Brei panuac di nyaom biai mbang ka 20 di Mban pato tacei Karja dom danak dak hu makna di negar, hu mboh rilo abih lac gah jalan mbak pajeng ba, Thu tuong Phạm Minh Chính ndom lac: Meng ini tal puac thun tok daok jaik 4 bilan, langik daok dalam bilan hajan rabuk hu rilo kan kandah, bruk ngak daok rilo, Dom mentri, dom gah, dom bhum palei hu hatai “ngak samar drah” jang veik”. Thu tuong pandar brei kham merat peih dom bruk ngak piah salah blaoh njauk tukvak dom danak dak rilo meng lac jalan ngak 3.000 km jalan peih samar saong 1.700km jalan tapen tasik; khik kajap anak meta hu salah blaoh Mblang Kapal ahaok par pakat Dunya Long Thành dalam thun 2025.

Di var ngak bruk haong Mban tacei ba jalan padang ngak saong cakrok patagok Pasak Jien padai dunya TPHCM(Mban tacei ba), Bi thu ban uy Ban raya HCM Trần Lưu Quang caong khin Mban tacei ba jalan samar padang Kapol tacei pato, kuhria dahlau bruk ngak dalam thun saong 5 thun piah tui iek bruk rah tabiak. Tui nan kakei bruk praong di jalan ngak dac thu ka jien padai, sarak piah pachreih urang ilamo, urang naih joi, kakei Mban tacei ba jalan pasang duah cambaic laic bruk nan; samar pasang iek quy hoach, bruk ngak di pasak njauk tui bruk ba tabiak.

Meng akaok thun tal ini yaom dom janih hadang su, hadang the, hadang giraong hijao saong aring tasik di An Giang khik tani tanat di tanut glaong daong parilo jien mek tame ka rahra, daong patagok tani tanat ka gah raong ikan hadang di tinh. Bruk raong ikan hadang dalam bhum meng akaok thun tal ini hu tani tanat, takik rah tabiak jit ruak. Tinh An Giang salih taneh pala padai oh siam lagaih, njom ia mbak tapa bruk raong hadang njauk lagaih; salah blaoh co so ha tang kraong ribaong, jalan mbak…duh siam ka bruk peih praong bruk ngak mbang saong karo salamat jit ruak.

Dalam dom bruk ngak di “Bilan rivang ma-in sirah Lam Dong thun 2025”, dalam 2 harei tapa, So Ilamo, The thao saong Yulit tinh Lam Dong  pambuak haong Kapol Yulit  bhum palei peih padang kapol Famtrip pasang duah jalan ngak brei pambuak khang dom kaya, jitvu yulit  di 3 labik Bein bingu praong - Tathik hijao - Ceik gla. Hadei pagam 3 tinh Lam Dong, Dak Nong saong Binh Thuan, gah yulit di tinh Lam Dong birau hu peih sa labik praong cak rok patagok, rilo kaya meda. Yau nan min, bruk kan kandah lac jalan ceik Đại Ninh daok ngak yau nan ye tuai damuai mboh glaih glar.

Ia sua angaok kraong Dong Nai daok trun suai saong tagok tal tanut njauk kakei caga ka 1. Mbuan rah tabiak ia dauk di bhum dhaong biar saong jaleih ar kraong, ia craoh di angaok halau kraong Dong Nai dalam tinh Dong Nai, ngak kan kandah tal bruk nao mai angaok ia di gilai, bruk ngak mbang, daok dang saong dom bruk kinh te xa hoi di rahra. Tanut ia di balai Tà Lài daok trun suai, di bruk kakei caga ka 2.

Dom harei tapa, ban ine Kathmandu saong rilo ban praong di Nepal daok gaok sraw kadau biak catang. Camereip cagar veik ka  bruk pakauk pandar mang xa hoi, bruk trun jalan samar ralo ngak jeng bruk sahanak pandiak hatai di dom uranaih dam dara ka bruk tham nhung, oh sumu gauk saong bruk oh lagaih dalam raidiuk di dom urang ngak praong chinh tri. Tong thong saong Akok Tong tham muu bol lin taneh ia ini pok sap iew da-a ndem biai, plaik njiak sraw kadau dalam taneh ia.

Jabat Khi tuong negar Trung Quoc brei thau negar ini bahrau rah tapa sa bilan He pandiak abih kuhria meng thun 1961, dalam tuk gah Barak Trung Quoc gaok bilan hajan atah abih. Gam tuk nan, rilo labik praong di grauk negar rah tabiak dom mbang pandiak bhang biak khang. Tui dom urang ilamo, langik oh lagaih ini ba tabiak kan kandah biak praong ngan haong gah ba tabiak sarak jalan ngak, tuk hajan praong ba tal ia sua ye brei panduan rahra nao daok labik karei, dalam tuk pandiak bhang khang ngak ka ndien gaok srau kadau saong hamu padai njauk am cuh.

Gah Houthi di Yemen khan lac mbang pasram di bol lin kapal ahaok Israel tame Yemen melam 10 bilan 9 ba tal kuhria taong abih labaih 160 urang metai saong njauk rambuac, lac sa dalam dom mbang taong tame ngak urang njauk rambuis biak ralo kuhria meng mbang methruh gauk biak catang di Iraen saong Houthi. Langiu di nan, nyaom bol lin Yemen  daok meblak rilo kapal gilai pajeng ndap nda di tathik, ba tal 2 gilai ndap nda  di Hy Lạp karam saong 15 urang peih gilai lahik.