Thu tuong Phạm Minh Chính bahrau hu Harak pandar, peih ngak “Jalan ngak Quang Trung” samar drah padang veik, pasiam sang daok ka dom baoh sang hu sang njauk khut tayah ka dom mbang bala bahrau blaoh di dom tinh bhum Kreh negar. Harak ndom tantu ka Chu tich dom tinh, ban meng Ha Tinh tal Lam Dong, dalam nan hu makna abih lac dom tinh: Dak Lak, Khanh Hoa, Gia Lai saong Lam Dong: Negar padang jalan ngak tantu cambaih laih, peih drah samar “Jalan ngak Quang Trung” piah jak ba taong abih gah, samar drah padang veik saong pasiam sang daok ka dom baoh sang jaleih, ia theik, khut tayah di dom labik bhum Kreh negar. Kuhria tal harei 22/11 di dom tinh Dak Lak, Khanh Hoa, Gia Lai saong Lam Dong ka taong abih khat lahik kuhria labaih 16.000 ty dong.

Hajan praong dui atah pagam haong tathuak ia sua ngak ka kraong Lũy tapa palei Canar Tịnh Mỹ, xa Hồng Thái, tinh Lam Dong, (huyen Bac Binh, Binh Thuan klak), jaleih trak, ngak kan kandah tapak tal Gilang peih Medhin Patao Cam di palei Canar Tinh Mỹ. Ini lac labik khik ramik labaih 100 ndap nda banrik, dalam nan hu ganrang di patao Pô Klong Mơ Nai saong cak mbuk di bia. Bruk jaleih dui atah daok ngak kan kandah yaok rituh baoh sang rahra diuk rai di ini. Amuk Đồng Thị Kim Minh, suh sah tuk mboh kraong ia ngak jaleih taneh yaok thun meng 2 – 4 m.

Meng bilan 7/2021 tal ini, Bo Tu lenh Bhum canh sat tasik 4 hu dang ngak pambuak peih 25 mbang haong jaik 300 mbang gilai ngak bruk pacang taong mek tui adat IUU di angaok bhum tasik Pei Meraong. Peih 45 mbang pathau khan ka labaih 25.700 mbang urang jakar, rahra, prai yaok pluh ribau harak bia-ar pathau khan di tinh An Giang. Gam haong nan pambuak haong tinh An Giang peih bruk pacang taong mek tui adat IUU, taong bhat catang ka dom gilai ikan ngak suan, daong pacang cakak dom bruk ngak suan trak tui adat IUU angaok tasik, oh luai ka gilai ikan tame bhum tasik negar langiu.

Hadei tukvak patrun yaom, urak ini baoh panat di tinh Dong Thap tagok veik di tanut glaong. Urak ini yaom panat meng 10-16 ribau dong sa kilo, tagok labaih 5 ribau dong sa kilo dut haong adit dahlau. Daok pajaih panat panat pathiu bhong hu yaom jaik 30 ribau dong sa kilo. Ngan haong yaom tani tanat yau urak ini, yaok kg baoh panat po bein hu laba meng 10-15 ribau dong. Urak ini Dong Thap hu labaih 20.000ha pala panat. Phun panat biak mbuan pala, hadei labaih 2 thun blaoh brei baoh, paik baoh jaik yau luac thun saong mek hu labaih 40-50 tan sa ha.

Raya adat Pakacah Gaiy Ngo mek Cup Xuân Hòa peih praong 2025 ngan haong kadha “Pambak tabiak ilamo, pambuak pagam bhap bini” rah tabiak di harei 30/11 di angaok ribaong Nhiêu Lộc - Thị Nghè (labik quan 3, Ban raya Ho Chi Minh dahlau diah). Yai kacah thun ini hu 18 kapul gaiy mai meng dom tinh: Soc Trang, Kien Giang, Bac Lieu…, ba tui prein khang saong hatai hadah mbaok meta di bangsa Khmer Meraong negar. Kacah gaiy Ngo piah khik ramik ilamo bangsa Khmer Meraong negar, saong daok brei labik pambuak bhap bini dalam ban medin.

Bingun Harei Dunya jum pataom haong rahra Palestine, Lien hop quoc saong rajaei rilo negar ieu pandar jhuk tagok bruk sron mbon salamat din Trung Dong saong brei mboh veik sanya pamaong tal jalan langyah di dua karja. Rilo mbang pasang iek jeng rah tabiak di dom ban raya dalam dunya piah brei mboh hatai jum pataom haong rahra Palestine saong pandar padam mesuh metak di Dai gaza.

Urang jakar rilo negar Dong Nam A brei thau dom urang metai kayua ia sua saong jaleih taneh kayua hajan ribuk di grauk labik dalam labaih 1 adit tapa hu tagok tal jaik 1.000 urang. Langiu di nan, hu labaih 4 trieu urang, njauk kan kandah kayua ribuk ia sua. Dom urang jakar daong di dom negar jeng daok kham merat nao ral rilo labik njauk ia sua. Di Indonesia, dom kapul daong hu pandar ahaok truc thang piah pajeng ndap nda daong ka dom urang gaok kan kandah. Tui kuhria, labaih 400 urang lahik saong 213.000 urang njauk panduan nao labik karei.

Tal ini dom urang metai dalam mbang apui khuah di sa labik daok chung cu di Hong Kong (Trung Quoc) tagok takik abih 146 urang, oh langiu bruk meda urang gaok kan kandah daok njauk rilo veik. Dom bruk daong samar chip brei ka dom baoh sang njauk kan kandah di mbang apui khuah jeng daok rah tabiak. Taong abih jien rik daong kuhria tal ini lac labaih 1,1 ty HKD (samu 141 trieu USD). Labaih 500 rahra hu panduan nao tal labik daok karei, trai He atau bilik hotel. Labaih 1.000 rahra hu panduan nao tal sang daok anak meta. Langiu di nan, karja daok khik tani tanat 2 sang daok anak meta ka rahra hu khin daok.