Ngak bruk haong urang par akaok TPHCM di bier harei 27/11 ka bruk cak rok patagok kinh tế - xã hội, brei masaiy phun jien đầu tư công saong jalan peih ngak dom danak dak hu makna praong, Thủ tướng Rajaei Phạm Minh Chính hu ieu kakei TPHCM kham marat ngak salah yam tapa 19 kadha ba tabiak di thun 2022 saong ieu kakei dom mintri, dom gah pambuak haong TPHCM puah ngak salah 19 kadha ini. Dalam nan, Ban raya hu pambuak haong dom gah piah langyah taong abih dom bruk daok tavak tavaiy, jhul samar 5 danak dak hu makna praong, lac dom danak dak jalan pasei đô thị; jalan Vành đai 3 Thành phố; Sang padeih T3 di mblang kapar haoh dunya Tân Sơn Nhất; jalan cao tốc Ban raya Hồ Chí Minh – Mộc Bài, Tây Ninh. Thủ tướng pato tacei brei “padang kapul ngak bruk piah langyah dom bruk daok tavak tavaiy”.

Mbang nyaom ka 17 di UBTVQH peih tabiak harei ini (28/11), di sang Quốc hội. Di mbang nyaom ini, UBTVQH pasang iek bruk parabha phun jien patagok kadung jien karja pakat negar tukvak 2021-2025 daok veik di 3 danak dak bruk ngak negar saong pabak phun jien taneh ia langiu brei ka danak dak bruk ngak negar padang ngak palei pala bahrau tukvak 2021-2025; bruk ramik veik phun jien mesraiy veik thun 2022 di dom tinh, ban.

Harei ini, di tỉnh Bến Tre, Mintri Ngak nong saong patagok palei pala  pambuak bruk haong UBND tỉnh Bến Tre peih bruk “Brei thau bruk pablei baoh kruac bhung camriep di Việt Nam tapa Hoa Kỳ”. yau nan, kruac bhung lac janih baoh kayau ka 7 di Việt Nam hu brei adat pablei tapa darak pasa Hoa Kỳ, hadei di baoh pa-aok, baoh darang, baoh vải, thanh long, chôm chôm saong vú sữa. Việt Nam urak ini hu labaih 105 ribau ha taneh pala baoh kruac bhung, sản lượng jaik 905 ribau tấn. Taeng di bhum taneran kraong Cuu Long hu labaih 32 ribau ha, sản lượng labaih 370 ribau tấn... Ini lac jalan peih tabiak praong ka baoh kayau di Việt Nam jeng yau baoh kruac bhung that hu tame darak pasa Hoa Kỳ.

Di mbang taom gaok, ndom biai nao mai haong labaih 300 dam dara ngan saong kadha dam dara haong bruk ngak, ong Võ Văn Minh - chủ tịch UBND tỉnh Bình Dương brei thau, Bình Dương daok dang anak "bẫy thu nhập trung bình" nan ye brei hu dom jalan salih bahrau khang piah patagok năng suất ngak bruk. Dalam nan, dom dam dara urang đoàn daok hu rilo dalam dom urang ngak di tỉnh brei hu pato pakai saong eng drei bac megru, paglaong ilamu ngak bruk piah pabak dom caong khin bahrau tuk Bình Dương daok pambuak bruk, mbeik drei yam tame praong-dalam haong dom gah pambuak bruk di mangaok dunya.

Sở Jalan mbak pajeng ba tỉnh Kiên Giang bahrau peih bruk padang  ngak peih praong labik jalan gah puac di jalan roya 80 meng huyện Kiên Lương ban ban Hà Tiên (atah 15,6km) ngan haong kadung jien buh tame jaik 300 tỷ đồng. Labik jalan hu ngak pasiam nan, lac jalan praong nao Hà Tiên, khut trak, hu rilo labik mbaih mbaoh saong ia glut yaok mbang hajan. Jalan roya 80 atah 215km, lac jalan hu makna praong pambuak dom tỉnh gah Pai bhum ĐSBCL nduac tapa Vĩnh Long, Đồng Tháp, An Giang, Cần Thơ saong Kiên Giang. Labik akaok di jalan roya ini di akaok tatua Mỹ Thuận saong labik puac lac di pabah mbang negar pakat dunya Hà Tiên (Kiên Giang).

Dalam 2 harei puac adit meng bloh, gah daong menuac gaok bala di Indonesia duah mboh hu rilo menuac metai di mbang megei baoh taneh  di Tây Java harei 21/11 meng bloh. Urak ini jeng daok hu 11 urang daok lahik. Dom menuac metai dalam mbang megei baoh taneh ini tagok tal 321 urang. Mbang megei baoh taneh khang 5,6 ngak khut labaih 62.000 baoh sang, labaih 73.000 urang njauk panduan nao labik karei. Bruk duah urang njauk bala hu peih veik di harei ini, pataom tame dom labik meda hu menuac daok njauk lam lahik.

Rajaei Pakistan hu peih danak dak klauk jru vaccine pacang caga ruak bại liệt di ban ine Islamabad, ka taong abih uranaih umo mala 5 thun. Langiu di dom labik klauk ka rilo manuac, kapul y tế jeng hu peih bruk nao tal yaok baoh sang piah klauk vaccine ka uranaih. Meng di bilan 8 thun ini, Mintri Y tế Pakistan rilo mbang duah mboh virus bại liệt hoang dã dalam dom mau dut iek hu pataom mek meng alam môi trường. Tal urak ini, negar ini hu mboh abih tih 20 urang njauk ruak bại liệt.

Hadei di dom hãng công nghệ praong di Mỹ, dom Cty công nghệ di Đông Nam Á jeng daok brei menuac ngak di drei padeih rilo. Dom labik praong abih di Đông Nam Á yau GoTo di Indonesia saong Sea di Singapore khan lac brei padeih tal 10% dom menuac ngak dalam thun ini. Makna lac kayua rilo Cty công nghệ hu pah biak rilo menuac ngak dalam tuk jit praong COVID-19 piah pabak bruk caong khin praong oh ka bhian mboh dalam bruk pajeng ba pandap, Tui kuhria, bruk brei menuac ngak gah công nghệ padeih bruk di  Đông Nam Á meda dui atah tapa quý 2 thun hadei./.