Biar harei 12/1, Thủ tướng Phạm Minh Chính saong kapol urang jakar pakat glong Viet Nam tabiak truh Viêng Chăn, Lào tamat mbang rivang negar Lào, gam dang akaok Mbang nyaom ka 45 UB pambuak 2 Rajaei Viet Nam -Lào saong tamat “ Thun Jumpataom pambuak talei rohim Viet Nam - Lào, Lào - Việt Nam 2022” meng harei 11 – 12/01/2023 tui panuac da-a di Thủ tướng negar CHDCND Lào Sonexay Siphandon.  Mbang rivang hu rilo jak jeng siam mekre, rik daong peih ngak jalan đối ngoại di Nyaom roya XIII, iek praong bruk cak rok patagok talei pambuak bruk haong taneh ia jaik taphia saong ASEAN, dalam nan brei ngak dahlau glong abih ka bruk pambuak talei rohim haong Lào. Thủ tướng Phạm Minh Chính jeng lac Urang ngak praong pakat glong negar langiu akaok meti rivang Lào dalam thun 2023 saong negar langiu akaok meti lac ong Sonexay Siphandon peih bruk taduan raok hadei di tuk tagok ngak Thủ tướng Lào.

Peih ngak tukvak tabung glaong khik kajap an ninh trật tự dalam tukvak Tết Nguyên đán thun sak tapai 2023, Bộ Chỉ huy Bộ đội Biên phòng tỉnh Gia Lai hu pato tacei 8 đồn biên phòng di drei paglaong dom bruk ngak, peih bruk khik ramik, pasang iek khik caga biak catang 80km jalan tapen negar. Gam tui di nan, jhul khang bruk mesuk haong kol tội phạm saong dom urang ngak suan adat hukum karei, abih di nyu nan lac gah ma túy, pablei salih lậu, bleik saleik dalam bruk pablei salih, pajeng ba, pandar phao patuk dalam tuk dahlau, dalam saong hadei di Tết Nguyên đán.

Dom harei ini, meng tỉnh tal dom puk palei di Yên Bái jeng hu peih ngak rilo bruk rivang, alin brei pandap saong tadhau ayuh Tet dom  urang dalam sarak karja, baoh sang kathaot, urang raidiuk kan kandah. Yên Bái jao brei labaih 59.400 paok pandap alin hadiah ka dom baoh sang kathaot, urang raidiuk kan kandah, urang ngak bruk daong cach mạng, urang mbang tui jien daong xahoi, urang ngak kong kan kathaot…kuhria abih tih labaih 28 tỷ đồng. Tui UBMT Negar Viet Nam tỉnh Yên Bái, taong abih labaih 59 ribau paok pandap hu alin brei ka urang kathaot saong urang dalam sarak karja dahlau di harei 16/1, khik brei dom baoh sang  uan raok Têt hu ginup, bui sambau.

 Phó Thủ tướng Lê Minh Khái hu mbaoh tangin tame sarak ka 13 harei 12/1/2023 ka bruk ba tabiak brei asar pajaih njam patam meng gilang khik piah di taneh ia daong ka dom tinh lac Thừa Thiên Huế, Quảng Trị. Phó Thủ tướng jao ka Mintri ngak nong saong patagok palei pala pabak brei oh mek jien 22 tấn asal pajaih njam patam meng gilang khik piah di taneh ia ka tỉnh Thừa Thiên Huế (10 tấn) saong Quảng Trị (12 tấn) piah daong ka bhap bini pasiam veik bruk ngak mbang, pala drak kayua njauk bala di thun 2022. UBND dom tỉnh Thừa Thiên Huế, Quảng Trị njauk taduan bruk ngak di drei lac tantu ka pathau khan, peih bruk taduan mek, parabha saong pandar dom janih asal pajaih nan piah pala samu, njauk tukvak.

Yaom pabui diuk daok trun biar, tok 51 -53 ribau đồng sa kilo.  Urang raong glang di BR-VT daok haduh hatai, mbang ndih oh hu kayua yaom pablei nan meda khat trak. Yaok thun, jaik Tet Nguyen dan yaom pabui diuk dak harei dak tagok glong kayua urang blei ralo. Yau nan min, thun ini yaom pabui diuk biar ba tal urang raong glang kham ngak brei takik khat kahik, pablei pabui samar piah duah hasit jien phun veik, salih ka bruk cang tal Tet atau cang hu yaom meng pablei.

Di maong 2, 10 minit page harei ini (13/1, tui maong di pak ini), Trung Quốc hu cuh hu jak jeng sa vệ tinh bahrau tagok langik meng Pasak cuh vệ tinh Tây Xương di tỉnh Tứ Xuyên, tây nam Trung Quốc. Vệ tinh hu angan ieu lac APSTAR-6E hu cuh tagok meng tên lửa jhul Trường Chinh-2C. Ini lac vệ tinh viễn thông, hu pandar piah pabak ka dom bruk khau tin thông lượng glaong ka bhum Đông Nam Á.

Yaok thun, tukvak ini “ darak pasar blei pandap panda” negar Prang chreih  chrai tagok kayua bilan trun yaom puac thun hu peih tabiak. Yau nan min, thun ini, Prang tapa sa bilan “sale” joa lange, tuk urang dalam negar takik blei kayua yaom năng lượng saong lạm phát tagok glong abih hadei di bruk mesruh metak di Ukraine. Yaom lac, dom cửa hàng khuyến mãi tal 30 – 40%, min urang takik blei dut saong yaok thun. Menuac sia pak nan brei thau, meda oh blei pandap hagit dalam mbang pablei trun yaom ini, kayua yaom kaom dom janih pandap tagok dalam tukvak tapa, abih di nyu lac yaom năng lượng.

Công ty ngak ô tô di Ấn Độ Vayve Mobility bahrau tabiak mbaok mẫu radaih ô tô điện nduac meng năng lượng ia harei camriep abih di taneh ia ini, di Mbang parang iek radaih di Ấn Độ bahrau tabiak mbaok di gah langiu ban ine New Delhi. Hu caik angan lac "Eva", sruh radaih ô tô thông minh 2 kik daok hu rami ramik blah pin ia harei di mangaok tuk radaih piah pabak veik điện ka paok pin, brei ka radaih nduac tal 10 km (6,2 dặm) yaok harei. Yam ndok di Công ty ini brei thau lac, cty daok kuhria ba sruh radaih ini tabiak darak pasa dalam 18 bilan tra./.