Di var ndem meyai nao mai haong 300 urang lambaok vakil dam dara di biar harei kabroi, Thu tuong Phạm Minh Chính ieu dam dara Viet Nam patagok veik bruk sahaneng “ Labik halei khin brei hu mbaok dam dara, bruk hagait kan hu dam dara”, tuk halei jeng brei ngak dahlau, hadah krah, kham merat yer tagok hala dok nao dahlau, ngak siam abih bruk ngak di drei dalam raidiuk cach mang ilamo kong nghe, salih birau hadah krah saong pandar salih tapa taka so pakat negar. Caong khin saong jia lac Dam dara Viet Nam saman bahrau, hatai khang kajap “ngak po, jia hatai, patagok meng rup eng, prein khang di drei, ngak brei hadah mbaok meta bangsa”, kham merat yam tagok khang kajap, kham merat patagok karo veik, patui bruk siam gheih di dom rairah nao dahlau, tavak tame dom blah tapuk sajarah hadah hadai birau di bangsa.

Mbang pakacah THPT thun ini peih ngak dalam dua harei 26 saong 27 bilan 6, hu dua tukvak pakacah ka dom anek saih bac tui danak dak  bahrau saong klak. Mentri Pato megru khan lac, thun ini dom anek saih akaok meti tui bac Danak dak 2018 pakacah tamat bac, min daok dom anek saih bac tui danak dak (2006) khin pakacah veik  piah hu harak tamat atau mek tanut pakacah tame bac ndai hoc. Yau nan ye, Mentri hu ba tabiak dua tukvak pakacah karei di gauk ka dua nyaom anek saih nan.

Mban ngak bruk Kadung jien Vừ A Dính saong paok jien bac “Daong Hoàng Sa – Trường Sa anit ranam” birau peih bruk alin brei paok jien bac thun 2024 -2025 ka 55 anek saih lac urang bangsa takik di tinh Trà Vinh. Langiu di nan, Danak dak hu jao brei 2 paok jien bac “ Tangin kuan hatai ranam”, yaok paok jien bac hu yaom 6 trieu dong ka anek saih metui amaik ame kayua jit ruak COVID-19. Meng thun 2010 mbiah tal ini, Trà Vinh hu Kadung jien bac Vừ A Dính hu alin brei 1000 paok jien bac yaom 1 ti dong.

Yaom durian daok tagok glong, urang ngak nong di dom labik pala sa janih ini biak chreih chrai. Dom labik blei pataom baoh durian di bhum gah Pei negar bahrau khan lac yaom blei durian tagok  50.000 dong sa kilo dut saong bilan dahlau. Yaom durian Monthong janih A hu blei tui yaom 135.000 dong/kg. Ong Nguyễn Văn Mười, Pho Tong Thu ky Gah Njam pataom baoh kayau Viet Nam khan lac, yaom durian tagok kayua salih tukvak brei baoh karei bilan saong bilan brei baoh di nyu, takik hu baoh yau nan ye yaom tagok glaong. Langiu di nan, dom urang pablei baoh durian tabiak negar langiu ngak njauk tui bruk ba tabiak pasang iek asar jru kanjik katam O saong cadimi di baoh durian.
Peih ngak Adat ilamo bhap bini “ Ilamo 3 bhum palei” lac harei roya bika praong  hu peih ngak tuk Pachit da-a Po patao Hung Vuong ( harei 10/3 saka ia bulan) hu peih ngak di Bein athur Thảo Cầm Viên Sài Gòn – TP.HCM meng harei  02/4 tal 07/4. Tuai damuai  hu rivang iek bruk ngak tui ilamo meng kan di mukkei saong dom pandap mbang biak rilo janih di harei ini. Gam haong nan lac rilo pandap mbang hu ba mai meng dom taneh ia Chau A yau ye Thái Lan, Lào, Hàn Quốc saong Nhật Bản. Ini lac  bruk pahadar 50 thun peih paha gah meraong negar, yasa taneh ia (30/4/1975 – 30/4/2025). 

Thu tuong Trung Quốc Lý Cường hu ieu da-a ndem biai haong My dalam mbang taom mbaok Thượng nghi si Ndang Cong hoa Steve Daines saong dom yam ndoc ngak mbang pablei salih praong di negar My. Ong caong khin My brei pambuak haong Trung Quoc  piah jhul pakhang bruk cakrok patagok tani tanat, siam mekre saong khang kajap di dua gah. Dalam tuk yau urak ini, Bắc Kinh daok kham merat duah jalan piah biai haong urang jakar ngak praong di karja My, caong khin  hu njauk gauk ka bruk palaik njiak dom bruk patagok jien je di My.

Dak harei dak hu rilo urang Han Quoc umo meng 20 tal 30 thun palih klak 3 bruk praong dalam raidiuk di yaok urang, nan lac pagol taom gaok gauk, lakhah saong ndih tapui anek. Dom urang nan lac “Rai samar Sampo”. Urak ini hu labaih 50% rahra Han Quoc iek lakhah nan lac bruk njauk ngak. Tui duah thau, bruk gah likuh ba tal huac lakhah tok diuk tok pasang saong ndik tapui nan lac bruk ndua nong trak kurang jien padai, jien blei sang danaok glaong, kan duah bruk ngak saong dom bruk karei pambak tal raong pato anek bik.

Dom mbang apui khuah glai di dua tinh Okayama saong Ehime, gah Pei negar Nhật Bản, daok pambak praong oh lac hu padam apui. Karja  bhum palei ini hu ba tabiak  bruk brei panduan ba samar chip ngan haong jaik 2.800 bhap  bini piah  hu salamat. Bala apui khuah glai di tinh Okayama mbang abih labaih 250 ha saong 119 ha di tinh Ehime. Urak ini , oh ka hu thei njuak rambuac, metai kayua apui khuah glai rah tabiak. Dahlau di nan, puac bilan 2, Nhật Bản hu sa mbang apui khuah glai biak trak  dui atah 12 harei mbang jeng bau abih 3.000 ha glai./.