabha phun jien buh tame ngak bruk di negar pakat meteh ala 3.000 danak dak. Mentri Padang jhul patagok danak dak taneh riya sang danaok siam mekre, cambaih laih, tantu, jhul patagok sang daok rahra, samar chip padang pasak meyao meyit taneh riya sang danaok saong bruk hu pandar taneh; peih ngak siam paok jien brei mesraiy daong blei sang danaok ka urang ala 35 thun. Gam haong nan pasang iek yaom kaom, darak pasar, rilo meng lac dalam bingun Tet.

Tui Kapol nyaom Ikan pra Viet Nam, kuhria bilan 11 meng blaoh, bruk pablei tabiak negar ikan pra Viet Nam yam tapa 2 ti USD, tagok labaih 9% dut saong tukva ini thun 2024; tui kuhria mboh dahlau thun ini hu labaih 2,1 ti USD. Ikan pra thun dahlau sumu labaih 1,65 trieu tấn, yaom lac thun ini khik hu tani tanat meng bruk ngak mbang pala drak saong pandar kong nghe. Yau nan min, gah raong kaya ikan pra di ĐBSCL daok dang anak rilo kan kandah anak bruk langik oh lagaih ngak rah tabiak jit ruak, halau ia takik hacih; yaom ikan lap dalam tuk jien buh tame ngak tabiak ikan glong ba tal urang oh khin palao pajaih raong.

Piah pabak hatai caong ka sang daok ka urang ngak bruk hu jien mek tame biar, tinh Dong Thap daok pataom tame peih ngak dom danak dak sang daok rahra. Urak ini tinh hu salah blaoh padang 1.143 baoh sang daok rahra, hu ginup kein lagaih piah hu pablei, brei pah ka urang hu jien mek tame biar. Urak ini Dong Thap hu 11 danak dak sang daok rahra daok peih ngak, hu taong abih jaik 5.200 baoh sang. Gam haong nan, daok ngak harak da-a buh jien tame 3 danak dak sang daok rahra karei hu taong abih jaik 1.700 baoh sang.

Thun ini, bala meng langik ngak khat lahik jaik 40 ti dong di Ban Can Tho. Bala meng meng langik ngak 4 urang njauk rambuac, 346 baoh sang khut tayak sang daok, labaih 4.900 ha taneh ngak nong saong labaih 120 ha danao raong kaya dalam ia, gaok khat lahik trak. Bruk njom ia mbak mai drah samar jang yaok thun, njom ia mbak tagok glong saong dang di tanut glong dalam rilo harei, ngak jhak tal kaya nong. Ban Can Tho sumu daong dom baoh sang gaok khat lahik kuhria labaih 1 ti 400 trieu dong.

Bingun Tet Duong lich 2026 di labik Ban raya Ho Chi Minh saong dom labik jirah rivang langik siam, harei pandiak, oh hajan. Dom labik yau dac khu Con Dao, dac khu Phu Quoc, Ban Hue, Lam Dong…harei pandiak, oh hajan, nhiet do biar abih meng 24-25 độ C. Ong Lê Đình Quyết, Akaok jabat Kuhria langik tasik kraong ribaong, Balai Kuhria langik tasik - Kraong ribaong gah Meraong negar brei thau, langik thu lagu, hadah page langik la-an, brei caga dom ruak ka thuak yava di urang taha saong uranaih. Rahra brei srap gap ao pacang pandiak, nduan mot, tathal tuk nao di langiu langik di kreh pandiak.

Jabat Thu ky Karja ka Bruk ngak di labik tapen negar Campuchia payua sarak pathau khan, khin peih sa bruk samar chip saong Thai Lan di adit akaok bilan 1 di tinh Siem Reap. Bruk caong khin ginum biai saong patui peih ngak pasang iek, padang gang jamang di dom labik daok tapen dua negar. Dalam harak nan, gah Campuchia brei mboh veik bruk ngak po saong khik caga hu siam bhum taneh palei negar njauk tui hukum dunya, abih di nyu lac dom sarak  saong ban ndo  hu meng jaman Prang mai pak ini.

Sa mbang apui khuah bahrau rah tabiak di sa labik raong urang taha di Indonesia di malam, ngak ka 16 urang praong thun metai. Khau tin akaok meti labaih 7 minit hadei mbang apui khuah, kapul daong padam apui mai tal labik. Hadei tuk mbuan apui khuah hu padam, dom urang daong padam apui duah mboh 16 atau rup urang taha praong thun umo dalam mbuan jaleih. Tuk rah tabiak mbang apui khuah hu 32 urang daok dalam labik raong urang taha./.

Tui yaok kuhria di jabat di cu di LHQ khan brei thau, kalin kan di gah Pei saong gah Meraong Sudan ba tal labaih 10.000 urang panduan ba nao daok labik karei dalam 3 harei. Bruk mesruh kalin  di Sudan ba tal yaok ribau urang metai, sraw kadau panduan bhap bini bo LHQ lac praong abih di dunya, hu labaih 12 trieu urang panduan ba nao labik karei dalam saong langiu negar./.