Pahadar 95 thun harei peih padang Mat tran Negar Viet Nam (18/11/1930 - 18/11/2025), page harei ini, thu tuong Phạm Minh Chính hu mbaok di Harei Jum pataom taong abih bangsa haong rahra labik Thắng Kiên, Xa Đề Gi, tinh Gia Lai. Ba drei tame chreih chrai haong mikiva di labik, Thu tuong Phạm Minh Chính ndom lac, harei rah tabiak dalam bruk karei dut haong dom thun dahlau: pagam labik karja dalam negar, ngak bruk karja palei 2 pakat; mbang ribuk ka 13 bahrau blaoh ngak kanjah jhak tal oh ka tuk halei mboh meng kal mai. Dalam bruk nan jeng daok hu labik pambak lac hu bruk dui ba njauk lagaih di Ndang; bruk ngak di sa majam chinh tri, di rahra, bruk dui nan di dom pakat karja; hatai jum pataom di grauk bangsa dalam negar; khol drei thau pambuak pagam prein khang di Trung uong haong bhum palei, prein khang di gah ngak mbang pablei salih haong rahra; prein khang meng rahra bhap bini.

Tui So Ngak nong saong Alam moi truong Dak Lak, dalam tinh hu labaih 44.000 hecta taneh pala drak gaok khat lahik. Dalam nan hu 1.500 hecta phun pala lavik thun saong jaik 19.000 hecta glai gaok khat lahik kayua ribuk ka 13. Rilo taneh pala durien, café, cao su  nan lac dom janih phun pala ba jien tame ralo bo nyu jaleih, buac gha…Anak bruk nan, UBND tinh tacei pato dom bhum palei samar pasang iek, parabha bruk khat lahik, ba tabiak jalan daong tui yaok nyaom phun pala.

2 thun tapa, tinh Vinh Long oh ka duah mboh bruk suan hukum ka bruk taong mek ikan hadang, oh pathau khan saong oh ngak tui adat (IUU). Ong Nguyễn Văn Buội, Phaok yam ndok So Ngak nong saong Alam langik tinh Vinh Long brei thau dom bruk gilai ikan lahik pambuak haong ndap nda pasang iek luac jalan nao tasik meng 6 tuk tal ala 10 harei hu trun rilo. Cambaih laih lac dalam thun 2024 dalam tinh hu 4.300 mbang gilai lahik pambuak saong tal thun 2025 daok ala 3.000 sruh lahik bruk pambuak kayua meng rilo makna, yau ye ndap nda khut tayah atau abih pin…

Bruk pasang iek kaya mbang hacih sa-at, jru saong kaya ngak mekre hu So Y te Ban Can Tho bhian peih ngak, yaok bilan di grauk bhum palei dalam ban. Piah caga hu bruk pacang caga  ngak suan tuk Tet Nguyen dan anak tal, So Y te Can Tho tui pasang iek, gam padang kajap Mban tacei ba Khik iek pandap mbang hacih sa-at di Ban, pakhang bruk pasang iek, tui iek ndap nda, rik tame khik siam ka prein yawa bhap bini.

Di tinh Lam Dong, meng akaok thun tal ini, taong abih 45/45 phuong, xa saong dac khu Phú Quý (labik Binh Thuan klak) hu taduan jaik 3.300 bruk njauk ruak pandiak tabiak darah, tagok jaik dua mbang dut haong tukvak ini thun dahlau. Anak bruk tagok rilo urang njauk ruak pandiak tabiak darah, rilo meng lac hadei hajan, ia sua, gah y te dom bhum palei gah Pur di tinh Lam Dong daok kham merat pasang khik urang njauk ruak saong bruk mbuan tamuh pambak jit ruak pandiak tabiak darah dalam rahra bhap bini, pathau khan saong ngak hacih sa-at labik daok ka rahra.

Harei 13/11, yaok rituh ribau anek saih Han Quoc yam tame mbang pakacah Dai hoc – mbang pakacah hu makna biak praong dalam xa hoi iek bruk pato megru glong abih di  chau A. Tui Mentri Pato megru Han Quoc, kadha pakacah meng mon 8h40 saong dui atah tal 17h45 minit di 1.310 labik pakacah dalam negar. Thun ini, hu labaih 554.000 anek saih  tut angan pakacah, tagok 6%  dut saong thun dahlau.

Trung Quoc harei ini brei thau dom gah ngak mbang pablei salih payua harak kaya ndap nda saong pajeng ba samar di negar ini hu pajeng ba taong abih jaik 14 ty paok ndap nda kaya dalam mbang blei pandar “11/11” thun ini, mek hu sa bruk pajeng rilo abih. Kuhria brei mboh, ndap nda kaya kuhria rah tapa yaok harei mek hu 634 trieu paok ndap nda kaya, tagok jaik 20% dut haong tanut kuhria rah tapa yaok harei.

Rajaei Anh ba tabiak harak birau piah khik catang bruk rah tabiak angaok mang ngan haong dom kong ty pabak jitvu kong nghe khaw tin, daong ky thuat saong an ninh mang. Sarak nan ba tabiak hadei rilo taong tame mang ngak khat lahik biak trak, dalam nan hu bruk tame mac jalan bayar jien bilan di Mentri Quoc phong Anh saong bruk taong tame mang ba tal labaih 11.000 mbang sanya pagol di jabat Y te pakat dunya cakak klaoh./.