Tacei pato ngak dom bruk praong, samar peih ngak samar chip kinh te - xa hoi di mbang nyaom kadha ginum biai biar harei 16.9, Thu tuong Lê Minh Hưng  caong khin Mentri Pato megru  brei langyah samar hu tuvak cambiac laic, langyah catang, samar drah abih bruk kurang tapuk bac. Tui Mentri Pato megru, kuhria tal harei 15.9, dom bhum palei pathau khan daok kurang labaih 3,9 trieu tapuk bac, sumu labaih 1,5% taong abih tapuk.

UBND TPHCM ba tabiak dom kadha kak jien saong jien mek tame, jalan khik iek jien mek tame cai pandar, daong bruk pato megru dalam sang bac thun 2026-2027. Dalam nan, dom khoan jien  ngak tui jalan halan hatian, hu bruk njauk hatai di amaik ame anek saih, urang bac; jien mek tame pabak ka jien pandar min oh tapa jien kuhria tui hukum. Tamat thun bac, meyah dom jien jitvu  mek tame  glong jang jien buh tabiak ye brei bayar veik ka urang bac.

Dalam tinh Ca Mau urak ini oh hu lubang cuah saong patau piah kuac mek, taong abih blei meng dom tinh karei. Bruk kurang, ralo lac cuah saong patau dom janih. So Padang ngak Ca Mau khan lac, karja negar brei ba dom kaya kan di dom bhum palei, hu jalan ngak brei samar blei hu cuah patau saong khan brei cambaic laic, thau yaom kaom jien pajeng ba piah pabak. Bruk nan daong samar ngak hu dom danak dak, abih di nyu lac dom danak dak praong dalam tinh. 

Page ini, gah chuc nang pacang labik apui khuan mbang sang jalan Phạm Hữu Chí, phường Chợ Lớn, TPHCM ba tal 2 urang metai,  5 urang njauk rambuac. Bruk apui khuah di melam, dom urang daok ndih, oh thau apui khuah saong jamraih suai brei thau. Kong an kakei bhap bini brei pagam jamraih brei thau apui khuah samar; caga binh padam apui sit, siuk pacang athak saong dom kaya padam apui khuah. Tui nan, bhian pasang iek he thong dien, padam abih dom jamraih pandar dien dahlau tuk tabiak truh sang.

Tui Rayo Khi tuong thuy van Meraong negar, meng harei paguh 18/9 dom tinh gah Meraong negar hu hajan praong, dui atah tal harei 24,9, hajan praong tal 300mm. Bhap bini njauk brei kuhria caga ia dauk dom labik biar, khu do thi saong bhum tapen kraong. Bala mbuan rah tabiak kayua hajan praong di TPHCM saong Nam bo dalam dom harei anak tal pakat 1.  Bhum tathik meng Ca Mau tal An Giang  hangin khang pakat 3, glong 1m.

Thai Lan kakei ribuk ia sua, glut jaleih taneh saong ia dauk dalam negar di rilo hareo anak tal, tuk hajan praong daok rah tabiak di taneh ia. Jabat chuc nang  caong khin karja dom bhum palei peih ngak dom jalan pacang caga  ia praong, ba theik, glut jaleih taneh saong ia ia dauk, brei hu manuac ngak bruk luac harei melam di dom labik mbuan gkut jaleih. Bhap bini di dom labik biar dhong, tapen tathik brei hu jalan pacang ia dauk, ia sua saong glut jaleih taneh.

Ha vien My brei tapa hukum piah khik caga dom baih sang anak bruk tagok yaom jien ndien kayua bruk ngak parilo di dom pasak du lieu. Tui nan, dom jabat khik iek gah dien luc  brei langyah  bruk tuai damuai  pandar rilo ndien, dalam nan hu dom pasak  du lieu, klak rabha  jien padang ngak soang pasiam dien duh ka bruk ngak di urang. Bruk Ha vien  brei khan tapa hukum jien buh tame ngak jeng bruk njauk caik hatai dalam bruk ngak brei patagok gah AI.

Sa kaoh pulao sit salamat di tathik Ionian di Hy Lạp, daok hu jeng labik pachreih tuai damuai kayua hu taphon pabui jhuk diuk bak labik ini, nao duah mbang di tapen tathik saong menei ia. Tuai damuai meda caluai ia jaik pabui  atau brei ka kol nyu mbnag. Meng sa labik oh thei thau tal, Atokos pachrieh yaok ribau tuai damuai./.