Harei 30/1 (lac harei 9 bingun tết) Thủ tướng rajaei Phạm Minh Chính haong kapul ngak bruk hu nao pasang iek danak dak padang ngak tatua Mỹ Thuận 2 tapa kraong Tiền gah takai kraong tỉnh Tiền Giang. Hadei di tuk pang pathau khan ka tukvak padang ngak tatua Mỹ Thuận 2 saong jalan tagok 2 akaok tatua, Thủ tướng, ieu kakei dom kapul peih ngak samar drah dom danak dak, kham marat dui katut jang 3 bilan. Pandar taong abih dom ilamo, tăng ca, tagok kíp, tagok dom jalan padang ngak, pandar dom ilamo glaong di abih tame bruk ngak, tabiak tukvak ngak brei hu ilamo. Taphia bruk dui katut veik tukvak ngak min brei khik kajap siam mekre, salamat di abih ka danak dak...

Dom harei hadei Tết, yaom hadang thẻ takai mbong patih di dom tỉnh dalam bhum taneran kraong Cuu Long tagok glaong. Urak ini hadang janih 30 drei tame sa kg yaom mangaok mala 230 rabau đồng/kg, hadang janih 40 drei sa kg yaom labaih 190 rabau đồng/kg, tagok jang dahlau di tuk Tết meng 20-30%. Tui yaom yau ini, urang raong hadang thẻ hu laba rilo, abih di nyu lac urang raong hadang công nghệ glaong. Tỉnh Bến Tre saong Tiền Giang urak ini hu labaih 3.000 ha danao hadang thẻ raong tui công nghệ glaong. Jaik abih dom danao raong hadang  bharau sraong mek pablei jeng hu laba labaih 30% duk haong yaom phun jien buh tabiak, hu labik raong matai takik, hu laba tal 40%.

 Rilo urang nong pala padai di bhum ia taba di dom huyện Trà Cú, Cầu Ngang, Châu Thành, tỉnh Trà Vinh biak uan tabuan tuk angan “brah palei dahlak”, pandap OCOP 3 patuk hu pablei tabiak darak Trung Quốc saong hu rilo jalan lagiah piah pablei tapa dom darak dom taneh ia karei. pandap “brah palei dalak” hu ngak tui jalan hữu cơ saong hu ngak mangaok dom dây chuyền tame kadung automatic, chất lượng asal brah mek hu tanut chuan pablei tabiak negar langiu. Urak ini Doanh nghiệp Thuận Thiên Trà Vinh hu mbaoh tangin haong urang nong ngak tabiak pajaih padai ST 25 hữu cơ labaih 1.000 ha, pabak "brah palei dahlak" ka darak pasa dalam taneh ia saong Trung Quốc meng 3.000 - 3.500 tấn/vụ.

Dalam 2 harei tapa, dalam tỉnh Bến Tre ia ndik glaong ngak brei dauk, ba tal kan kandah bruk ngak mbang saong jalan mbak nao mai di dom labik, abih di nyu lac di 3 huyện tapen tasik lac: Bình Đại, Ba Tri saong Thạnh Phú. Tapa pasang iek tuk camereip, hu labaih 37 ha njam patam, 6,8 ha bein phun mbang baoh dauk dalam ia, rilo danao ikan hu ikan nduac tabiak. Gah chuyên môn kuhria mboh lac bruk njaom mbak mangaok dom kraong praong tagok glaong saong njaom tame dalam tukvak bilan 2 saong bilan 3 tal. 

Dom harei tapa, mikva taong ikan di tỉnh Bà Rịa-Vũng Tàu daok jar var caga ka mbang nao tasik akaok thun. Tui yaok thun, dom mbang tabiak tasik taong cap bhian peih tabiak meng bingun 6 bilan 1 sakak ia bilan, min kayua tasik hu hangin khang nan ye tui kuhria hadei di harei 12 bilan tha meda tabiak tasik. Lac labik hu dom sruh gilai taong cap ikan rilo abih di tỉnh, huyện Long Điền urak ini hu 1.200 sruh gilai meng 800 mã lực tagok. Piah samar pachreih ba saong klah rabha kan kandah saong urang taong ikan, harei 29/1, lac harei 8 bingun Tết, urang par akaok huyện Long Điền saong dom gah chức năng hu peih bruk mbang panal, tadhau ayuh Tết, alin pandap saong pathau khan tal labaih 300 urang taong ikan ba gauk yam tapa kan kandah piah tabiak tasik, ba tui hatai caong dom mbang tabiak tasik hu rilo ikan, hadang.

 Urang pan akaok 2 taneh ia Hàn Quốc saong Mỹ meda taom gaok gauk rilo mbang dalam adit ini piah ginum biai dom bruk praong, dalam nan hu bruk hạt nhân di Triều Tiên. Dalam mbang ginum biai ini, dua gah kuhria ginum biai praong dalam dom jalan pacang caga cambaih laih piah patagok prein pacang bruk patagok hạt nhân di Triều Tiên, dalam nan hu bruk ngak iek hạt nhân mbang ka 7. Urang pan akaok quốc phòng 2 taneh ia jeng hu pasang iek bruk kuhria caga ka mbang pasram mesruh pandar pandap ngak brei huac peih praong, tui kuhria hu peih tabiak dalam bilan anak tal.

Thủ tướng Thái Lan Prayut Chan-o-cha bahrau ini brei thau lac, meda oh yah klaak aval Hạ viện yaom lac hu jalan adat piah ngak yau nan, kayua Ủy ban Pilih ruah (EC) jeng daok caong hu rilo tukvak jang piah caga ka mbang pilih ruah jaik tal. Panuac di Thủ tướng Prayuth hu ba tabiak hadei di dua hukum hu pasiam hu makna praong pambuak tal bruk pilih ruah di Thái Lan hu pandar meng harei 29/1, ngak jeng jalan adat ka bruk yah klaak Hạ viện. Meyah tukvak 4 thun di dom Hạ nghị sỹ tamat di harei 23/3, bruk pilih ruah patui veik hu peih tabiak dalam 45 harei atau dahlau di harei 7/5. Mayah Hạ viện njauk yah klaak dahlau di harei 23/3, mbang pilih ruah meda hu peih tabiak dalam 40 harei tal 60 harei hadei di nan.

 Mintri Y tế Prang brei thau bruk padeih jalan ngak praong ka pacang caga Covid-19, dalam nan hu gam bruk “dut iek, pasang duah saong brei daok karei” dalam tuk dom menuac njaom mbak daok trun khang. Jabat Y tế Prang jeng brei thau lac meda palai klaak dữ liệu ka urang dương tính saong dom taom gaok hu khik piah di jabat bảo hiểm piah khik kajap quyền công dân.  Puac adit dahlau, Prang jeng brei klaak pandar “TousAntiCovid” hu ba tagok phone tangin piah mboh dom menuac taom gaok, piah thau dom mbang klauk vắc-xin saong khik piah harak thông hành y tế di yaok menuac urang./.