Dang akaok mbang nyaom biai haong Kapul ngak bruk khik kajap an ninh nang luong, biai ka dom jalan langyah piah khik kajap halau pabak nang luong, tani tanat yaom xang menyek, Thu tuong Phạm Minh Chính ndom khang ka jalan ngak ba tabiak oh luai kurang dalam tuk halei, saong pandar Mentri Kong thuong padang dom kadha khik kajap halau xang menyek, khik kajap bruk pasiam yaom ka njauk, siam lagaih, pasiam bruk khik piah kaya, tagok yaom. Thu tuong pandar jhul khang bruk pandar xang sinh hoc E10 tui Sarak di Rajaei saong pandar peih danak dak kali kalih nang luong, pandar nang luong hacih hijao, takik tathuak nerak.

Yaom xăng menyek tagok glong ngak haduh hatai urang nao ngak mbang di tathik Ban raya HCM. Meyah  bruk ini dui atah, oh lac takik gaiy gilai ndih angaok ar. Rilo urang nao ngak mbang di tathik, piah urang sahanang hatai tabiak tathik saong khik kajap labik taong chap ikan, Karja brei hu sarak patagok jien daong blei xang menyek ka dom mbang tabiak tathik atah rilo harei. Suai lavik, brei ginup kadung jien khik yaom xang menyek piah trun takik gaok kan kandah tuk yaom xang menyek  trun tagok, bruk urang nao ngak mbang di tathik pandiak hatai tuk brei ka gilai ndik kadang di tapen tathik atau  pablei gilai kayua abih rilo jien ka yaok mbang tabiak tathik ngak mbang.

Ong Thái Đại Ngọc, Bi thu Tinh uy Gia Lai hu nao pasang iek tukvak ngak 7 danak dak padang sang bac pho thong gam daok gam bac pambuak pakat Tieu hoc saong THCS di dom xa tapen negar Ia Pnôn saong Ia Dom. Taong abih tanut buh jien tame di 7 sang bac lac labaih 1.500 ty dong. Hadei tuk salah blaoh, dom sang bac ini brei duh labaih 7.000 anek saih di dom xa tapen negar. Bi thu Tinh uy Gia Lai jeng pandar dom bhum palei quy hoach quy taneh caga labik daok ka gru pato, daong sahnang ngak bruk suai atah di bhum tapen negar.

Mban Chi huy Bol lin Bien phong Ban Can Tho peih bruk Pakacah sap bangsa takik thun 2026 piah taong yaom bruk ndem meyai sap Khmer dalam bruk bac da-a saong bruk ngak di don vi urang jakar, urang lin. Mbang pakacah ini rik tame paglong ilamo sap bangsa di urang jakar, urang lin hu lagaih dalam bruk jak ba, pathau khan dakwah hukum saong pacang caga dom kol duis di dom bhum taneh tapen negar.

Yaom sara daok di tanut glaong mbiah, min urang ngak sara tinh Vinh Long oh bui sambai kayua hajan cagar bilan. Di labik xa Bảo Thạnh, hajan cagar bilan gam gam, ngak khat lahik trak ka 780 ha, kuhria khat lahik sara labaih 2.300 tan, ngak khat lahik rilo ty dong. Tui UB Bhap bini xa Bảo Thạnh, ngak sara lac bruk ngak bhap bini meng kal di rahra tapen tasik min pambak biak praong tame langik. Kayua nan bhum palei brei panuac tagok pakat angaok sangka daong padang bhum ngak sara pandap tamo pagam haong bruk pato tacei labik, piah paglaong yaom kaom sara bhum palei.

Rajaei Thai Lan mbaoh harak ka dom bruk peih ngak samar, caong khin dom jabat karja brei kuhria cakak trun jien cai pandar saong patak pataom bruk pandar dien samar chip. Dom don vi pabak jitvu di karja ngak bruk daong ka bhap bini brei ngak yau bhian harei. Taong abih dom jabat Rajaei brei caik nhiet ndo mac ngak la-ar di 26 do C. Rajaei ba tabiak adat padeih taong abih dom mbang nao pasang iek, bac megru di negar langiu di urang jakar.

Ndom meyai an ninh pakat glaong di Iran, ong Ali Larijani ba tabiak panuac kakei caga khang kajap ka harei hadei di jalan tasik Hormuz. Dalam kadha hu ba tagok mang xa hoi X, ong Larijani ndom lac: “Jalan tasik Hormuz lac tasik sron mbon salamat saong ginup meda ka taong abih atau lac tasik oh jak jeng saong njauk pandik pandua ka dom kol chreih mesuh metak.” Dom mbang taong tame ini ngak ka bruk pajeng ba tapa jalan tasik Hormuz – jalan pajeng ba menyek hu makna di dunya, jaik yau gar tavak abih.

Dom mentri nang luong Nyaom dom taneh ia kong nghiep cakrok khang kadang di dunya (G7) peih ngak dom mbang ginum biai online ka dom jalan khik tani tanat yaom kaom mỏ menyek. Dom akok mentri caong khin Jabat Nang luong Dunya (IEA) brei taong yaom bruk rah tabiak di darak pasar saong dak padang dom jalan pablei menyek meng gilang khik piah  meyah dunya kurang menyek.